ປະທານກຳມະທິການເສດຖະກິດແຜນການ, ການເງີນ ແລະ ກວດສອບ ສພຊ ເຄື່ອນໄຫວຢູ່ແຂວງອັດຕະປື.

01/06/2018 00:00 -

(ສພຊ)ວັນທີ 24 ພຶດສະພາ 2018 ທີ່ຫ້ອງປະຊຸມສະພາປະຊາຊົນແຂວງອັດຕະປື, ທ່ານ ວິໄລວົງ ບຸດດາຄຳ ກຳມະການສູນກາງພັກ, ປະທານກຳມາທິການເສດຖະກິດແຜນການ, ການເງີນ ແລະ ກວດສອບ ສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາ ແລະ ຊຸກຍູ້ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ ຢູ່ແຂວງ ອັດຕະປື; ເຂົ້າຮ່ວມມີທ່ານ ເພັດແກ້ວ ເຮືອງປັນຍາ ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 17 ແຂວງອັດຕະປື, ປະທານສະພາປະຊາຊົນແຂວງ; ມີ ປະທານຄະນະກຳມະການ ເສດຖະກິດ, ແຜນການ ແລະ ການເງີນ, ປະທານຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ, ປະທານຄະນະກຳມະການຍຸຕິທຳ ປ້ອງກັນຊາດ-ປ້ອງກັນຄວາມສະຫງົບ, ຄະນະເລຂາທິການ ສພຂ; ຕ່າງໜ້າຈາກ ພະແນກແຜນການ ແລະ ການລົງທຶນແຂວງ, ພະແນກການເງີນແຂວງ, ພະແນກກະສີກຳ-ປ່າໄມ້ແຂວງ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ, ພະແນກໂຍທາທິການ ແລະ ຂົນສົ່ງແຂວງ, ພະແນກສາທາລະນະສຸກແຂວງ, ພະແນກສຶກສາ ແລະ ກິລາແຂວງ ພ້ອມດ້ວຍພະນັກງານ-ວີຊາການສະພາປະຊາຊົນແຂວງທີ່ກ່ຽວຂ້ອງຈໍານວນໜຶ່ງເຂົ້າຮ່ວມ.

ກອງປະຊຸມໄດ້ຮັບຟັງການລາຍງານຈາກພະແນກການທີ່ເຂົ້າຮ່ວມ ໂດຍສະເພາະ: ພະແນກແຜນການ ແລະ ການລົງທຶນແຂວງ ລາຍງານກ່ຽວກັບສະພາບອັນພົ້ນເດັ່ນຂອງການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ 6 ເດືອນທ້າຍປີ 2018 ຂອງແຂວງ ເຊິ່ງໄດ້ຍົກໃຫ້ເຫັນການຈັດແບ່ງໂຄງການລົງທຶນຂອງລັດ ທີ່ມີມູນຄ່າ 20 ຕື້ກີບລົງມາ, ການມອບໂອນໂຄງການລົງທຶນຂອງລັດ ທີ່ມີມູນຄ່າຕ່ຳກວ່າ 5 ຕື້ກີບ ຕາມທິດ 3 ສ້າງ ໃຫ້ເມືອງເປັນຜູ້ຄຸ້ມຄອງ; ພະແນກການເງີນແຂວງ ລາຍງານກ່ຽວກັບ ການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນຕົ້ນປີ ແລະ 6 ເດືອນທ້າຍປີ 2018  ເຊີ່ງມີທັງຂໍ້ສະດວກ ແລະ ຂໍ້ຫຍຸ້ງຍາກ ໃນການຈັດຕັ້ງປະຕິບັດແຜນງົບປະມານແຫ່ງລັດຂອງແຂວງ, ການຈັດສັນ ແລະ ແບ່ງງົບປະມານ ໃຫ້ບັນດາພະແນກການ, ບັນດາເມືອງ; ພະແນກກະສີກຳ-ປ່າໄມ້ ລາຍງານກ່ຽວກັບ ການຈັດຕັ້ງປະຕິບັດ ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ເຊິ່ງກຳນົດໄດ້ 4 ປະເພດຈຸດສຸມຮອດປີ 2020 ຄື: ຈຸດສຸມພັດທະນາຊົນນະບົດ ແລະ ລຶບລ້າງຄວາມທຸກຍາກ, ຈຸດສຸມພັດທະນາ ແລະ ຈັດສັນພູມລຳເນົາ, ຈຸດສຸມເຂດຊາຍແດນລາວ-ຫວຽດນາມ ແລະ ຈຸດສຸມສ້າງບ້ານໃຫ່ຍເປັນຕົວເມືອງໃນຊົນນະບົດ. ພ້ອມນັ້ນ ຍັງໄດ້ຮັບຟັງການລາຍງານຈາກພະແນກການອື່ນໆອີກຈຳນວນໜຶ່ງ.

ທ່ານ ວິໄລວົງ ບຸດດາຄຳ ໄດ້ເຈາະຈີ້ມບັນດາພະແນກການດັ່ງກ່າວ ຕໍ່ກັບການຈັດຕັັ້ງປະຕິບັດ ແຜນພັດທະນາເສດຖະກີດ-ສັງຄົມ, ແຜນງົບປະມານແຫ່ງລັດ  ແລະ ຂໍ້ສະດວກ ຂໍ້ຫຍຸ້ງຍາກ ການຈັດຕັ້ງປະຕິບັດວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ, ພ້ອມນັ້ນກໍ່ໄດ້ສະເໜີໃຫ້ ບັນດາພະແນກການ ປະສານງານກັບສະພາປະຊາຊົນແຂວງຢ່າງເລີກເຊິ່ງ ແລະ ກວດກາຄືນບັນດານິຕິກຳລຸ່ມກົດໝາຍ ເພື່ອໃຫ້ສອດຄ່ອງແກ່ການຈັດຕັ້ງປະຕິບັດວຽກງານ, ຫາຊ່ອງທາງແກ້ໄຂ, ສ້າງຄວາມເປັນເອກະພາບ ລະຫວ່າງພະແນກດ້ວຍກັນ ແລະ ລະຫວ່າງສູນກາງກັບທ້ອງຖີ່ນ ໃຫ້ແທດເໝາະກັບສະພາບຄວາມເປັນຈິ່ງ.