ສະພາປະຊາຊົນແຂວງ ຊຽງຂວາງ ເປີດກອງປະຊຸມຮ່ວມກັບກຳມາທິການບັນດາເຜົ່າສະພາແຫ່ງຊາດ

29/05/2018 00:00 -

ໃນວັນທີ 9 ພຶດສະພາ 2018 ນີ້ ຢູ່ທີ່ຫ້ອງປະຊຸມສະພາປະຊາຊົນແຂວງຊຽງຂວາງ ໄດ້ເປີດກອງປະຊຸມລະຫວ່າງ ສະພາປະຊາຊົນແຂວງ ກັບກຳມາທິການບັນດາເຜົ່າ ສະພາແຫ່ງຊາດ ເພື່ອຕິດຕາມກວດກາ ແລະ ເກັບກຳຂໍ້ມູນ ສະພາບການຮຽນຂອງເດັກນ້ອຍ ຢູ່ໂຮງຮຽນກິນນອນຊົນເຜົ່າ, ວຽກງານສາສະໜາ ແລະ ການປະສານງານລະຫວ່າງ ສະພາປະຊາຊົນແຂວງ ກັບອົງການຈັດຕັ້ງມະຫາຊົນຢູ່ຂັ້ນທ້ອງຖິ່ນ ໂດຍການເປັນປະທານຮ່ວມຂອງທ່ານ ນ. ພົມມາ ສິທິວົງສອນ ຮອງປະທານສະພາປະຊາຊົນແຂວງ ຊຽງຂວາງ ແລະ ທ່ານ ຄຳຈັນ ໂສດາປະເສີດ ຮອງປະທານກຳມາທິການບັນດາເຜົ່າສະພາແຫ່ງຊາດ; ມີບັນດາທ່ານຫົວໜ້າພະແນກ, ຮອງຫົວໜ້າພະແນກ, ຄະນະບໍລິຫານອົງການຈັດຕັ້ງມະຫາຊົນ, ຄະນະປະຈຳ ແລະ ຄະນະເລຂາທິການສະພາປະຊາຊົນແຂວງ ພ້ອມດ້ວຍພະນັກງານຈາກສະພາແຫ່ງຊາດ ແລະ ສະພາປະຊາຊົນແຂວງເຂົ້າຮ່ວມຢ່າງພ້ອມພຽງ.

          ໃນວາລະດຳເນີນກອງປະຊຸມ,  ໄດ້ຮັບຟັງການລາຍງານສະພາບລວມ ຂອງໂຮງຮຽນສາມັນກິນນອນຊົນເຜົ່າ ຈາກພະແນກສຶກສາແຂວງ ເປັນຕົ້ນແມ່ນ ສະພາບການຄຸ້ມຄອງ, ບໍລິຫານ ແລະ ນະໂຍບາຍດ້ານຕ່າງໆ ຕໍ່ນັກຮຽນ, ຮັບຟັງການລາຍງານສະພາບທີ່ພົ້ນເດັ່ນ ແລະ ປະກົດການຍໍ້ທໍ້ຕ່າງໆ ກ່ຽວກັບສາສະໜາ ໃນໄລຍະຜ່ານມາ ຈາກແນວລາວສ້າງຊາດ ແລະ ຮັບຟັງການລາຍງານກ່ຽວກັບການປະສານງານລະຫວ່າງສະພາປະຊົນແຂວງ ກັບແນວລາວສ້າງຊາດ ແລະ ອົງການຈັດຕັ້ງມະຫາຊົນຂອງແຂວງ.  ຫຼັງຈາກນັ້ນຜູ້ແທນເຂົ້າຮ່ວມກອງປະຊຸມ ກໍ່ໄດ້ຜັດປ່ຽນກັນປະກອບຄຳຄິດເຫັນ ແລະ ຖອດຖອນບົດຮຽນເຊິ່ງກັນ ແລະ ກັນຢ່າງກົງໄປກົງມາ ເພື່ອໃຫ້ເຫັນເຖິງບັນຫາທີ່ຕ້ອງແກ້ໄຂ, ຈັດຕັ້ງປະຕິບັດໃນຕໍ່ໜ້າໃຫ້ຖືກຕ້ອງຕາມລະບຽບກົດໝາຍ ແລະ ໃຫ້ໄດ້ຮັບປະສິດທິຜົນສູງ.