ສະພາແຫ່ງຊາດ ຮ່ວມກັບກະຊວງການເງິນ ຈັດກອງປະຊຸມຮຽບຮຽງ 2 ຮ່າງກົດໝາຍ

15/08/2018 00:00 -

(ສພຊ) ລະຫວ່າງວັນທີ 8-11 ສິງຫາ 2018 ກໍາມາທິການກົດໝາຍ, ກໍາມາທິການແຜນການ ການເງິນ ແລະ ການກວດສອບ ສະພາແຫ່ງຊາດ ຮ່ວມກັບກະຊວງການເງິນ ໄດ້ຈັດກອງປະຊຸມຮຽບຮຽງກົດໝາຍວ່າດ້ວຍການຄຸ້ມຄອງໜີ້ສິນສາທາລະນະ ແລະ ກົດໝາຍວ່າດ້ວຍອາກອນມູນຄ່າເພີ່ມ ​(ສະບັບປັບປຸງ) ທີ່ຫ້ອງປະຊຸມ ຣີສອດແຫຼວຄໍາປະເສີດ ແຂວງວຽງຈັນ ໂດຍການເປັນປະທານຂອງທ່ານ ສົມພັນ ແພງຄໍາມີ ຮອງປະທານສະພາແຫ່ງຊາດ, ຜູ້ຊີ້ນໍາວຽກງານກົດໝາຍ; ເຂົ້າຮ່ວມມີທ່ານປະທານກໍາມາທິການກົດໝາຍ ແລະ ປະທານກໍາມາທິການແຜນການ ການເງິນ ແລະ ການກວດສອບ, ທ່ານຮອງປະທານກໍາມາທິການ, ທ່ານຮອງລັດຖະມົນຕີກະຊວງການເງິນ; ຜູ້ຕາງໜ້າຈາກກົມກົດໝາຍຫ້ອງວ່າການປະທານປະເທດ, ກົມນິຕິກໍາຫ້ອງວ່າການສໍານັກງານນາຍົກລັດຖະ ມົນຕີ, ກົມກົດໝາຍກະຊວງຍຸຕິທໍາ, ຄະນະກໍາມະການຄຸ້ມຄອງຕະຫລາດຫລັກຊັບ, ຫົວໜ້າ-ຮອງຫົວໜ້າກົມ, ລັດຖະກອນວິຊາການທີ່ກ່ຽວຂ້ອງຂອງສະພາແຫ່ງຊາດ, ກະຊວງການເງິນ ແລະ ພະນັກງານບໍານານ.

ກອງປະຊຸມຮຽບຮຽງຄັ້ງນີ້ ແມ່ນການນໍາເອົາຄໍາເຫັນຂອງບັນດາທ່ານສະມາຊິກສະພາແຫ່ງຊາດ ທີ່ມີຕໍ່ກົດ  ໝາຍ 2 ສະບັບດັ່ງກ່າວ ໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ VIII ມາຄົ້ນຄວ້າ, ພິຈາລະນາ ປັບປຸງຮຽບຮຽງໃສ່ກົດໝາຍທັງ 2 ສະບັບ ໃຫ້ມີເນື້ອໃນຄົບຖ້ວນ, ຈະແຈ້ງ ແລະ ຮັດກຸມ ກ່ອນຈະນໍາເຂົ້າລາຍງານຕໍ່ກອງປະຊຸມຄະນະປະຈໍາສະພາແຫ່ງຊາດ ໃນເດືອນສິງຫາ. ຈາກນັ້ນ, ຈຶ່ງສະເໜີໃຫ້ປະທານສະພາແຫ່ງຊາດລົງນາມ ແລ້ວໃຫ້ປະທານປະເທດ ພິຈາລະນາອອກລັດຖະດໍາລັດປະກາດໃຊ້.

(ກົມໂຄສະນາ ແລະ ຕີຄວາມໝາຍກົດໝາຍ)