ສະຖາບັນຄົ້ນຄວ້ານິຕິກຳ ສພຊ ເຮັດວຽກຢູ່ແຂວງ ຄຳມ່ວນ

01/06/2018 00:00 -

ວັນທີ 25 ພຶດສະພາ 2018 ທີ່ສະພາປະຊາຊົນແຂວງຄໍາມ່ວນ ໄດ້ເປີດກອງປະຊຸມເພື່ອສະໜອງຂໍ້ມູນໃຫ້ແກ່ ສະຖາບັນຄົ້ນຄວ້ານິຕິກຳສະພາແຫ່ງຊາດ ໃນການເກັບກຳສະພາບການ ແລະ ຂໍ້ຄົງຄ້າງຕ່າງໆທີ່ມີຄວາມຫຍຸ້ງຍາກ ຢູ່ທ້ອງຖິ່ນ  ໂດຍການເປັນປະທານຂອງທ່ານ ຄຳສີ ອຸດທິວົງ ຮອງເຈົ້າແຂວງຄຳມ່ວນ; ເຂົ້າຮ່ວມມີທ່ານ ອວນມາ ຂັນຕິຍະວົງ ຮອງປະທານສະພາປະຊາຊົນແຂວງ, ມີຄະນະສະຖາບັນຄົ້ນຄວ້ານິຕິກຳສະພາແຫ່ງຊາດ ແລະ ບັນດາທ່ານຫົວໜ້າ-ຮອງຫົວໜ້າພະແນກການກ່ຽວຂ້ອງ ຮວມທັງອົງການຈັດຕັ້ງມະຫາຊົນ ພ້ອມດ້ວຍເຈົ້າເມືອງທ່າແຂກ ແລະ ວິຊາການຊ່ວຍວຽກຈຳນວນໜຶ່ງເຂົ້າຮ່ວມ.

ກອງປະຊຸມໄດ້ຮັບຟັງການລາຍງານຫຍໍ້ຂອງບັນດາພາກສ່ວນກ່ຽວຂ້ອງເປັນຕົ້ນແມ່ນ ອົງການແນວລາວສ້າງຊາດແຂວງ, ພະແນກຍຸຕິທຳ, ພະແນກແຜນການ ແລະ ການລົງທຶນ, ພະແນກຊັບພະຍາກອນທຳມະຊາດ ແລະ ສິ່ງແວດລ້ອມ, ພະແນກອຸດສາຫະກຳ ແລະ ການຄ້າ, ສານປະຊາຊົນແຂວງ ແລະ ເມືອງທ່າແຂກ ກ່ຽວກັບຂອດການແກ້ໄຂຂໍ້ຂັດແຍ່ງທາງດ້ານເສດຖະກິດ ແລະ ຂອດການປະສານງານ ລະຫວ່າງ ບັນດາອົງການອຳນາດລັດ ຂັ້ນທ້ອງຖິ່ນ ກັບ ສະພາປະຊາຊົນແຂວງ.  ທັງນີ້ກໍ່ເພື່ອເປັນການກະກຽມບັນດາຂໍ້ມູນ ເນື້ອໃນອັນສຳຄັນຕ່າງໆ ໃຫ້ແກ່ຄະນະປະຈຳສະພາແຫ່ງຊາດ ເພື່ອຈະນຳເຂົ້າໄປພິຈາລະນາ ແລະ ຮັບຮອງໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ VIII ທີ່ຈະໄຂຂຶ້ນໃນເດືອນ ມິຖຸນາ ນີ້; ພ້ອມດຽວກັນນັ້ນ ກໍເພື່ອເປັນການນຳເອົາຂໍ້ມູນສຳຄັນດັ່ງກ່າວໄປເປັນບ່ອນອີງໃຫ້ແກ່ການດັດປັບ ແລະ ກຳນົດກົດໝາຍ, ລະບຽບການໃໝ່ໃນວຽກຂອດການປະສານງານລະຫວ່າງ ສະພາປະຊາຊົນແຂວງ ກັບ ບັນດາອົງການອຳນາດລັັັັັັັັັັັັັັັັັັັັັດ ໃນຂັ້ນທ້ອງຖິ່ນ ໃຫ້ມີຄວາມຊັດເຈນ ແລະ ເປັນລະບົບຫຼາຍຍິ່ງຂຶ້ນກວ່າເກົ່າ.