ສະພາປະຊາຊົນນະຄອນໂຮ່ຈີມິນ ແລກປ່ຽນບົດຮຽນກັບ ສພຂ

24/09/2018 00:00 -

(ສພຊ) ກອງປະຊຸມສຳມະນາແລກປ່ຽນບົດຮຽນ ລະຫວ່າງສະພາປະຊາຊົນນະຄອນໂຮ່ຈີມິນ ແລະ ສະພາປະຊາຊົນບັນດາແຂວງພາກເໜືອ ແລະ ພາກກາງຂອງ ສປປລາວ ໄດ້ມີຂຶ້ນເມື່ອວັນທີ 17 ກັນຍາ 2018 ທີ່ສູນການຮ່ວມມືສາກົນ ແລະ ການເຝິກອົບຮົມສາກົນ (ICTC) ນະຄອນຫລວງວຽງຈັນ ໂດຍການເປັນປະທານຮ່ວມຂອງສະຫາຍ ຄຳເຜີຍ ປານມະໄລທອງ ຫົວໜ້າສະຖາບັນນິຕິກຳສະພາແຫ່ງຊາດ, ສະຫາຍ ອານຸພາບ ຕຸນາລົມ ປະທານວຽງສະພາປະຊາຊົນນະຄອນຫລວງວຽງຈັນ ແລະ ສະຫາຍ ນາງ ຫງວຽນ ທິ ກວຽດ ເຕິມ ປະທານສະພາປະຊາຊົນນະຄອນໂຮ່ຈີມິນ; ມີບັນດາສະຫາຍຄະນະຜູ້ແທນຈາກສະພາປະຊາຊົນນະຄອນໂຮ່ຈິມິນ, ພະນັກງານ-ລັດຖະກອນຈາກສະພາປະຊາຊົນຂັ້ນແຂວງ (ສພຂ) 8 ແຂວງພາກເໜືອ, 2 ແຂວງພາກກາງມີ: ວຽງຈັນ ແລະ ນະຄອນຫລວງວຽງຈັນ ພ້ອມດ້ວຍວິຊາການຈາກສະພາແຫ່ງຊາດເຂົ້າຮ່ວມ.

          ໃນວາລະກອງປະຊຸມ, ຄະນະປະທານທັງ 3 ທ່ານໄດ້ຜັດປ່ຽນກັນມີຄຳເຫັນຕໍ່ກອງປະຊຸມສຳມະນາດັ່ງກ່າວ ເຊິ່ງສະຫາຍ ຄຳເຜີຍ ປານມະໄລທອງ ໄດ້ມີຄຳເຫັນບາງຕອນວ່າ: ໂດຍສືບຕໍ່ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ໂດຍສະເພາະລະຫວ່າງສອງສະພາແຫ່ງຊາດລາວ-ຫວຽດນາມທີ່ໄດ້ລົງນາມໃນວັນທີ 6 ມີນາ 2017, ຄະນະຜູ້ແທນສະພາປະຊາຊົນນະຄອນໂຮ່ຈິມິນ ສສ.ຫວຽດນາມ ໄດ້ເດີນທາງມາຢ້ຽມຢາມ ແລະ ຈັດກອງປະຊຸມສໍາມະນາ ຮ່ວມກັບບັນດາສະຫາຍ ທີ່ເປັນເສນາທິການໃຫ້ສະພາປະຊາຊົນຂັ້ນແຂວງຂອງບັນດາ 9 ແຂວງ ແລະ ນະຄອນຫລວງວຽງຈັນ, ພະນັກງານ-ລັດຖະກອນຂອງກົງຈັກເສນາທິການຂອງສະພາແຫ່ງຊາດຂອງ ສປປລາວ.

ສະປະຊາຊົນຂັ້ນແຂວງຂອງ ສປປລາວ ໄດ້ຮັບການສ້າງຕັ້ງຂຶ້ນ ໃນກາງປີ 2016 ແລະ ເມື່ອໄດ້ຮັບການສ້າງຕັ້ງແລ້ວ  ສະພາປະຊາຊົນຂັ້ນແຂວງຂອງ ສປປລາວ ໄດ້ເອົາໃຈໃສ່ປະຕິບັດພາລະບົດບາດ, ສິດ ແລະ ໜ້າທີ່ ທີ່ໄດ້ກໍານົດໄວ້ໃນ ລັດຖະທໍາມະນູນ, ກົດໝາຍ ຊຶ່ງໄດ້ມີຜົນງານ ແລະ ຜົນສໍາເລັດຫລາຍດ້ານ  ແຕ່ເຖີງຢ່າງໃດກໍຕາມ ການປະຕິບັດໜ້າທີ່ໃນວຽກງານດັ່ງກ່າວ ຍັງມີບາງດ້ານບໍ່ທັນມີປະສິດທິພາບສູງ ເຊິ່ງຕ້ອງໄດ້ປັບປຸງ, ຕ້ອງຫັນປ່ຽນໃຫ້ດີຂື້ນຕື່ມອີກ. ພວກເຮົາຖືວ່າການສຳມະນາຄັ້ງນີ້ຈະເປັນໂອກາດດີອັນໜຶ່ງເພື່ອມີເປັນຂໍ້ມູນທາງທິດສະດີ ແລະ ພຶດຕິກໍາ ໃນການປັບປຸງວຽກງານຕົວຈິງ ຂອງພວກເຮົາໃນຕໍ່ໜ້າ.

ຈາກນັ້ນ, ກອງປະຊຸມໄດ້ຮັບຟັງການສະເໜີບົດຮຽນຂອງສະພາປະຊາຊົນນະຄອນໂຮ່ຈິມິນ ກ່ຽວກັບປະສົບການໃນການຄົ້ນຄວ້າ ແລະ ພິຈາລະນາຮັບຮອງເອົາແຜນງົບປະມານຂອງທ້ອງຖິ່ນ, ປະສົບການໃນການນໍາໃຊ້ຜົນຂອງການກວດສອບແຫ່ງລັດ ຂອງສະພາປະຊາຊົນນະຄອນໂຮ່ຈິມິນ, ປະສົບການໃນການຄົ້ນຄວ້າ ແລະ ຮັບຮອງເອົາຕົວເລກ GDP ແລະ ປະສົບການໃນການພິຈາລະນາຄົ້ນຄວ້າ ແລະ ຮັບຮອງເອົາແຜນພັດທະນາເສດຖະກິດ-ສັງຄົມຂອງ ນະຄອນໂຮ່ຈີມິນ; ພ້ອມນັ້ນ, ຜູ້ເຂົ້າຮ່ວມໄດ້ສຸມສະຕິປັນຍາຕິດຕາມຮັບຟັງການສະເໜີບົດຮຽນ ທັງແລກປ່ຽນຄວາມຄິດຄວາມເຫັນ ແລະ ແລກປ່ຽນຄຳຄິດຄຳເຫັນຢ່າງກົງໄປກົງມາ ສາມາດໄດ້ຮັບມາກຜົນສຳເລັດຕາມລະດັບຄາດໝາຍທີ່ວາງໄວ້.

ກອງປະຊຸມຄັ້ງນີ້ ເປັນການປະກອບສ່ວນສໍາຄັນຂອງຫວຽດນາມ ເພື່ອແບ່ງປັນຄວາມຮູ້ກ່ຽວກັບການເຄື່ອນໄຫວວຽກງານສະພາປະຊາຊົນທ້ອງຖິ່ນຂອງ ສສ.ຫວຽດນາມ ເຊິ່ງປະກອບສ່ວນທາງດ້ານເນື້ອໃນ, ວິທະຍາກອນ, ດ້ານງົບປະມານ ແລະ ອື່ນໆ ແກ່ການດໍາເນີນກອງປະຊຸມຄັ້ງນີ້ ແລະ ການສຳມະນາດັ່ງກ່າວ ຍັງຈະສືບຕໍ່ຈັດຂຶ້ນຢູ່ແຂວງຈຳປາສັກ ໃນມໍ່ໆນີ້.

ກ່ອນໜ້ານີ້, ລະຫວ່າງວັນທີ 15-16 ກັນຍາຜ່ານມາ, ຄະນະຜູ້ແທນສະພາປະຊາຊົນນະຄອນໂຮ່ຈີມິນ ນຳໂດຍສະຫາຍ ນາງ ສະຫາຍ ນາງ ຫງວຽນ ທິ ກວຽດ ໄດ້ເດີນທາງໄປຢ້ຽມຢາມ ແລະ ເຮັດວຽກທີ່ແຂວງຊຽງຂວາງ ໂດຍມີສະຫາຍ ສຸບັນ ສະວະບຸດ ຮອງເລຂາທິການສະພາແຫ່ງຊາດລາວ ພ້ອມດ້ວຍຄະນະຊ່ວຍວຽກ ຮ່ວມຕິດຕາມ ແລະ ເຄື່ອນໄຫວໃນຄັ້ງນີ້ ເຊິ່ງໄດ້ຮັບການຕ້ອນຮັບຈາກທ່ານ ນາງ ພົມມາ ສິທິວົງສອນ ຮອງປະທານ ສພຂ ຊຽງຂວາງ ພ້ອມດ້ວຍຄະນະ ສພຂ ເຂົ້າຮ່ວມ.

          ໃນການເຄື່ອນໄຫວຄັ້ງນີ້, ຄະນະໄດ້ເຂົ້າຢ້ຽມຂ່ຳນັບສະຫາຍ ບຸນຕົ້ນ ຈັນທະພອນ ເຈົ້າແຂວງໆຊຽງຂວາງ ເຊິ່ງທັງສອງຝ່າຍໄດ້ແຈ້ງໃຫ້ກັນ ແລະ ກັນຊາບກ່ຽວກັບສະພາບການເມືອງ ແລະ ເສດຖະກິດ-ສັງຄົມໂດຍຫຍໍ້ຂອງຕົນ; ພ້ອມນັ້ນ, ຍັງໄດ້ເຮັດວຽກຮ່ວມກັບ ສພຂ ຊຽງຂວາງ ແລະ ມອບເຄື່;ອງຊ່ວຍເຫລືອຈໍານວນໜຶ່ງໃຫ້ຄອບຄົວທີ່ທຸກຍາກຂອງແຂວງຊຽງຂວາງ ເປັນເງິນສົດ 300 ລ້ານດົງ ທັງຢ້ຽມຢາມພື້ນຖານທາງດ້ານເສດຖະກິດ ແລະ ວັດທະນະທຳຂອງແຂວງດັ່ງກ່າວຈຳນວນໜຶ່ງ.