ກຳມະບານຮາກຖານກຳມາທິການເສດຖະກິດ ເຕັກໂນໂລຊີ ແລະສິ່ງແວດລວ້ມ ເປີດບັ້ນແຂ່ງຂັນ 5 ເປັນເຈົ້າ

06/06/2018 00:00 -

(ສພຊ) ເພື່ອ​ຈັດ​ຕັ້ງ​ຜັນ​ຂະຫຍາຍ​ເນື້ອ​ໃນ​ຂໍ້​ແຂ່ງຂັນ 5 ​ເປັນ​ເຈົ້າ ຕິດ​ພັນ​ກັບ​ຂະ​ບວນຮັກ​ຊາດ ​ແລະ ພັດທະນາ ຕາມ​ມະຕິ​ກອງ​ປະຊຸມ​​ໃຫຍ່​ຄັ້ງ​ທີ IV ຂອງ​ສະຫະພັນ​ກຳມະບານ​ສະພາ​ແຫ່ງ​ຊາດ, ​ເພື່ອ​ເຮັດ​ໃຫ້​ຖັນ​ແຖວ​ສະມາຊິກ​ກຳມະບານ ກໍ​ຄື​ພະນັກງານ-​ລັດຖະກອນ ຂອງ​ກຳ​ມາ​ທິການ​ເສດຖະກິດ ​ເຕັກ​ໂນ​ໂລ​ຊີ ​ແລະ ສິ່ງ​ແວດ​ລ້ອມ (ກສຕສ) ​ໄດ້​ຮັບ​ຮູ້ ​ແລະ ​ເຂົ້າ​ໃຈ ກ່ຽວກັບ​ຂະ​ບວນການຈັດ​ຕັ້ງ​ປະຕິບັດ​ເນື້ອ​ໃນ​ຂໍ້​ແຂ່ງຂັນ 5 ​ເປັນ​ເຈົ້າ ​ແນໃສ່​ສ້າງ​ຄວາມ​ເປັນ​ເອກະ​ພາບ​ພາຍ​ໃນ​ສາມກົມ ກໍ​ຄື​ພະນັກງານ​ທີ່​ເປັນ​ເສນາ​ທິການ​ໃຫ້​ແກ່ ກສຕສ; ​ວັນ​ທີ 28 ​ພຶດສະພາ 2018 ທີ່​ສະພາ​ແຫ່ງ​ຊາດ ສະຫະພັນ​ກຳມະ​ບານ​ຮາກ​ຖານ ກສຕສ​ ​ໄດ້​ຈັດ​ກອງ​ປະ​ຊຸມ​ເປີດ​ບັ້ນ​ການ​ປະຕິບັດ​ເນື້ອ​ໃນ​ຂໍ້​ແຂ່ງຂັນ 5 ​ເປັນ​​ເຈົ້າ ​ໂດຍ​ການ​ເປັນ​ປະທານ​ຂອງ​ ທ່ານ ​ອານຸສັກ ພົງສາ ຮອງປະທານ​ກຳມະບານ​ຮາກ​ຖານ​ ກສຕສ; ​ມີ​ທ່ານ ​ນາງ ປິ່ງ​ຄຳ ລາຊະ​ສິມ​ມາ ​ຮອງ​ເລຂາ​ໜ່ວຍ​ພັກ ​ຮອງປະທານ​ ກສຕສ; ຫົວໜ້າ-ຮອງ​ຫົວໜ້າກົມ, ຫົວໜ້າ-ຮອງ​ຫົວໜ້າພະ​ແນ​ກ, ຕາງໜ້າ​ສະຫະພັນ​ກຳມະບານ​ສະພາ​ແຫ່ງ​ຊາດ, ກຳ​ມະ​ບານ​ແຕ່ລະ​ຮາກ​ຖານ, ຫນ່ວຍ​ກຳມະບານ​ເອກະ​ລາດ​ທີ່​ຂຶ້ນ​ກັບ​ສະຫະພັນ​ກຳມະບານ​ສະພາ​​ແຫ່ງ​ຊາດ, ສະມະ​ຊິກ​ກຳມະບານ ​ແລະ ພະນັກ​ງານ​ພາຍ​ໃນ​ກຳມາ​ທິການ​ເຂົ້າ​ຮ່ວມ.

          ​ໃນ​ກອງ​ປະຊຸມ, ຜູ້​ເຂົ້າ​ຮ່ວມ​ໄດ້​ຮັບ​ຟັງບົດ​ສະຫລຸບ​ການ​ເຄື່ອນ​ໄຫວ​ຂອງ​ຮາກ​ຖານກຳມະ​ບານ​ ກສຕສ ​ໃນ​ໄລຍະຜ່ານມາ ​ແລະ ທິດ​ທາງ​ແຜນການ​ເຄື່ອນ​ໄຫວ​ວຽກງານໃນ​ປີ 2018,​ ຄຳ​ແນະນຳ​ກ່ຽວກັບ​ການຈັດ​ຕັ້ງ​ປະຕິບັດ​ຂໍ້​ແຂ່ງຂັນ 5 ​ເປັນ​ເຈົ້າ​ຂອງ​ກຳ​ມະ​ບານ​ຮາກ​ຖານ​ ກສຕສ, ຂໍ້​ຕົກລົງວ່າ​ດ້ວຍ​ການ​ແບ່ງ​ງານ ​ແລະ ການ​ກຳນົດ​ກົງຈັກ​ການຈັດ​ຕັ້ງ​ຂອງ​ກຳມະບານ​ຮາກ​ຖານ​ ກສຕສ; ພ້ອມ​ທັງ​ຂຶ້ນ​ກ່າວ​ຄຳ​ປະຕິຍານ ​ແລະ ຈັບ​ມື​ຮັບ​ເອົາ​ຂໍ້​ແຂ່ງຂັນ;

          ​ໂອກາດ​ດຽວກັນ, ທ່ານ ນາງ ປິ່ງ​ຄຳ ລາຊະ​ສິມ​ມາ ​​​ຍັງໄດ້​ໂອ້​ລົມ​ຕໍ່ກອງ​ປະຊຸມ​ໂດຍ​ໄດ້​ຍ້ອງຍໍ​ຊົມ​ເຊີຍ​ຕໍ່ຜົນງານ​ທີ່​ກຳມະບານ​ຮາ​ກຖານ​ ກສຕສ ​ຍາດ​ມາ​ໄດ້​ໃນ​ໄລຍະຜ່ານ​ມາ; ພ້ອ​ມທັງ​ເນັ້ນ​ໃຫ້​​ຈັດ​ຕັ້ງ​ປະຕິບັດ​ຕາມ​ເນື້ອ​ໃນ​ຂໍ້​ແຂ່ງ​ຂັນດ້ວຍ​ຄວາມ​ຫ້າວຫັນ, ​ເປັນ​ເຈົ້າ​ການ ​ແລະ ​ເປັນ​ຈິດໜຶ່ງ​ໃຈດຽວ; ພ້ອມ​ທັງປັບປຸງ​ແບບ​ແຜນ​ວິທີ​ເຮັດ​ວຽກໃຫ້​ມີ​ປະສິດທິພາ​ບ ​ແລະ ປະສິດທິ​ຜົນ​ຫລາຍ​ຂຶ້ນ​ກວ່າ​ເກົ່າ.

          ພ້ອມ​ນັ້ນ, ຍັງ​ມີ​ການ​ແຂ່ງຂັນ​ກິລາ​ບານ​ເຕະ​ຮ່ວມ​ກັບ​ຕະຫລາດ​ລັກ​ຊັບ​ລາວ ​ເພື່ອ​ເປັນ​ການ​ສ້າງ​ຂະ​ບວນການ​ໃຫ້​ແກ່​ການ​ເປີດ​ບັ້ນ​ແຂ່ງຂັນ 5 ​ເປັນ​ເຈົ້າຂອງ​ສະຫະພັນ​ກຳມະບານ​ໃຫ້​ມີ​ຄວາມ​ຄຶກຄື້ນ ​ແລະ ທັງ​ເປັນ​ການ​ສ້າງສາ​ຍພົວພັນ, ຄວາມ​ສາມັກຄີ​ຮັກ​ແພງ ລະຫວ່າງ​ອົງການ​ຈັດ​ຕັ້ງ​ມະຫາຊົນ​ຂອງ ກສຕສ ກໍ​ຄື​ອົງການ​ຈັດ​ຕັ້ງ​ມະຫາຊົນ​ຂອງ​ສະພາ​ແຫ່ງ​ຊາດ ກັບ​ບັນດາ​ອົງການ​ຈັດ​ຕັ້ງ​ມະຫາຊົນ​ຂອງ​ບັນດາ​ກົມ​ກອງ, ກະຊວງ​ອ້ອມ​ຂ້າງ​ລັດຖະບານ​ທີ່​ເປັນ​ຄູ່​ຮ່ວມ​ງານ​ໃຫ້​ເປັນ​ຂະ​ບວນຟົດ​ຟື້ນ.