ຜົນການຢ້ຽມຢາມ ສປ.ຈີນ ຂອງກຳມາທິການການຕ່າງປະເທດ

05/09/2018 00:00 -

(ສພຊ) ໃນລະຫວ່າງວັນທີ 26-31 ສິງຫາ 2018, ຄະນະຜູ້ແທນກໍາມາທິການ ການຕ່າງປະເທດຂອງສະພາແຫ່ງຊາດ ແຫ່ງ ສປປ.ລາວ ນໍາໂດຍ ສະຫາຍ ເອກສະຫວ່າງ ວົງວິຈິດ, ກຳມະການສູນກາງພັກ, ປະທານກຳມາທິການການຕ່າງປະເທດ ໄດ້ເດີນທາງໄປຢ້ຽມຢາມ ແລະ ເຮັດວຽກ ທີ່ ສປຈີນ ຕາມການເຊີນ ຂອງກຳມາທິການການຕ່າງປະເທດ ຂອງ ສະພາຜູ້ແທນປະຊາຊົນທົ່ວປະເທດຈີນ.

ຈຸດປະສົງຂອງການຢ້ຽມຢາມຄັ້ງນີ້ ແມ່ນເພື່ອສືບຕໍ່ຮັດແໜ້ນສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີ ແລະ ການພົວພັນຮ່ວມມືແບບຄູ່ຮ່ວມຍຸດທະສາດ ຮ້ອບດ້ານ ໝັ້ນຄົງ ຍາວນານ ຕາມທິດ 4 ດີ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ຈີນ, ແນໃສ່ ເຮັດໃຫ້ການພົວພັນ ແລະ ຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາຜູ້ແທນປະຊາຊົນທົ່ວປະເທດຈີນ ແຕກດອກອອກຜົນ ແລະ ມີບາດກ້າວໃໝ່ ທັງເປັນການຈັດຕັ້ງຜັນຂະຫຍາຍຄຳຕົກລົງຂອງຜູ້ນຳສູງສຸດຂອງສອງປະເທດ ໂດຍສະເພາະແມ່ນ ຜົນການພົບປະລະຫວ່າງ ສະຫາຍ ບຸນຍັງ ວໍລະຈີດ, ເລຂາທິການໃຫຍ່ຂອງພັກປະຊາຊົນປະຕິວັດລາວ, ປະທານປະເທດ ແຫ່ງ ສປປລາວ ແລະ ສະຫາຍ ສີ ຈິນຜີ່ງ, ເລຂາທິການໃຫຍ່ ຄະນະບໍລິຫານງານສູນກາງ ພັກຄອມມຸຍນິດຈີນ, ປະທານປະເທດ ແຫ່ງ ສປຈີນ ຄັ້ງວັນທີ 13 ພະຈິກ 2017 ທີ່ນະຄອນຫລວງວຽງຈັນ, ທີ່ວ່າ ຕ້ອງສືບຕໍ່ລົງເລີກການພົວພັນຮ່ວມມື ລະຫວ່າງ ສະພາແຫ່ງຊາດລາວ ແລະ ສະພາປະຊາຊົນທົ່ວປະເທດຈີນ,  ແລະ ການພົບປະລະຫວ່າງ ສະຫາຍ ນາງ ປານີ ຢາທໍ່ຕູ້, ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງ ສປປ.ລາວ ແລະ ສະຫາຍ ສີ ຈິນ ຜີ່ງ, ເລຂາທິການໃຫຍ່ຄະນະບໍລິຫານງານສູນກາງພັກຄອມມຸຍນິດຈີນ, ປະທານປະເທດ ແຫ່ງ ສປຈີນ.

ໃນການຢ້ຽມຢາມຄັ້ງນີ້, ສະຫາຍ ເອກສະຫວ່າງ ວົງວີຈິດ ໄດ້ພົບປະແລກປ່ຽນກັບ ສະຫາຍ ໄອ້ລີ້ເກີງ ຢີໝີງປ່າໄຫ, ຮອງປະທານຄະນະປະຈຳສະພາປະຊາຊົນທົ່ວປະເທດຈີນ ແລະ ເຮັດວຽກກັບສະຫາຍ ຈາງ ຈື້ ຈູນ, ຮອງປະທານກໍາມາທິການຕ່າງປະເທດ, ສະພາປະຊາຊົນທົ່ວປະເທດຈີນ ຢູ່ທີ່ຫໍສະພາແຫ່ງຊາດຈີນ. ສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືລະຫວ່າງສອງສະພາແຫ່ງຊາດ ໃນໄລຍະ ທີ່ຜ່ານມາ, ໄດ້ຜັດປ່ຽນກັນແຈ້ງສະພາບການທີ່ພົ້ນເດັ່ນຢູ່ພາຍໃນປະເທດຕົນໃຫ້ກັນຊາບ, ແລກປ່ຽນຄໍາຄິດ ຄໍາເຫັນກ່ຽວກັບ ບົດຮຽນໃນການຈັດຕັ້ງປະຕິບັດ  03 ພາລະບົດບາດຂອງສະພາແຫ່ງຊາດລາວ ແລະ ສະພາ ປະຊາຊົນທົ່ວປະເທດຈີນ, ການພົວພັນແລະຮ່ວມມືໃນເວທີລັດຖະສະພາພາກພື້ນ ແລະ ສາກົນ,  ແລະ ໄດ້ປືກສາຫາລືເຖີງບັນຫາແຜນການຮ່ວມມືລະຫວ່າງ ສອງສະພາແຫ່ງຊາດໃນຕໍ່ໜ້າ.

 ການຢ້ຽມຢາມ ສປຈີນ ຄັ້ງນີ້ ເປັນການຢ້ຽມຢາມທາງການຄັ້ງທໍາອີດຂອງກຳມາທິການການຕ່າງປະເທດ ຂອງ ສະພາແຫ່ງຊາດລາວ ຊຸດທີ່ VIII, ສະນັ້ນ ຈື່ງຖືວ່າເປັນການປູທາງໃຫ້ແກ່ການລົງເລີກ ຮັດແໜ້ນສາຍພົວພັນມິດຕະພາບ ແລະ ການຮ່ວມມືຮອບດ້ານໃນຕໍ່ໜ້າ ລະຫວ່າງ ສະພາແຫ່ງຊາດລາວ ແລະ ສະພາປະຊາຊົນທົ່ວປະເທດຈີນ ໃນທຸກລະດັບ. ນອກນັ້ນ ຍັງໄດ້ມີການປືກສາຫາລື ເຖີງບັນຫາຄວາມອາດສາມາດ ການສ້າງຕັ້ງກົນໄກປະສານງານທີ່ມີລັກສະນະປະຈຳ ລະຫວ່າງ ສອງສະພາແຫ່ງຊາດ ເພື່ອເປັນບ່ອນອີງ ໃຫ້ແກ່ການຈັດຕັ້ງປະຕິບັດໃນຕໍ່ໜ້າ, ແນໃສ່ປະກອບສ່ວນ ເຂົ້າໃນການຮັດແໜ້ນສາຍພົວພັນມິດຕະພາບ ທີ່ເປັນມູນເຊື້ອ ແລະ ການພົວພັນ​ແບບຄູ່ຮ່ວມ​ຍຸດ​ທະ​ສາດຮອບດ້ານ ຫນັ້ນ​ຄົງ​ ຍາວນານ ຕາມທິດບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ເວົ້າລວມ, ເວົ້າສະເພາະ ແມ່ນລະຫວ່າງ ສອງສະພາແຫ່ງຊາດລາວ ແລະ ຈີນ ໃຫ້ມີບາດກ້າວໃໝ່.

ພາຍຫລັງການຢ້ຽມຢາມ ແລະ ເຮັດວຽກ ຢູ່ ປັກກິ່ງ, ສະຫາຍ ເອກສະຫວ່າງ ວົງວິຈິດ ໄດ້ນໍາພາຄະນະ ໄປຢ້ຽມຢາມ ແຂວງເຫີເປີຍ ແລະ ໄດ້ພົບປະແລກປ່ຽນກັບ ສະຫາຍ ຟານ ຈາວບີ່ງ, ເລຂາພັກແຂວງ, ຮອງປະທານຜູ້ບໍລິຫານສະພາປະຊາຊົນແຂວງເຫີເປີຍ, ຊື່ງສະຫາຍໄດ້ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມືທີ່ດີກັບ ສປປລາວ ແລະ ໄດ້ແຈ້ງໃຫ້ຊາບວ່າ ມີກຸ່ມບໍລິສັດກໍ່ສ້າງ ແລະ ລົງທືນເຫີເປີຍ ຈຳກັດ ໄດ້ມາລົງທືນຢູ່ ສປປລາວ ມີມູນຄ່າເຖີງ 1,5 ຕື້ຢວນ. ໃນໂອກາດດັ່ງກ່າວ ສະຫາຍປະທານກໍາມາທິການຕ່າງປະເທດ  ໄດ້ສະເໜີໃຫ້ບັນດາສະຫາຍຜູ້ແທນສະພາປະຊາຊົນແຂວງເຫີເປີຍ ລະດົມນັກທູລະກິດຂອງແຂວງມາຢ້ຽມຢາມ ແລະ ລົງທືນຢູ່ ສປປລາວ ໃຫ້ຫລາຍຂື້ນກວ່າເກົ່າ. ໃນການຢ້ຽມຢາມ ແລະ ທັດສະນະສຶກສາຢູ່ແຂວງເຫີເປີຍ, ຄະນະຜູ້ແທນສະພາແຫ່ງຊາດລາວ ຍັງໄດ້ໄປຢ້ຽມຢາມ ເຂດພັດທະນາໃຫມ່ "ໂຊງອ່ານ" ຊື່ງເຂດດັ່ງກ່າວ ຈະສ້າງໃຫ້ກາຍເປັນນະຄອນທີ່ທັນສະໄໝຂອງສັດຕະວັດທີ 21 ຕາມການຊີ້ນຳຂອງ ທ່ານປະທານ ສີ ຈີນ ຜີ່ງ, ຊື່ງນະຄອນດັ່ງກ່າວ ຈະກາຍເປັນນະຄະຄອນທີ່ມີນະວັດຕະກຳໃໝ່ອັນທັນສະໄໝ ແລະ ຮອບດ້ານ, ໂດຍຖືເອົາການພັດທະນາດ້ານການເມືອງ, ເສດຖະກິດ ແລະ ວັດທະນາທຳ ຕາມທິດພັດທະນາສີຂຽວ ເພື່ອປັບປຸງສິ່ງແວດລ້ອມທຳມະຊາດ ໃຫ້ຢູ່ຄຽງຄູ່ກັບການດຳລົງຊີວິດຂອງຄົນໄດ້ຢ່າງກົ່ມກຽວ. ສຸດທ້າຍ, ຄະນະ ຍັງໄດ້ໄປຢ້ຽມຢາມ ແລະ ທັດສະນະສຶກສາ ບ້ານ ລີເຈ່ຍຈວງ ເມືອງ ພິງສານ ແຂວງ ເຫີເປີຍ ຊື່ງເປັນບ້ານ ພັດທະນາຊົນນະບົດໃໝ່ ແລະ ຍັງໄດ້ຢ້ຽມຢາມ ບ້ານ ລີປາຍໂປ ຊື່ງເປັນສະຖານທີ່ປະຫວັດສາດ, ເປັນສູນກາງບັນຊາການ ຂອງພັກຄອມມຸຍນິດຈີນ ໃນສະໄໝກ່ອນການສ້າງຕັ້ງ ສາທາລະນະລັດ ປະຊາຊົນຈີນ ໃນປີ 1949.

ການຢ້ຽມຢາມຂອງຄະນະຜູ້ແທນກຳມາທິການຕ່າງປະເທດຂອງສະພາແຫ່ງຊາດລາວ ທີ່ ສປຈີນ ໄດ້ດຳເນີນໄປ ເປັນເວລາ 4 ວັນ ຊຶ່ງໄດ້ຮັບການຕ້ອນຮັບຢ່າງສົມກຽດ ເຕັມໄປດ້ວຍບັນຍາກາດອັນອົບອຸ່ນ ຖານເພື່ອນມິດສະຫາຍທີ່ດີ, ໄດ້ສຳເລັດລົງດ້ວຍໝາກຜົນອັນຈົບງາມ ແລະ ບັນລຸໄດ້ຕາມແຜນການທີ່ວາງໄວ້.