27/08/2018 00:00 -

(ສພຊ) ວັນ​ທີ 21 ສິງຫາ 2018 ທີ່​ຫ້ອງ​ຮັບ​ແຂກ​ສະພາ​ແຫ່ງ​ຊາດ ທ່ານ ​ເອກ​ສະຫວ່າງ ວົງ​ວິຈິດ ປະທານ​ກຳມາ​ທິການ​ການ​ຕ່າງປະ​ເທດ ​ໄດ້​ຕ້ອນຮັບ​ການ​​​ເຂົ້າ​ຢ້ຽມຂໍ່ານັບ​ອຳ​ລາ​ຂອງ​ທ່ານ ນາງ ​ໂກ​ດິນ ​ເລີ​ກູ ​ເອກ​ອັກຄະ​ລັດຖະທູດ ​ແຫ່ງ​ສາທາລະນະ​ລັດ​ຝຣັ່ງ ປະຈຳ ສປປລາວ ​ໃນ​ໂອ​ກາດ​ທີ່​ຈະສຳ​ເລັດ​ຫນ້າ​ທີ່​ການ​ທູດ​ຢູ່ ສປປລາວ ​ໃນ​ວັນ​ທີ 31 ສິງຫາ​ທີ່​ຈະ​ມາ​ເຖິງ​ນີ້.

        ​ໂອກາດ​ດັ່ງກ່າວ, ທ່ານ ນາງ ​ໂກ​ດິນ ​ເລີ​ກູ ​ໄດ້​ສະ​ແດງ​ຄວາມ​ຂອບ​ໃຈຕໍ່​ການ​ຕ້ອນຮັບ​ອັນ​ອົບ​ອຸ່ນ​ ​ແລະ ລາຍ​ງານວ່າ​ທ່ານ​ຈະ​ສຳ​ເລັດ​ຫນ້າ​ທີ່​ການ​ທູດ​ຢູ່ ສປປລາວ ​ໃນ​ທ້າຍ​ເດືອນ​ສິງຫາ​ນີ້; ພ້ອມ​ທັງ​ສະ​ແດງ​ຄວາມ​ຂອບ​ໃຈ​ຕໍ່ການ​ສະຫນັບສະຫນູນ​ໃນ​ໄລຍະ​ທີ່​ປະຕິບັດ​ຫນ້າ​ທີ່ຢູ່ ສປປລາວ ​ເຊິ່ງສະພາ​ແຫ່ງ​ຊາດ​ກໍ​ໄດ້​ປະກອບສ່ວນ ​ແລະ ​ໃຫ້ການ​ຮ່ວມ​ມື​ເປັນ​ຢ່າງ​ດີ ​ໃນ​ຂົງ​ເຂດ​ຫນ້າ​ທີ່​ຂອງ​ຕົນ ​ເຊິ່ງ​ເປັນ​ສິ່ງ​ທີ່​ສະ​ແດງ​ເຖິງ​ສາຍ​ພົວພັນ​ການ​ຮ່ວມ​ມື​ສະຫນິດ​ແຫນ້ນ​ລະ​ຫວ່າງສອງ​ປະ​ເທດ ​ໂດຍ​ສະ​ເພາະ​ໃນ​ຂົງ​ເຂດ​ລັດຖະສະພາ.​

        ທ່ານ ​ເອກ​ສະຫວ່າງ ວົງ​ວິຈິ​ດ ​​ໄດ້​ສະ​ແດງ​ຄວາມ​ຂອບ​ໃຈ​ ​ແລະ ຍ້ອງຍໍ​ຊົມ​ເຊີຍຕໍ່​ການ​ປະຕິບັດ​ຫນ້າ​ທີ່​ການ​ທູ​ດຢູ່ ສປປລາວ ຂອງ​ທ່ານ​ເອກ​ອັກຄະ​ລັດຖະທູດ ​ເຊິ່ງ​ເປັນ​ຫນ້າ​ທີ່​ອັນ​ໃຫຍ່​ຫລວງ​​​ໃນ​ນາມ​ເປັນ​ຜູ້​ຕາງຫນ້າ​ໃຫ້​ແກ່​ລັດຖະບານ​ຝຣັ່ງ​ ໃນ​ການ​ພົວພັນ​ຮ່ວມ​ມື​ກັນ​ລະຫວ່າງ​ສອງ​ປະ​ເທດລາວ-ຝຣັ່ງ, ຝຣັ່ງ-ລາວ; ພ້ອມ​ນັ້ນ, ຍັງ​ສະ​ເໜີ​ໃຫ້​ມີ​ການ​ແລກປ່ຽນການ​ຢ້ຽມຢາມ​ຜູ້​ແທນ​ລະດັບ​ຕ່າງໆ ​ແລະ ​ແລກປ່ຽນຂໍ້​ມູນ​ຂ່າວສານ​ນຳ​ກັນ​ຕື່ມ​ອີກ.

(ນາງ ອາ​ລິນ ສຸ​ພິມ​ມະ​ປະດິດ)