ທ່ານຮອງປະທານກຳມາທິການການຕ່າງປະເທດ ຕ້ອນຮັບການເຂົ້າພົບປະ ແລະເຮັດວຽກ ຂອງຜູ້ອຳນວຍການໂຄງການ “ໄອປາເພື່ອການເຊື່ອມໂຍງອາຊຽນ” (AIPA for ASEAN Integration)

21/06/2018 00:00 -

ໃນວັນທີ 15 ມີຖຸນາ 2018, ທີ່ສະພາແຫ່ງຊາດລາວ, ທ່ານ ວຽງທະວີສອນ ເທບພະຈັນ, ສະມາຊິກສະ ພາແຫ່ງຊາດ, ຮອງປະທານກຳມາທິການການຕ່າງປະເທດ ພ້ອມດ້ວຍຄະນະ ໄດ້ຕ້ອນຮັບການເຂົ້າພົບປະ ແລະເຮັດວຽກ ຂອງ ທ່ານ ເບີນາໂດ ອາກາວິນ, ຜູ້ອຳນວຍການໂຄງການ “ໄອປາເພື່ອການເຊື່ອມໂຍງອາຊຽນ” (AIPA for ASEAN Integration) ປະຈຳກອງເລຂາໄອປາ, ຊຶ່ງມີຫ້ອງການ ຢູ່ ນະຄອນຫລວງຈາກາຕາ, ປະ ເທດອິນໂດເນເຊຍ.

ຈຸດປະສົງຂອງການເຂົ້າພົບ​ປະ ແລະເຮັດວຽກໃນຄັ້ງນີ້ ແມ່ນເພື່ອປຶກສາຫາລື, ແລກປ່ຽນຄຳຄິດຄຳເຫັນ ຮ່ວມກັນ ກ່ຽວກັບແຜນການຈັດຕັ້ງປະຕິບັດໂຄງການ “ໄອປາເພື່ອການເຊື່ອມໂຍງອາຊຽນ” ຫຼື AIPA for ASEAN Integration, ກໍ​ຄື​ການ​ສ້າງ​ແຜນ​ງານ​ພັດທະນາ​ຄວາມ​ອາດ​ສາມາດ ​ໃຫ້​ແກ່​ບຸກຄະລາກອນ ຂອງສະພາ ແຫ່ງຊາດລາວ ຫຼື Human Capacity Development Plans ຊຶ່ງເປັນໂຄງການຂອງໄອປາ ໄດ້ຮັບການ ສະໜັບສະໜູນທຶນຈາກອົງການ GIZ ໄດ້ປະເມີນຄວາມຕ້ອງການ ແລະແນວທາງ ໃນການພັດທະນາຂີດຄວາມ ອາດສາມາດ ໃຫ້ແກ່ສະພາແຫ່ງຊາດ ແຫ່ງ ສປປ ລາວ ກໍຄືກົງຈັກຮັບຜິດຊອບວຽກງານກອງເລຂາໄອປາແຫ່ງຊາດ ແນໃສ່ພັດທະນາບຸກຄະລາກອນກອງເລຂາໄອປາແຫ່ງຊາດລາວ ເພື່ອປັບປຸງການຈັດຕັ້ງປະຕິບັດໜ້າທີ່ ຂອງສະພາ ແຫ່ງຊາດລາວ ໃນການເຊື່ອມໂຍງອົງການ AIPA ກໍຄືອາຊຽນ.

ການພົບປະ ແລະເຮັດວຽກ ໄດ້ດຳເນີນໄປດ້ວຍບັນຍາກາດອັນດີ ເຕັມໄປດ້ວຍໄມຕີຈິດ ແລະມີເນື້ອໃນ ໂດຍມີການປຶກສາຫາລືແລກປ່ຽນຄຳຄິດຄຳເຫັນ ແລະຜູ້ແທນສະພາແຫ່ງຊາດລາວ ກໍໄດ້ສະເໜີບາງຄຳຄິດເຫັນ ໂດຍເນັ້ນໃສ່ການສ້າງຄວາມເຂັ້ມແຂງ ເພື່ອພັດທະນາຂີດຄວາມສາມາດ ໃຫ້ແກ່ສະມາຊິກສະພາແຫ່ງຊາດ ແລະພະ ນັກງານ ຂອງສະພາແຫ່ງຊາດລາວ ໃຫ້ສາມາດປະຕິບັດວຽກງານຂອງຕົນ ຢ່າງມີປະສິດທິພາບ  ເພື່ອນຳໄປຈັດຕັ້ງ ປະຕິບັດ ແລະຜັນຂະຫຍາຍໃຫ້ເກີດດອກອອກຜົນເປັນຈິງ. ສຳລັບດ້ານວັນເວລາການຈັດຕັ້ງປະຕິບັດໂຄງການດັ່ງ ກ່າວ ຈະເລີ່ມແຕ່ປີ 2018 ເປັນຕົ້ນ ໄປຈົນເຖິງ ປີ 2020.

ໃນຕອນທ້າຍ, ທ່ານຮອງປະທານກຳມາທິການການຕ່າງປະເທດ ກໍໄດ້ສະແດງຄວາມຂອບໃຈຢ່າງສູງ ນຳທ່ານຜູ້ອຳນວຍການໂຄງການໄອປາ ດັ່ງກ່າວ ທີ່ໄດ້ເດີນທາງມາເຮັດວຽກັບສະພາແຫ່ງຊາດລາວ ແລະຖືໂອກາດນີ້ ອວຍພອນໃຫ້ເດີນທາງດ້ວຍສະຫວັດດີພາບ.