ປະທານ ກຜງສ ສະພາແຫ່ງຊາດ ມອບຄອມພິວເຕີຈໍານວນ 7 ຊຸດ

15/08/2018 00:00 -

        (ສພຊ) ໃນຕອນເຊົ້າຂອງວັນທີ 4 ສິງຫາຜ່ານມາ, ທ່ານ ວິໄລວົງ ບຸດດາຄໍາ ກໍາມະການສູນກາງພັກ, ປະທານກໍາມາທິການແຜນການ ການເງິນ ແລະ ການກວດສອບ (ກຜງສ)​ ສະພາແຫ່ງຊາດ ໄດ້ມອບຄອມພິວເຕີຕັ້ງໂຕະຈໍານວນ 7 ຊຸດ ລວມມູນຄ່າ 2 ລ້ານກວ່າກີບ ເຊິ່ງໄດ້ລະດົມທຶນຈາກ 2 ບໍລິສັດ ຄື: ບໍລິສັດ ຄໍາຜາຍດວງຈະເລີນ ກໍ່ສ້າງ ແລະ ບໍລິສັດ ປັນຍາທິລາດ ກໍ່ສ້າງຂົວທາງ  ເພື່ອມອບໃຫ້ແກ່ສະພາປະຊາຊົນແຂວງຈໍາປາສັກ ນໍາໄປມອບຕໍ່ໃຫ້ດ່ານສາກົນໜອງນົກຂຽນ (ຊາຍແດນລາວ-ກໍາປູເຈຍ) ໂດຍການຮັບເອົາເຄື່ອງຊ່ວຍເຫລືອດັ່ງກ່າວຂອງທ່ານ ເມກສະຫວັນ ພົມພິທັກ ຮອງເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງຈໍາປາສັກ ມີບັນດາທ່ານສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 15, ສະມາຊິກສະພາປະຊາຊົນແຂວງ ແລະ ຄະນະເລຂາທິການເຂົ້າຮ່ວມເປັນສັກຂີພິຍານ.

       ທ່ານ ວິໄລວົງ ບຸດດາຄໍາ ໄດ້ກ່າວວ່າ: ການມອບຄອມພິວເຕີເພື່ອຊ່ວຍເຫລືອໃນຄັ້ງນີ້ ແມ່ນເພື່ອໃຫ້ສະພາປະຊາຊົນແຂວງຈໍາປາສັກນໍາໄປມອບຕໍ່ໃຫ້ດ່ານສາກົນ ໜອງນົກຂຽນ (ຊາຍແດນລາວ-ກໍາປູເຈຍ) ນໍາໄປໃຊ້ເຂົ້າໃນວຽກງານເກັບກໍາຂໍ້ມູນ-ຂ່າວສານ ແລະ ວຽກງານອື່ນໆ ທີ່ຕິດພັນກັບວຽກງານບໍລິຫານ ແລະ ຄຸ້ມຄອງດ່ານສາກົນໜອງນົກຂຽນ.

      ໂອກາດດຽວກັນນີ້, ທ່ານປະທານສະພາປະຊາຊົນແຂວງຈໍາປາສັກ ກໍໄດ້ສະແດງຄວາມຂອບໃຈ ທີ່ເຫັນໄດ້ຄວາມສໍາຄັນ ແລະ ໃຫ້ການຊ່ວຍເຫລືອໃນຄັ້ງນີ້ ສະພາປະຊາຊົນແຂວງຈະຮີບຮ້ອນນໍາເອົາຄອມພິວເຕິຈໍານວນດັ່ງກ່າວໄປມອບຕໍ່ໃຫ້ແກ່ດ່ານສາກົນໜອງນົກຂຽນ ເພື່ອນໍາໃຊ້ເຂົ້າໃນການຈັດຕັ້ງປະຕິບັດວຽກງານຂອງດ່ານໃຫ້ເກີດປະໂຫຍດສູງສຸດ.

 

(ພາບ-ຂ່າວສົມວິຈິດໄຊມົນຕີ)