ກຳມາທິການແຜນການ, ການເງິນ ແລະ ການກວດສອບ ເຄື່ອນໄຫວຢູ່ແຂວງຫລວງນ້ຳທາ

30/05/2018 00:00 -

(ສພຊ) ໃນລະຫວ່າງວັນທີ 17-18 ພຶດສະພາ 2018, ທ່ານ ເກດແກ້ວ ສີຫາລາດ ຮອງປະທານກຳມາທິການແຜນການ, ການເງິນ ແລະ ການກວດສອບ ສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດຂອງແຂວງໃນງວດ1 ປະຈຳປີ 2018 ພ້ອມທັງ ຢ້ຽມຢາມ, ພົບປະປະຊາຊົນ ແລະ ເຮັດວຽກກັບເມືອງທີ່ເປັນຈຸດສຸມຂອງແຂວງຫລວງນ້ຳທາ. ວັນທີ 17 ພຶດສະພາ 2018 ໄດ້ເປີດກອງປະຊຸມຮ່ວມພະແນກການທີ່ກ່ຽວຂ້ອງ ທີ່ຫ້ອງປະຊຸມຂອງສະພາປະຊາຊົນແຂວງຫລວງນ້ຳທາ ໂດຍການເປັນປະທານຂອງທ່ານ ເກດແກ້ວ ສີຫາລາດ ຮອງປະທານກຳມາທິການແຜນການ, ການເງິນ ແລະການກວດສອບ; ເຂົ້າຮ່ວມມີ ທ່ານ ນາງ ອຸ່ນຫຼ້າ ອ້ຽງລໍລາດ ຮອງປະທານສະພາປະຊາຊົນແຂວງ,  ປະທານຄະນະກຳມະການ, ແຜນການ ແລະ ການເງິນ; ມີສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງ ທີ 3 ແຂວງຫລວງນໍ້າທາ, ຫົວໜ້າ-ຮອງຫົວໜ້າພະແນກການ, ຫົວໜ້າ-ຮອງຫົວໜ້າຂະແໜງ ພ້ອມດ້ວຍວິຊາການທີ່ກ່ຽວຂ້ອງເຂົ້າຮ່ວມທັງໝົດ 20 ຄົນ.

ກອງປະຊຸມໄດ້ຮັບຟັງລາຍງານຈາກບັນດາພະແນກການທີກ່ຽວຂ້ອງ ກ່ຽວກັບສະພາບພົ້ນເດັ່ນ ຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ 3 ເດືອນ (ງວດ1) ຂອງແຂວງຫລວງນໍ້າທາ, ເປັນຕົ້ນ ການຈັດແບ່ງໂຄງການລົງທຶນຂອງລັດທີມີມູນຄ່າຕ່ຳກວ່າ 20 ຕື້ກີບ, ການມອບໂອນຄົງການລົງທຶນລັດມູນຄ່າຕ່ຳກວ່າ 5 ຕື້ກີບ, ໂຄງການຈັດຕັ້ງວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ແລະ ກົນໄກການປະສານງານລະຫວ່າງແຂວງ ແລະ ກອງທຶນຫຼຸດຜ່ອນຄວາມທຸກຍາກ ຂັ້ນສູນກາງ, ການລົງທຶນໃສ່ວຽກງານຂົງເຂດສຶກສາ, ສາທາລະນະສຸກ ໃນການນຳໃຊ້ງົບປະມານຕາມເພດານ ປີ 2018 ແລະ ການຈັດຕັ້ງປະຕິບັດແຜນງົບປະມານແຫ່ງລັດ 3 ເດືອນ(ງວດ1), ການຈັດສັນ ແລະ ແບ່ງງົບປະມານໃຫ້ບັນດາພະແນກການ ແລະ ເມືອງຂອງແຂວງ; ພ້ອມນັ້ນ ປະທານກອງປະຊຸມ ຍັງມີຄຳຖາມເຈາະຈິ້ມຕໍ່ບົດລາຍງານແຕ່ລະພະແນກການ ແລະ ໄດ້ພ້ອມກັນແລກປ່ຽນປະກອບຄຳຄິດເຫັນ ຢ່າງກົງໄປກົງມາ ເພື່ອຊອກຫາວິທີແກ້ໄຂໃນການຈັດຕັ້ງປະຕິບັດໃຫ້ຖຶກຕ້ອງສອດຄ່ອງ.

ຕອນເຊົ້າຂອງວັນທີ 18 ພຶດສະພາ 2018 ໄດ້ເຄື່ອນໄຫວຕິດຕາມກວດກາ, ຢ້ຽມຢາມ, ພົບປະປະຊາຊົນ ແລະ ເປີດກອງປະຊຸມຮ່ວມຫ້ອງການທີ່ກ່ຽວຂ້ອງຂອງເມືອງນາແລ ແຂວງຫລວງນ້ຳທາ ໂດຍການຕ້ອນຮັບຂອງທ່ານ ຄຳແພງ ແສງມີໄຊ ຮອງເລຂາພັກເມືອງ ຮອງເຈົ້າເມືອງນາແລ ແຂວງຫລວງນ້ຳທາ, ມີຫົວໜ້າ- ຮອງຫົວໜ້າຫ້ອງການທີ່ກ່ຽວຂ້ອງເຂົ້າຮ່ວມ.

ໃນກອງປະຊຸມໄດ້ຮັບຟັງການລາຍງານສະພາບພາຍໃນເມືອງໂດຍຫຍໍ້ ເຊິ່ງຜ່າມມາແມ່ນມີທ່າຂະຫຍາຍຕົວ ຢ່າງຕໍ່ເນືອງ ໃນລະດັບ 9,35% ຕໍ່ປີ, ລວມຍອດພະລິດຕະພັນພາຍໃນບັນລຸໄດ້ 179 ຕື້ກີບ, ສະເລ່ຍຕໍ່ຫົວຄົນໄດ້ 889 ໂດລາ, ທຽບໃສ່ປີຜ່າມມາເພີ່ມຂຶ້ນ 354 ໂດລາ, ໄດ້ຕິດຕາມຊູກຍູ້ການລົງທຶນຂອງລັດ ແລະ ອົງການຈັດຕັ້ງສາກົນຈຳນວນ 17 ໂຄງການ.  ພ້ອມນັ້ນຍັງໄດ້ຮັບຟັງລາຍງານການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດຂອງເມືອງ ງວດI ປີ 2018 ເປັນຕົ້ນວຽງານແຜນການ-ການເງິນ, ວຽກງານກະສິກໍາ ແລະ ປ່າໄມ້, ວຽກງານພັດທະນາຊົນນະບົດ ແລະ ວຽກງານກອງທຶນຫລຸດຜ່ອນຄວາມທຸກຍາກຂອງເມືອງ.

ຕອນບາຍຂອງວັນດຽວກັນຍັງໄດ້ເດີນທາງໄປພົບປະປະຊາຊົນບ້ານມົກກູດ ເມືອງນາແລ ແຂວງຫຼວງນ້ຳທາ ແລະ ມອບເຄື່ອງຊ່ວຍເຫຼືອຈຳນວນໜຶ່ງ ລວມມີ: ຊຸດກິລາ, ໝາກບານ, ໝາກກະຕໍ້, ປຶ້ມຂຽນ,  ລວມມູນຄ່າ 500.000 ກີບ.

ທ່ານ ເກດແກ້ວ ສີຫາລາດ ຍັງໄດ້ມີຄຳເຫັນໂອ້ລົມ ແລະ ໃຫ້ທິດຊີ້ນຳ;  ກ່ອນອຶ່ນທ່ານໄດ້ ສະແດງຄວາມຍ້ອງຍໍຊົມເຊີຍ ໃນການນຳພາຈັດຕັ້ງປະຕິບັດວຽກງານ ແລະ ຂອບໃຈແຕ່ລະພາກສ່ວນ ທີ່ໄດ້ນຳເອົາຂໍ້ມູນອັນສຳຄັນທີ່ເປັນພື້ນຖານໃຫ້ ແລະ ຮຽກຮ້ອງໃຫ້ບັນດາພະແນການ ສັງລວມຄຳສະເໜີ ເປັນລາຍລັກອັກສອນ ຢ່າງຊັດເຈັນ ແລ້ວສົ່ງໃຫ້ສະພາປະຊາຊົນແຂວງ ເພື່ອຈະນຳເຂົ້າ ກອງປະຊຸມສະໄໝສາມັນ ເທື່ອທີ5ຂອງສະະພາແຫ່ງຊາດ ຊຸດທີ VIII ແລະ ເໜັ້ນໜັກໃຫ້ເອົາໃຈໃສ່ໃນການປະຕິບັດວຽກງານໃຫ້ດີກວ່າເກົ່າ, ພ້ອມທັງໃຫ້ເພີ່ມຂອດປະສານງານລະຫວ່າງແຂວງກັບເມືອງ ໃຫ້ກົມກຽວກວ່າເກົ່າ.