ສະຖາບັນຄົ້ນຄວ້ານິຕິກຳສະພາແຫ່ງຊາດ ເຄື່ອນໄຫວເກັບກຳຂໍ້ມູນຢູ່ແຂວງສະຫວັນນະເຂດ.

06/06/2018 00:00 -

(ສພຊ)ໃນລະຫວ່າງວັນທີ 23-24 ພຶດສະພາ 2018 ຜ່ານມາ ສະຖາບັນຄົ້ນຄ້ວານິຕິກຳສະພາແຫ່ງຊາດ ນຳໂດຍທ່ານ ບໍ ຫານປະເສີດ ຮອງຫົວໜ້າສູນຄົ້ນຄ້ວານິຕິກຳສະພາແຫ່ງຊາດ ພ້ອມຄະນະ ໄດ້ເຄື່ອນໄຫວເກັບກຳຂໍ້ມູນຢູ່ແຂວງສະຫວັນນະເຂດ ເພື່ອສະໜອງໃຫ້ແກ່ການຄົ້ນຄ້ວາໃນ 2 ຫົວຂໍ້ຄື: ກົນໄກການປະສານງານລະຫວ່າງ ສພຂ ກັບອົງການອື່ນຂອງລັດ; ການແກ້ໄຂຂໍ້ຂັດແຍ່ງທາງດ້ານເສດຖະກິດ ເພື່ອຮັບປະກັນການດຳເນີນການຄົ້ນຄວ້າໃຫ້ໄດ້ຮັບຂໍ້ມູນຂ່າວ-ສານ ທີ່ຊັດເຈນ, ຖືກຕ້ອງ ແລະ ສຳເລັດຕາມແຜນທີ່ວາງໄວ້ ໂດຍການຕ້ອນຮັບຂອງທ່ານ ພູທອນ ພຸດທະຂັນຕິ ຮອງເລຂາທິການ ສະພາປະຊາຊົນແຂວງສະຫວັນນະເຂດ ພ້ອມຄະນະ.

ການລົງເກັບກຳຂໍ້ມູນໃນຄັ້ງນີ້ ທາງສະຖາບັນຄົ້ນຄ້ວານິຕິກຳສະພາແຫ່ງຊາດ ໄດ້ພົບປະ ແລະ ສຳພາດ ທ່ານ ຄໍາເຜີຍ ຜັນທະຈອນ ປະທານສະພາປະຊາຊົນແຂວງສະຫວັນນະເຂດ ເຊິ່ງທ່ານໄດ້ຍົກໃຫ້ເຫັນ ພາລະບົດບາດ, ສິດ ແລະ ໜ້າທີ່ ນັບແຕ່ມີການສ້າງຕັ້ງສະພາທ້ອງຖິ່ນຂຶ້ນມາ ໂດຍສະເພາະການປະສານສົມທົບກັບ ອົງການຈັດຕັ້ງລັດຂັ້ນແຂວງ, ວຽກງານຕິດຕາມກວດກາ, ການຮັບຮອງເອົາວຽກງານສຳຄັນຂອງແຂວງ, ນິຕິກຳ ແລະ ວຽກງານອື່ນໆ.  ຊຶ່ງຜ່ານມາ ການປະສານສົມທົບລະຫວ່າງສະພາປະຊາຊົນກັບ ອົງການຈັດຕັ້ງຂອງຂອງລັດນັ້ນ ມີທັງຂໍ້ສະດວກ ແລະ ຂໍ້ຫຸ້ຍງຍາກ; ການສະໜອງຂໍ້ມູນຂອງບາງພະແນກການ ຍັງຊັກຊ້າ, ບາງພາກສ່ວນຍັງບໍ່ທັນເຂົ້າໃຈເຖິງພາລະບົດບາດ, ສິດ ແລະ ໜ້າທີ່ຂອງສະພາປະຊາຊົນແຂວງ ເທົ່າທີ່ຄວນ ຊຶ່ງຈະຕ້ອງໄດ້ມີການເລັ່ງໃສ່ນິຕິກຳໃນການສ້າງພາລະບົດບາດ, ສິດ ແລະ ໜ້າທີ່ໃນການເຄື່ອນໄຫວວຽກງານຂອງສະພາປະຊາຊົນຂັ້ນແຂວງ ກໍ່ຄືເຂດເລືອກຕັ້ງປະຈຳເມືອງຕ່າງໆ ໃຫ້ລະອຽດກ້ວາງຂວາງ ແລະ ເດັດຂາດ; ນອກຈາກນີ້ ທາງຄະນະສະຖາບັນຄົ້ນຄ້ວານິກຳສະພາແຫ່ງຊາດ ຍັງໄດ້ພົບປະ ແລະ ສຳພາດ ບັນດາຄະນະກຳມະການຂອງສະພາປະຊາຊົນແຂວງ, ແນວລາວສ້າງຊາດແຂວງ, ສານປະຊາຊົນແຂວງ ພ້ອມດ້ວຍບັນດາພະແນກການທີ່ກ່ຽວຂ້ອງ ຕະຫຼອດຮອດຫົວໜ້າ-ຮອງຫົວໜ້າຂະແໜງ ແລະ ວິຊາການຈຳນວນຂອງສະພາປະຊາຊົນແຂວງ ຊຶ່ງແຕ່ລະພາກສ່ວນໄດ້ການຮ່ວມມື້ເປັນຢ່າງດີ ໃນການຕອບສຳພາດ ໃນແຕ່ລະບັນຫາທີ່ທາງຄະນະຮັບຜິດຊອບໄດ້ຕັ້ງຂຶ້ນ ຊຶ່ງເຫັນໄດ້ເຖິງຂໍ້ສະດວກ ແລະ ຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານຂອງແຕ່ລະພາກສ່ວນ ພ້ອມທັງຄຳສະເໜີທີ່ແຕ່ລະພາກສ່ວນໄດ້ສະເໜີ ໃຫ້ທາງຄະນະສະຖາບັນຄົ້ນຄ້ວານິຕິກຳສະພາແຫ່ງຊາດ  ເພື່ອເປັນຂໍ້ມູນອັນສຳຄັນ ທີ່ຈະໄປປະກອບໃສ່ໃນການຄົ້ນຄ້ວາໃນ 2 ຫົວຂໍ້ດັ່້ງກ່າວ ໃຫ້ມີຄວາມລະອຽດຖືກຕ້ອງ ແລະ ຊັດເຈນຍິ່ງຂຶ້ນ.

ໃນຕອນທ້າຍທາງຄະນະສະຖາບັນຄົ້ນຄ້ວານິຕິກຳສະພາແຫ່ງຊາດ ກໍ່ໄດ້ສະແດງຄວາມຂອບໃຈ ແຕ່ລະພາກສ່ວນທີ່ໄດ້ໃຫ້ຄວາມຮ່ວມມືເປັນຢ່າງດີໃນການພົບປະ ແລະ ສຳພາດໃນຄັ້ງນີ້ ຊຶ່ງຈະນຳເອົາເນື້ອໃນ,ຈິດໃຈ ພ້ອມທັງ ຄຳສະເໜີຕ່າງໆທີ່ແຕ່ລະພາກສ່ວນໄດ້ສະເໜີຂຶ້ນໄປລາຍງານ ຕໍ່ຂັ້ນເທິງອີກດ້ວຍ.