ປະທານກຳມາທິການ ປກຊ-ປກສ  ສພຊ ເຮັດວຽກຮ່ວມກັບ ສພຂ ສະຫວັນນະເຂດ.

29/05/2018 00:00 -

ໃນຕອນເຊົ້າວັນທີ 9 ພຶດສະພາ 2018 ນີ້, ທ່ານ ພົຈ. ຄຳສຸກ ວີອິນທະວົງ ປະທານກຳມະການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາວຽກງານໃນຂົງເຂດ ປກຊ-ປກສ, ເຮັດວຽກຮ່ວມກັບຄະນະກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ ສະພາະຊາຊົນແຂວງສະຫວັນນະເຂດ ຢູ່ຫ້ອງປະຊຸມຄະນະປະຈຳສະພາປະຊາຊົນແຂວງ; ໂດຍການເຂົ້າຮ່ວມຂອງທ່ານ ຄຳຜັນ ຄູນສະຫວັນ ກຳມະການພັກແຂວງ, ຮອງປະທານສະພາປະຊາຊົນແຂວງສະຫວັນນະເຂດ, ທ່ານ ພັທ ສັງວານ ວົງວິໄລ ປະທານຄະນະກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ, ສະມາຊິກສະພາປະຊາຊົນແຂວງ, ຮອງເລຂາທິການ ພ້ອມດ້ວຍພະນັກງານພາຍໃນຄະນະກຳມະການດັ່ງກ່າວ.

          ຈຸດປະສົງຂອງການເຄື່ອນໄຫວຄັ້ງນີ້ ກໍເພື່ອເປັນການປຶກສາຫາລື ແລະ ຕິດຕາມກວດກາ ບັນດາວຽກງານໃນຂົງເຂດ ປກຊ-ປກສ ແຂວງສະຫວັນນະເຂດ.  ໃນກອງປະຊຸມ ທ່ານ ພັທ ສັງວານ ວົງວິໄລ ໄດ້ຜ່ານບົດລາຍງານການຈັດຕັ້ງປະຕິບັດວຽກງານຂອງຄະນະກຳມະການກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ ສະພາປະຊາຊົນແຂວງສະຫວັນນະເຂດ ໃນໄລຍະຜ່ານມາ ຊຶ່ງທ່ານໄດ້ຍົກໃຫ້ເຫັນ ສະພາບການຈັດຕັ້ງປະຕິບັດກົດໝາຍ, ນິຕິກຳໃຕ້ກົດໝາຍ ໃນຂົງເຂດວຽກງານທີ່ກ່ຽວຂ້ອງ ພ້ອມທັງການປະສານສົບທົບກັບກອງບັນຊາການທະຫານແຂວງ ແລະ ປກສ ແຂວງ ເພື່ອເກັບກຳສະພາບການໄຫວ ຂອງກຸ່ມຄົນບໍ່ດີ, ຕິດຕາມແກ້ໄຂບັນຫາປາກົດການຫຍໍ້ທໍ້ໃນສັງຄົມຢູ່ພາຍໃນແຂວງ ພ້ອມທັງລົງຕິດຕາມກວດກາ ແລະ ລົງເກັບກຳຂໍ້ມູນສະພາບການຂອງປະຊາຊົນກ່ຽວກັບຄຳຮ້ອງຂໍຄວາມເປັນທຳ, ຄຳສະເໜີຕ່າງໆ ທີ່ຕິດພັນກັບວຽກງານ ຍຸຕິທຳ ແລະ ປກຊ-ປກສ ເພື່ອຄົ້ນຄ້ວາແກ້ໄຂ ແລະ ປະສານສົມທົບກັບພາກສ່ວນທີ່ກ່ຽວຂ້ອງ.  ນອກຈາກນີ້ ຍັງໄດ້ນຳເອົາເນື້ອໃນຜົນສຳເລັດ ກອງປະຊຸມສະໄໝສາມັນແຕ່ລະເທື່ອ, ລັດຖະທຳມະນູນ ແລະ ກົດໝາຍລົງເຜີຍແຜ່ໃຫ້ຜູ້ມີສິດເລືອກຕັ້ງ ແລະ ກຳລັງ ປກຊ-ປກສ.  ໃນກອງປະຊຸມຍັງໄດ້ມີການປະກອບຄຳຄິດ-ຄຳເຫັນຢ່າງກົງໄປກົງມາ ໃນຂົງເຂດວຽກງານ ປກຊ-ປກສ ເພື່ອປຶກສາຫາລືແກ້ໄຂຂໍ້ຄົງຄ້າງໃນດ້ານຕ່າງໆ ເປັນຕົ້ນແມ່ນປາກົດການຫຍໍ້ທໍ້ທີ່ເກີດຂຶ້ນໃນສັງຄົມ ທີ່ຈະຕ້ອງໄດ້ຮັບການແກ້ໄຂໃຫ້ດີຂຶ້ນເລື້ອຍໆ.