ສະພາແຫ່ງຊາດ ຝຶກອົບຮົມທັກສະການຂີດຂຽນ ແລະ ການກະກຽມວຽກງານໃຫ້ແກ່ວິຊາການ ສພຂ 7 ແຂວງພາກເໜືອ

23/07/2018 00:00 -

ໃນລະຫວ່າງວັນທີ 9-11 ກໍລະກົດ 2018 ທີ່ສະໂມສອນພະແນກແຜນການ ແລະ ການລົງ ທຶນແຂວງຊຽງຂວາງ, ສະຖາບັນຄົ້ນຄວ້ານິຕິກຳສະພາແຫ່ງຊາດ ໄດ້ຈັດກອງປະຊຸມເຝິກອົບຮົມ ກ່ຽວກັບທັກສະການຂີດຂຽນເອກະສານ ແລະ ການກະກຽມວຽກງານຮອບດ້ານຮັບໃຊ້ກອງປະຊຸມ ສະພາປະຊາຊົນຂັ້ນແຂວງໃຫ້ແກ່ພະນັກງານສະພາປະຊາຊົນແຂວງ ໂດຍການເປັນປະທານຂອງ ທ່ານ ຄຳເຜີຍ ປານມາໄລທອງ ຫົວໜ້າສະຖາບັນຄົ້ນຄວ້ານິຕິກຳ ສະພາແຫ່ງຊາດ (ສພຊ) ແລະ ທ່ານ ນາງ ພົມມາ ສິລິວົງສອນ ປະທານສະພາປະຊາຊົນແຂວງຊຽງຂວາງ (ສພຂ); ເຂົ້າຮ່ວມ ມີຫົວໜ້າ-ຮອງຫົວໜ້າສູນເຝິກອົບຮົມ ແລະ ຂໍ້ມູນຂ່າວສານ ສພຊ, ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າເລຂາທິການ ສພຂ, ພະນັກງານວິຊາການຈາກ 7 ແຂວງພາກເໜືອຄື: ແຂວງ ຜົ້ງສາລີ, ຫລວງນ້ຳທາ, ອຸດົມໄຊ, ບໍ່ແກ້ວ, ຫລວງພະບາງ, ໄຊຍະບູລີ ແລະ ຫົວພັນ ເຂົ້າຮ່ວມ 153 ທ່ານ ຍິງ 47 ທ່ານ.

ທ່ານ ຄຳເຜີຍ ປານມາໄລທອງ ໄດ້ມີຄໍາເຫັນບາງຕອນທີ່ສຳຄັນວ່າ: ກອງປະ ຊຸມແມ່ນຈະໄດ້ລົງເລິກວິຊາການກ່ຽວກັບການກະກຽມກອງປະຊຸມກໍ່ຄືການກະກຽມເອກະສານຕ່າງໆທີ່ຮັບໃຊ້ໃຫ້ແກ່ກອງປະຊຸມສະພາປະຊາຊົນແຂວງ ເນື່ອໃນກອງປະຊຸມເຝິກອົບຮົມຄັ້ງນີ້ທີ່ຈິງ ແລ້ວບໍ່ແມ່ນເນື້ອໃນໃໝ່ແຕ່ແມ່ນວຽກງານຂອງ ສພຂ ເຄີຍເຮັດມາແລ້ວ ແຕ່ໃນໂອກາດທີ່ຈັດ ຝຶກອົບຮົມຄັ້ງນີ້ແມ່ນເພື່ອເປັນການສະຫລຸບ, ຖອດຖອນບົດຮຽນຄືນ ເພື່ອກຳໄດ້ບັນຫາຕ່າງໆ ທີ່ຕິດພັນກັບການກະກຽມກອງປະຊຸມ ແຕ່ລະຄັ້ງ ກໍຄືການກະກຽມຮອບດ້ານເອກກະສານຕ່າງເພື່ອ ຮັບໃຊ້ກອງປະຊຸມສະພາປະຊາຊົນແຂວງ.

ຈຸດປະສົງການຈັດກອງປະຊຸມຄັ້ງນີ້ ເພື່ອແນ່ໃສ່ຍົກລະດັບທັກສະວຽກງານຂີດຂຽນ ແລະ ການກະກຽມເອກະສານຕ່າງໆ ໃນການເປັນເສນາທິການໃຫ້ແກ່ສະພາແຫ່ງຊາດ ແລະ ສະພາປະຊາ ຊົນແຂວງ; ແນ່ໃສ່ຍົກລະດັບຄວາມຮູ້, ຄວາມສາມາດໃນການກະກຽມວຽກງານຮອບດ້ານ ເພື່ອ ຮັບໃຊ້ກອງປະຊຸມສະພາປະຊາຊົນຂັ້ນແຂວງ ຢ່າງມີປະສິດທິພາບ; ກອງປະຊຸມຄັ້ງນີ້ ຜູ້ເຂົ້າຮ່ວມ ໄດ້ຮັບຟັງບົດຮຽນ ປະກອບດ້ວຍ 5 ຫົວຂໍ້ຄື: 1. ບົດຮຽນ ແລະ ປະສົບ ການໃນການກະກຽມຮັບໃຊ້ກອງປະຊຸມ ສພຊ; 2. ບົດຮຽນ ແລະ ປະສົບການໃນການຮ່າງບົດສະ ຫລຸບ ແລະ ວາງທິດທາງແຜນການເຄື່ອນໄຫວວຽກງານຂອງສະພາແຫ່ງຊາດ, 3. ວິທີການຂຽນ ບົດລາຍງານບົດຮຽນ ແລະ ປະສົບການໃນການຮ່າງມະຕິປະເພດຕ່າງໆໃນກອງປະຊຸມ ໂດຍທ່ານ ຄຳສິງ ວົງພະຈັນ ຫົວໜ້າກົມເລຂານຸການສະພາແຫ່ງຊາດ; 4. ວິທີຄົ້ນຄວ້າຕໍ່ຮ່າງແຜນງົບປະ ມານແຫ່ງລັດໃນກອງປະຊຸມສະພາປະຊາຊົນແຂວງ; ວິທີຄົ້ນຄວ້າຮ່າງແຜນພັດທະນາເສດ ຖະກິດ-ສັງຄົມ ໃນກອງປະຊຸມປະຊາຊົນແຂວງ ໂດຍທ່ານ ຄຳປຸ່ນ ເພັງທິລາດ, ຫົວໜ້າກົມການເງິນ, ການທະນາຄານ ແລະ ການກວດສອບ; ກອງປະຊຸມຄັ້ງນີ້ ສຳມະນາກອນໄດ້ສຸມສະ ຕິປັນຍາຄົ້ນ ຄວ້າບົດຮຽນ ແລະ ແລກປ່ຽນຄຳຄິດຄຳເຫັນຢ່າງກົງໄປກົງມາ ແລະເປັນຂະບວນຟົດຟື້ນ; ຫລັງ ຈາກນັ້ນ ສຳມະນາກອນ ໄດ້ລົງເຮັດພາກປະຕິບັດຕົວຈິງ ເຊັ່ນ: ວິທີສ້າງແຜນການ, ເຄື່ອນໄຫວ, ວິທີຂຽນບົດລາຍງານ, ບົດສະຫລຸບ ແລະ ວິທີຮ່າງມະຕິປະເພດຕ່າງໆ; ວິທີວິທະຍາໃນການຊ່ວຍ ກະກຽມແຜນພັດທະນາເສດຖະກິດ-ສັງຄົມ, ແຜນງົບປະມານໃຫ້ແກ່ກອງປະຊຸມສະພາປະຊາຊົນ ແຂວງ.

 (ໄຊໂສພາພອນ ມິ່ງມຸງຄຸນ)