ກຳມາທິການກົດໝາຍ ຈັດກອງປະຊຸມໂຄສະນາເຜີຍແຜ່ກົດໝາຍໃຫ້ລັດຖະກອນວິຊາການຂອງສະພາແຫ່ງຊາດ

04/09/2018 00:00 -

(ສພຊ) ໃນວັນທີ 24 ສິງຫາ 2018 ຜ່ານມາ ທີ່ຫ້ອງປະຊຸມຄະນະເລຂາທິການ ສະພາແຫ່ງຊາດ (ສພຊ) ຫລັກ 6 ນະຄອນຫລວງວຽງຈັນ, ກໍາມາທິການກົດໝາຍ (ກກໝ) ໄດ້ຈັດກອງປະຊຸມໂຄສະນາເຜີຍແຜ່ກົດໝາຍໃຫ້ລັດຖະກອນວິຊາການ ຂອງ ສພຊ ໂດຍການເປັນປະທານຂອງທ່ານ ສາຍທອງ ແກ້ວດວງດີ ປະທານ ກກໝ; ມີບັນດາທ່ານຮອງປະທານກໍາມາທິການກົດໝາຍ, ຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ແລະ ລັດຖະກອນວິຊາການຈາກບັນດາກົມ, ສູນ ພາຍໃນສະພາແຫ່ງຊາດ ເຂົ້າຮ່ວມ.

ທັງນີ້ ກໍເພື່ອເປັນການຍົກລະດັບຄວາມຮູ້, ຄວາມສາມາດ ໃຫ້ແກ່ລັດຖະກອນ ວິຊາການຂອງ ສພຊ ກ່ຽວກັບໝາຍທີ່ຕິດພັນກັບການປະຕິບັດໜ້າທີ່ວຽກງານ ຂອງສະພາແຫ່ງຊາດ ກໍຄືລັດຖະກອນ ຢູ່ໃນຄວາມຮັບຜິດຊອບຂອງສະພາແຫ່ງຊາດ ເພື່ອແນໃສ່ເຮັດລັດຖະກອນມີສະຕິເຄົາລົບກົດໝາຍ ປະກອບສ່ວນໃຫ້ສັງຄົມມີຄວາມສະ ຫງົບ ແລະ ຫລຸດຜ່ອນການລະເມີດກົດໝາຍ.

ກອງປະຊຸມ ໄດ້ຮັບຟັງການເຜີຍແຜ່ກົດໝາຍວ່າດ້ວຍພະນັກງານ-ລັດຖະກອນ, ກົດໝາຍວ່າດ້ວຍສະພາແຫ່ງຊາດ, ກົດໝາຍວ່າດ້ວຍສະພາປະຊາຊົນຂັ້ນແຂວງ, ກົດໝາຍວ່າດ້ວຍການແກ້ໄຂຄໍາຮ້ອງທຸກ ແລະ ກົດໝາຍວ່າດ້ວຍການຕິດຕາມກວດກາ ຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຈາກບັນດານັກວິທະຍາກອນ ຂອງກໍາມາທິການກົດໝາຍ ຫລັງຈາກນັ້ນບັນດານັກສໍາມະນາກອນ ແລະ ນັກວິທະຍາກອນກໍໄດ້ສົນທະນາຖາມ-ຕອບຂໍ້ຂອງໃຈທີ່ຕົນເອງໃຫ້ຄວາມສົນໃຈ.

ໂອກາດດັ່ງກ່າວ, ທ່ານ ສາຍທອງ ແກ້ວດວງດີ ໄດ້ກ່າວສະແດງຄວາມຊົມເຊີຍທຸກພາກສ່ວນ ທີ່ໄດ້ໃຫ້ການຮ່ວມມືໃນການກະກຽມ ແລະ ອໍານວຍຄວາມສະດວກໃນດ້ານຕ່າງໆ ເຮັດໃຫ້ກອງປະຊຸມໃນຄັ້ງນີ້ ສາມາດໄຂຂຶ້ນໄດ້ຕາມແຜນການທີ່ວາງໄວ້ ແລະ ຊົມເຊີຍບັນດາແຂກທີ່ມີກຽດ ແລະ ລັດຖະກອນທຸກໆທ່ານທີ່ໄດ້ໃຫ້ຄວາມສໍາຄັນ ໃນການເຂົ້າຮ່ວມກອງປະຊຸມ ຢ່າງພ້ອມພຽງ ເນື່ອງຈາກວ່າເວລາດໍາາເນີນກອງປະຊຸມຄັ້ງນີ້ ດໍາເນີນເປັນເວລາພຽງແຕ່ໜຶ່ງວັນ ເພື່ອເຮັດໃຫ້ກອງປະຊຸມໃນຄັ້ງນີ້ ໄດ້ຮັບຜົນສໍາເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້ ຈົ່ງເຊີດຊູຄວາມຮັບຜິດຊອບເປັນເຈົ້າການ ຮັບຟັງການບັນຍາຍເນື້ອໃນກົດໝາຍ ຈໍານວນ 4 ສະບັບຄື ກົດໝາຍວ່າດ້ວຍສະພາແຫ່ງຊາດ, ກົດໝາຍວ່າດ້ວຍສະພາປະຊາຊົນຂັ້ນແຂວງ, ກົດໝາຍວ່າດ້ວຍການແກ້ໄຂຄໍາຮ້ອງທຸກ ແລະ ກົດມາຍວ່າດ້ວຍພະນັກງານ-ລັດຖະກອນ ໂດຍຕິດພັນກັບການຄົ້ນຄວ້າ ເພື່ອປະກອບຄໍາເຫັນ ແລກປ່ຽນຄວາມເຂົ້າໃຈ ເຊິ່ງກັນ ແລະ ກັນ ຢ່າງເລິກເຊິ່ງ.

 

(ສອນສັກ ວັນວິໄຊ)