ກໍາມາທິການກົດໝາຍ ຈັດກອງປະຊຸມຮຽບຮຽງຄືນກົດໝາຍວ່າດ້ວຍການໃຫ້ວັກຊີນກັນພະຍາດ

23/07/2018 00:00 -

ລະຫວ່າງວັນທີ 5-7 ກໍລະກົດ 2018 ທີ່ຫ້ອງປະຊຸມໄຟຟ້າ ທ່າລາດ ແຂວງວຽງຈັນ, ກໍາມາທິການກົດໝາຍ ແລະ ກໍາມາທິການວັດທະນະທໍາ-ສັງຄົມ ສະພາແຫ່ງຊາດ ຮ່ວມກັບ ກະຊວງສາທາລະນະສຸກ ໄດ້ຈັດກອງປະຊຸມຮຽບຮຽງຄືນກົດໝາຍວ່າດ້ວຍ ການໃຫ້ວັກຊີນກັນພະຍາດ, ໂດຍການເປັນປະທານຮ່ວມ ຂອງທ່ານ ສາຍທອງ ແກ້ວດວງດີ ປະທານກໍາມາທິການກົດໝາຍ, ທ່ານ ສົມພູ ດວງສະຫວັນ ປະທານກໍາມາທິການວັດທະນະທໍາ-ສັງຄົມ ແລະ ທ່ານ ຮສ.ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ; ເຂົ້າຮ່ວມມີບັນດາທ່ານ ຮອງປະທານກໍາມາທິການກົດໝາຍ, ກໍາມາທິການວັດທະນະທໍາ-ສັງຄົມ, ພະນັກງານບໍານານອາວຸໂສ, ຜູ້ຕາງໜ້າຈາກກົມກົດໝາຍຫ້ອງວ່າ ການປະທານປະເທດ, ກົມນິຕິກໍາຫ້ອງວ່າການສໍານັກງານນາຍົກລັດຖະມົນຕີ, ກົມກົດໝາຍກະຊວງຍຸຕິທໍາ, ຫົວໜ້າກົມ-ຮອງຫົວໜ້າກົມ ແລະ ລັດຖະກອນທີ່ກ່ຽວຂ້ອງຂອງສະພາແຫ່ງຊາດ ແລະ ກະຊວງສາທາລະນະສຸກ       ຈໍານວນໜຶ່ງ.

ກອງປະຊຸມຮຽບຮຽງຄືນໃນຄັ້ງນີ້  ແມ່ນເພື່ອນໍາເອົາຄວາມຄິດຄວາມເຫັນ ຂອງບັນດາທ່ານສະມາຊິກສະພາແຫ່ງຊາດ ທີ່ມີຕໍ່ກົດໝາຍດັ່ງກ່າວ ໃນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ VIII ມາຄົ້ນຄວ້າ, ຮຽບຮຽງ ເຂົ້າໃນເນື້ອໃນກົດໝາຍ ເປັນຕົ້ນ ກ່ຽວກັບມາດຕາທີ່ຕິດພັນກັບອາການຂ້າງຄຽງ, ຄວາມຮັບຜິດຊອບຂອງລັດ ແລະ ຄະນະກໍາມະການກ່ຽວກັບ ການໃຫ້ວັກຊີນກັນພະຍາດ ໃຫ້ມີເນື້ອໃນຄົບຖ້ວນ, ລະອຽດ, ຈະແຈ້ງ ແລະ ຮັດກຸມ. ຈາກນັ້ນ ຈຶ່ງນໍາເຂົ້າລາຍງານຕໍ່ກອງປະຊຸມຄະນະປະຈໍາສະພາແຫ່ງຊາດ ໃຫ້ທິດຊີ້ນໍາ ຫຼື ຕົກລົງ ກ່ອນຈະສະເໜີໃຫ້ປະທານສະພາແຫ່ງຊາດ ລົງນາມ ແລ້ວສົ່ງໃຫ້ປະທານປະເທດ ພິຈາລະນາອອກລັດຖະດໍາລັດປະກາດໃຊ້.