ປະທານກຳມາທິການບັນດາເຜົ່າ ເຄື່ອນໄຫວເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 5

04/09/2018 00:00 -

(ສພຊ) ເພື່ອເຮັດໃຫ້ພະນັກງານ-ລັດຖະກອນ, ທະຫານ, ຕໍາຫລວດ, ອໍານາດການປົກຄອງບ້ານ ຕະຫລອດຮອດພໍ່ແມ່ປະຊາຊົນ ໄດ້ມີຄວາມຮັບຮູ້, ເຂົ້າໃຈຕໍ່ແນວທາງແຜນນະໂຍບາຍຂອງພັກເວົ້າລວມ,​ ເວົ້າສະເພາະວຽກງານຂອງສະພາແຫ່ງຊາດ ແລະ ສະພາປະຊາຊົນແຂວງ, ທັງເປັນການເກັບກໍາສະພາບການ, ຄໍາຄິດຄໍາເຫັນຂອງປະຊາຊົນ, ຄໍາສະເໜີຕ່າງໆ ຂອງປະຊາຊົນໃນເຂດເລືອກຕັ້ງ ຕໍ່ການປົກປັກຮັກສາ ແລະ ສ້າງສາພັດທະນາປະເທດຊາດ, ວັນທີ 20 ສິງຫາ 2018 ຜ່ານມາ ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 7 ແຂວງໄຊຍະບູລີ ນໍາໂດຍທ່ານ ນາງ ບົວພັນ ລີໄກຢາ ກໍາມະການຄະນະປະຈໍາ, ປະທານກໍາມາທິການບັນດາເຜົ່າ ສະພາແຫ່ງຊາດ; ທ່ານ ນາງອິດມະນີ ຈັນທະຄູນ ຮອງປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ; ທ່ານ ບຸນໄທ ສີເທບ  ສະມາຊິກສະພາແຫ່ງຊາດ ພ້ອມດ້ວຍສະມາຊິກສະພາປະຊາຊົນແຂວງປະຈໍາເມືອງຄອບ ໄດ້ລົງເຄື່ອນໄຫວເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ VIII ແລະ ຜົນສໍາເລັດກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງ ຊຸດທີ I ຢູ່ ເມືອງຄອບ ລວມ 4 ຈຸດ, ໃນນັ້ນ 1 ຈຸດສໍານັກງານ-ອົງການອ້ອມຂ້າງເມືອງ ແລະ ບ້ານ 3 ຈຸດ ມີຜູ້ເຂົ້າຮ່ວມຮັບຟັງ 800 ກວ່າຄົນ.

          ການລົງເຜີຍແຜ່ຜົນສໍາເລັດກອງປະຊຸມສະໄໝສາມັນໃນເທື່ອນີ້ ບັນດາທ່ານສະມາຊິກສະພາແຫ່ງຊາດ ກໍຄືສະມາຊິກສະພາປະຊາຊົນແຂວງ ໄດ້ຍົກໃຫ້ເຫັນສະພາບໄພທໍາມະຊາດທີ່ເກີດຂຶ້ນຢູ່ພາກພື້ນ ກໍຄືຢູ່ພາຍໃນປະເທດ ຂອງພວກເຮົາ ພ້ອມທັງຍົກໃຫ້ເຫັນລະບົບກົງຈັກການຈັດຕັ້ງ, ພາລະບົດບາດ ສິດ ແລະ ໜ້າທີ່ຂອງສະພາແຫ່ງຊາດ ກໍຄືສະພາປະຊາຊົນຂັ້ນແຂວງ  ຈາກນັ້ນ, ໄດ້ຍົກໃຫ້ເຫັນເນື້ອໃນສໍາຄັນທີ່ກອງປະຊຸມໄດ້ຄົ້ນຄວ້າພິຈາລະນາ ແລະ ຮັບຮອງເອົາ ເປັນຕົ້ນແມ່ນມະຕິຂອງກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານ ຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ  ປະຈໍາປີ 4 ເດືອນຜ່ານມາ, ຄາດຄະເນການປະຕິບັດແຜນ 6 ເດືອນຕົ້ນປີ ແລະ ທິດທາງວຽກງານຈຸດສຸມ 6 ເດືອນທ້າຍປີ 2018 ຂອງລັດຖະບານ; ມະຕິວ່າດ້ວຍການຮັບຮອງເອົາການຊີ້ແຈງຂອງລັດຖະບານຕໍ່ກັບການຊັກຖາມຂອງສະມາຊິກ ສະພາແຫ່ງຊາດ; ມະຕິກອງປະຊຸມສະພາແຫ່ງຊາດວ່າດ້ວຍການຮັບຮອງເອົາແຜນແມ່ບົດຈັດສັນທີ່ດິນແຫ່ງຊາດ ຮອດປີ 2030; ມະຕິກອງປະຊຸມສະພາແຫ່ງຊາດວ່າດ້ວຍການຮັບຮອງເອົາການແຕ່ງຕັ້ງສະມາຊິກສະພາຜູ້ພິພາກສາ ຂອງສານປະຊາຊົນສູງສຸດ; ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາບົດລາຍງານ ຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ຂັ້ນແຂວງ  ປະຈໍາ 6 ເດືອນຕົ້ນປີ ແລະ ທິດທາງວຽກງານຈຸດສຸມ 6 ເດືອນທ້າຍປີ 2018 ແລະ ມະຕິກອງປະຊຸມສະພາປະຊາຊົນແຂວງວ່າດ້ວຍການຮັບຮອງເອົາບົດລາຍງານຂອງພະແນກຍຸຕິທໍາແຂວງ ກ່ຽວກັບການຈັດຕັ້ງຜັນຂະຫຍາຍກົດໝາຍເປັນນິຕິກໍາໃຕ້ກົດໝາຍ ແລະ ການແກ້ໄຂບັນຫາຢາເສບຕິດ ແລະ ອຸບັດເຫດທາງທ້ອງຖະໜົນ ຂອງກອງບັນຊາການປ້ອງກັນຄວາມສະຫງົບແຂວງ.  ນອກຈາກນີ້ ບັນດາທ່ານ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ຍັງໄດ້ເຜີຍແຜ່ບາງມາດຕາຂອງກົດໝາຍວ່າດ້ວຍ ຄອບຄົວ; ວຽກງານບົດບາດຍິງ-ຊາຍ ພ້ອມທັງເນັ້ນໃຫ້ທຸກຄົນ ຈົ່ງຮັກສາໄດ້ຄວາມສາມັກຄີເປັນປຶກແຜ່ນ, ບຸກບືນສ້າງເສດຖະກິດຄອບຄົວ ເອົາໃຈໃສ່ໃນການປູກ-ການລ້ຽງ ທີ່ເປັນມູນເຊື້ອ ໃຫ້ກາຍເປັນສິນຄ້າ ເພື່ອໃຫ້ຄອບຄົວຫລຸດພົ້ນອອກຈາກຄວາມທຸກຍາກເທື່ອລະກ້າວ.

ຈາກນັ້ນ, ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ຍັງໄດ້ລົງຕິດຕາມກວດກາ ບັນດາໂຄງການກໍ່ສ້າງພື້ນຖານໂຄງລ່າງທີ່ພວມຈັດຕັ້ງປະຕິບັດຢູ່ພາຍໃນເມືອງ. ໂອກາດດຽວກັນທ່ານ ນາງ ບົວພັນ ລີໄກຢາ ໄດ້ນໍາເອົາເຄື່ອງນຸ່ງຫົ່ມຈໍານວນໜຶ່ງ ລວມມູນຄ່າ 1 ລ້ານກວ່າກີບ ມອບໃຫ້ປະຊາຊົນບ້ານຫາດງາມ ເມືອງຄອບ.

 

(ນີ່ຕູ່ ປະສິດທິພົງ)