ປະທານກຳມາທິການການຕ່າງປະເທດ ຕ້ອນຮັບທ່ານເອກອັກຄະລັດຖະທູດອົດສະຕາລີ

29/05/2018 00:00 -

(ສພຊ) ໃນຕອນບ່າຍຂອງວັນຈັນທີ 14 ພຶດສະພາ 2018 ທີ່ສະພາແຫ່ງຊາດ (ສພຊ) ທ່ານ ເອກສະຫວ່າງ ວົງວິຈິດ ປະທານກໍາມາທິການ ການຕ່າງປະເທດ ສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ  ຈີນ-ເບີນາດ ຄາຣັດສໂກ (Jean-Bernard Carrasco) ເອກອັກຄະລັດຖະທູດ ອົດສະຕຣາລີ ປະຈໍາ ສປປລາວ ພ້ອມດ້ວຍຄະນະ ເນື່ຶອງໃນໂອກາດມາລົງດໍາແໜ່ງເປັນເອກອັກຄະລັດຖະທູດຄົນໃໝ່ ປະຈໍາ ສປປລາວ.

         ໂອກາດດັ່ງກ່າວ, ທ່ານ ເອກສະຫວ່າງ ວົງວິຈິດ ໄດ້ສະແດງຄວາມຍິນດີຕ້ອນຮັບທ່ານ ເອກອັກຄະລັດຖະທູດ ດ້ວຍຄວາມຈິງໃຈ ພ້ອມທັງຊົມເຊີຍ ທີ່ໄດ້ຮັບຄວາມເຊື່ອໝັ້ນຈາກລັດຖະບານ ແລະ ປະຊາຊົນອົດສະຕຣາລີ ແຕ່ງຕັ້ງໃຫ້ມາດໍາລົງຕໍາແໜ່ງເອກອັກຄະລັດຖະທູດຄົນໃໝ່ປະຈໍາ ສປປລາວ; ພ້ອມທັງຕີລາຄາສູງການພົວພັນຮ່ວມມື ລາວ-ອົດສະຕຣາລີ ໃນໄລຍະຜ່ານມາ ເປັນຕົ້ນແມ່ນການຮ່ວມມືສອງຝ່າຍ ລັດຖະບານ ກໍຄືປະຊາຊົນອົດສະຕຣາລີ ທີ່ໄດ້ສະໜັບສະໜູນທາງດ້ານທຶນຮອນເຕັກນິກວິຊາການ ທີ່ເລັ່ງໃສ່ການພັດທະນາພຶ້ນຖານໂຄງລ່າງຕ່າງໆ ແລະ ການພັດທະນາຊັບພະຍາ ກອນມະນຸດ ທາງດ້ານການສຶກສາ ໂດຍຜ່ານໂຄງການຕ່າງໆ ພ້ອມທັງສະເໜີໃຫ້ ທ່ານ ເອກອັກຄະລັດຖະທູດຄົນໃໝ່ ຈົ່ງເຮັດໜ້າທີ່ສືບຕໍ່ສາຍພົວພັນທັງສອງປະເທດໃຫ້ແໜ້ນແຟ້ນຂຶ້ນກວ່າເກົ່າ ແລະ ສະໜີໃຫ້ທ່ານເອກອັກຄະລະຖະທູດຖ້າເປັນໄປໄດ້ຢາກໃຫ້ຮ່ວມມືກັບສະພາແຫ່ງຊາດ ຊອກທຶນຮອນ ຈໍານວນໜຶ່ງ ເພື່ອນໍາໄປຊ່ວຍເຫລືອກໍ່ສ້າງໂຮງຮຽນປະຖົມ, ມັດທະຍົມໃຫ້ແກ່ຊົນຊາດຊົນເຜົ່າ ເຂດຫ່າງໄກສອກຫລີກແຫ່ງໃດແຫ່ງໜຶ່ງ ແລະ ອຸປະຖໍາການເຝິກອົບຮົມທັກສະພາສາອັງກິດໃຫ້ແກ່ພະນັກງານສະພາແຫ່ງຊາດ ໂດຍສະເພາະແມ່ນພະນັກງານທີ່ພົວພັນກັບຕ່າງປະເທດ.

         ໃນການຢ້ຽມຂໍ່ານັບ, ທ່ານ ຈີນ-ເບີນາດ ຄາຣັດສໂກ (Jean-Bernard Carrasco) ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ຈາກທ່ານປະທານກໍາມາທິການ ການຕ່າງປະເທດ ພ້ອມທັງກ່າວວ່າ ຈະສືບຕໍ່ເສີມຂະຫຍາຍສາຍພົວພັນມິດຕະພາບອັນດີງາມລະຫວ່າງສອງປະເທດ ແລະ ຈະປະຕິບັດໜ້າທີ່ເອກອັກຄະລັດຖະທູດ ໃຫ້ໄດ້ຮັບໝາກຜົນດີຂຶ້ນກວ່າເກົ່າ. ນອກຈາກນີ້, ທັງສອງທ່ານຍັງໄດ້ແລກປ່ຽນຄວາມຄິດຄວາມເຫັນ ເຊິ່ງກັນ ແລະ ກັນ ກ່ຽວກັບບັນຫາຄວາມປອດໄພຂອງພາກພື້ນ ກໍຄືບັນຫາສັນຕິພາບໂລກ, ແຜນພັດທະນາເສດຖະກິດ-ສັງຄົມ ແລະ ການພັດທະນາຊັບພະຍາກອນມະນຸດ ລະຫວ່າງສອງປະເທດ ເພື່ອເປັນຂໍ້ມູນ ແລະ ບົດຮຽນໃນການພັດທະນາປະເທດ.