ຮອງປະທານກຳມາທິການກົດໝາຍ ຕ້ອນຮັບຄະນະ ຜູ້ແທ່ນຈາກມະວິທະຍາໄລ Indiana ຂອງສະຫະລັດອາເມລິກາ

01/06/2018 00:00 -

 (ສພຊ) ຕອນເຊົ້າວັນທີ 28 ພຶດສະພາຜ່ານມາ ທີ່ສະພາແຫ່ງຊາດ (ສພຊ), ທ່ານ ອໍາໄພ ຈິດມານົນ ຮອງປະທານກໍາມາທິການກົດໝາຍ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ເດວິດ ວິນລຽມ (David Williams) ຜູ້ອໍານວຍການບໍລິຫານສູນປະຊາທິປະໄຕບົນພື້ນຖານລັດຖະທໍາມະນູນ CCD ປະຈໍາມະຫາວິທະຍາໄລ Indiana ຂອງສະຫະລັດອາເມລິກາ ພ້ອມດ້ວຍຄະນະ ເນື່ຶອງໃນໂອກາດເດີນທາງມາຢ້ຽມຢາມ ສປປລາວ ລະຫວ່າງວັນທີ 20-29 ພຶດສະພາ 2018.

          ໂອກາດດັ່ງກ່າວ, ທ່ານ ອໍາໄພ ຈິດມານົນ ໄດ້ສະແດງຄວາມຍິນດີຕ້ອນຮັບທ່ານຜູ້ອໍານວຍການບໍລິຫານສູນ ດ້ວຍຄວາມຈິງໃຈ ແລະ ຊົມເຊີຍ ທີ່ທາງຄະນະໄດ້ມາຢ້ຽມຢາມ ສປປລາວ ໃນຄັ້ງນີ້; ພ້ອມທັງຕີລາຄາສູງການພົວພັນຮ່ວມມື ລາວ-ສະຫະລັດອາເມລິກາ ໃນໄລຍະຜ່ານມາ ເປັນຕົ້ນແມ່ນການຮ່ວມມືສອງຝ່າຍ ທີ່ໄດ້ສະໜັບສະໜູນທາງດ້ານທຶນຮອນເຕັກນິກວິຊາການ ທີ່ເລັ່ງໃສ່ການສ້າງຮ່າງກົດໝາຍ ການພັດທະນາພື້ນຖານໂຄງລ່າງຕ່າງໆ ແລະ ການພັດທະນາຊັບພະຍາກອນມະນຸດ ໂດຍຜ່ານໂຄງການຕ່າງໆ ພ້ອມທັງສະເໜີໃຫ້ທ່ານຜູ້ອໍານວຍການບໍລິຫານສູນ ຈົ່ງເຮັດໜ້າທີ່ສືບຕໍ່ສາຍພົວພັນທັງສອງປະເທດໃຫ້ແໜ້ນແຟ້ນດີຂຶ້ນກວ່າເກົ່າ ແລະ ສະເໜີໃຫ້ມີການເຝິກອົບຮົມໄລຍະສັ້ນໃຫ້ແກ່ພະນັກງານ ສພຊ ໃນດ້ານການສ້າງຮ່າງກົດໝາຍ ແລະ ນໍາເອົາພະນັກງານພາຍໃນ ສພຊ ໄປຖອດຖອນບົດຮຽນນໍາສູນປະຊາທິ ປະໄຕບົນພື້ນຖານລັດຖະທໍາມະນູນ CCD ປະຈໍາມະຫາວິທະຍາໄລ Indiana ຂອງສະຫະລັດອາເມລິກາ.

          ໃນການຢ້ຽມຂໍ່ານັບ, ທ່ານ ເດວິດ ວິນລຽມ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ຈາກທ່ານຮອງປະທານກໍາມາທິການກົດໝາຍ ພ້ອມທັງກ່າວວ່າ ຈະສືບຕໍ່ເສີມຂະຫຍາຍສາຍພົວພັນມິດຕະພາບອັນດີງາມລະຫວ່າງສອງປະເທດ ແລະ ເຫັນດີຈະນໍາເອົາຂໍ້ສະເໜີດັ່ງກ່າວໄປຄົ້ນຄວ້າພິຈາລະນາ ຊອກທຶນຮອນ ຫລື ສ້າງເປັນໂຄງການພິເສດໃດໜຶ່ງ ເພື່ອຕອບສະໜອງຂໍ້ສະເໜີດັ່ງກ່າວໃນໄວໆນີ້.

(ສອນສັກ ວັນວິໄຊ)