ຮອງປະທານ ກຜງສ ເຜີຍແຜ່ຜົນສຳເລັດກອງປະຊຸມສະໄໝສາມັນ ຢູ່ແຂວງຫົວພັນ

27/08/2018 00:00 -

(ສພຊ) ລະຫວ່າງວັນທີ 3-9 ສິງຫາ 2018, ທ່ານ ທັນຕາ ກອງຜາລີ ຮອງປະທານກຳມາທິການແຜນການ ການເງິນ ແລະ ການກວດສອບ (ກຜງສ) ສະພາແຫ່ງຊາດ, ທັງເປັນສະມາຊິກສະພາແຫ່ງຊາດປະຈຳເຂດເລືອກຕັ້ງທີ 8 ແຂວງຫົວພັນ ໄດ້ເຄື່ອນໄຫວເຜີຍແຜ່ ຜົນສຳເລັດຂອງກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ VIII ຢູ່ 3 ເມືອງ ຂອງແຂວງຫົວພັນ ຄື: ເມືອງຫົວເມືອງ, ເມືອງຮ້ຽມ ແລະ ເມືອງຊ່ອນ, ລວມທັງໝົດ 7 ຈຸດ, ມີຜູ້ເຂົ້າຮ່ວມຮັບຟັງ 1.036 ຄົນ, ຍິງ 432 ຄົນ.

ການລົງເຄື່ອນໄຫວເຜີຍແຜ່ຄັ້ງນີ້ ເພື່ອເຮັດໃຫ້ພະນັກງານ, ທະຫານ, ຕໍາຫລວດ, ນັກຮຽນນັກສຶກສາ ຕະຫລອດຮອດພໍ່ແມ່ປະຊາຊົນບັນດາເຜົ່າພາຍໃນສາມເມືອງດັ່ງກ່າວໄດ້ຮັບຮູ້ ແລະ ເຂົ້າໃຈຕໍ່ກັບບັນດາເນື້ອໃນຜົນສຳເລັດໃນການດຳເນີນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ VIII ເປັນຕົ້ນບັນດາມະຕິທີ່ໄດ້ຮັບຮອງເອົາຢູ່ໃນກອງປະຊຸມດັ່ງກ່າວ.   ຈາກນັ້ນ ທ່ານຍັງໄດ້ໂອ້ລົມ ແລະ ໃຫ້ທິດເຍືອງທາງໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມຂອງລັດຖະບານ, ຂອງແຂວງ ກໍຄືຂອງເມືອງ ແລະ ບັນດາກຸ່ມບ້ານໃຫ້ບັນລຸຕາມເປົ້າໝາຍທີ່ວາງໄວ້ ພ້ອມກັນນີ້, ກໍຕ້ອງໄດ້ເອົາໃຈໃສ່ປະກອບສ່ວນ ໃນການປົກປັກຮັກສາ ແລະ ສ້າງສາພັດທະນາປະເທດຊາດ ເວົ້າລວມ, ເວົ້າສະເພາະ ແຂວງຫົວພັນ ໃຫ້ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບເປັນລະບຽບຮຽບຮ້ອຍ, ເສດຖະກິດມີການຂະຫຍາຍຕົວ, ບັນລຸຕາມໂຕເລກຄາດໝາຍທີ່ວາງໄວ້ ເພື່ອເຮັດໃຫ້ ຊີວິການເປັນຢູ່ຂອງພໍ່ແມ່ປະຊາຊົນດີຂຶ້ນ, ກ້າວໄປເຖິງການລົບລ້າງຄວາມທຸກຍາກຂອງປະຊົນ ຢ່າງແນ່ນອນ.

        ໃນຕອນທ້າຍ, ທ່ານ ທັນຕາ ກອງຜາລີ ຍັງໄດ້ນຳເອົາເງິນສົດຈຳນວນ 3,6 ລ້ານກີບ ມອບໃຫ້ສອງພາກສ່ວນຄື: ແນວລາວສ້າງຊາດ ແລະ ສະຫະພັນນັກຮົບເກົ່າ ທັງສາມເມືອງ ໃນຈຳນວນ 7 ຈຸດທີ່ເຄື່ອນໄຫວ. ຈາກນັ້ນ ຍັງໄດ້ຮັບເອົາຄໍາຄິດຄໍາເຫັນ ແລະ ຄວາມຂັດຂ້ອງໝອງໃຈຫລາຍບັນຫາຈາກພໍ່ແມ່ປະຊາຊົນນຳໄປຄົ້ນຄວ້າ ແລະ ພິຈາລະນາ ເພື່ອຊອກຫາທາງອອກໃຫ້ປະຊາຊົນໃນຕໍ່ໜ້າ.