10/10/2018 00:00 -

      ລະຫວ່າງວັນທີ 02-05 ຕຸລາ 2018 ທີ່ວັງວຽງ ແຂວງວຽງຈັນ, ສະຖາບັນຄົ້ນຄວ້ານິຕິກຳສະພາແຫ່ງຊາດ (ສຄສ) ໄດ້ຈັດກອງ​ປະຊຸມເຝິກອົບຮົມການສ້າງຄວາມເຂັ້ມແຂງ ແລະຄວາມຮູ້ຄວາມສາມາດ ໃຫ້​ແກ່ພະນັກງານຂອງຕົນ, ພາຍໃຕ້ການເປັນປະທານຂອງທ່ານ ຄຳເຜີຍ ປານມະໄລທອງ ຫົວໜ້າສະຖາບັນຄົ້ນຄວ້ານິຕິກຳ.

      ທັງນີ້ ກໍເພື່ອຍົກລະດັບຄວາມຮູ້ຄວາມສາມາດໃຫ້ພະນັກງານມີຄວາມເຂັ້ມແຂງໃນການເຄື່ອນໄຫວວຽກງານ ຄວາມຮັບຜິດຊອບຂອງຕົນໃຫ້ມີປະສິດທິຜົນຫຼາຍຍິ່ງຂຶ້ນ, ຍົກສູງຄຸນນະພາບໃຫ້ພະນັກງານໃນການເປັນເສນາທິການ ແກ່ ສຄສ ນັບມື້ນັບເຂັ້ມແຂງຂຶ້ນເທື່ອລະກ້າວ; ນອກຈາກນັ້ນ, ຍັງເປັນການສ້າງຄວາມເຂົ້າໃຈຂຶ້ນຕື່ມອີກຕໍ່ບັນຫາຂອງ ແຕ່ລະໜ້າວຽກ ເປັນຕົ້ນແມ່ນວຽກງານເຝິກອົບຮົມ, ການສະໜອງຂໍ້ມູນ-ຂ່າວສານ, ການຄົ້ນຄວ້າຮັບໃຊ້ລັດຖະສະພາ ແລະວຽກງານບໍລິຫານຫ້ອງການ.

          ໃນຊຸດເຝິກອົບຮົມທີ່ໄດ້ຮັບການສະໜັບສະໜູນດ້ານງົບປະມານຈາກຄະນະເລຂາທິການສະພາແຫ່ງຊາດ, ຜູ້ ເຂົ້າຮ່ວມໄດ້ຮັບຟັງການສະເໜີບົດວິທີ​ວິທະຍາ​ການເຝິກອົບຮົມໃຫ້​ແກ່ສະມາຊິກສະພາແຫ່ງຊາດ ​ແລະສະມາຊິກສະພາປະຊາຊົນ​ຂັ້ນ​ແຂວງ, ວຽກ​ງານຂໍ້ມູນ-ຂ່າວສານ ​ແລະ​ຫ້ອງ​ສະໝຸດ, ຄວາມຮູ້ພື້ນຖານກ່ຽວກັບການຄົ້ນຄວ້າສຳລັບລັດ ຖະສະພາ ​ແລະສະພາແຫ່ງຊາດລາວ, ແລະວຽກງານບໍລິຫານຫ້ອງການ. ຫຼັງຈາກນັ້ນ, ກໍໄດ້ມີການສົນທະນາຖາມ-ຕອບ, ແລກປ່ຽນບົດຮຽນ ແລະປະສົບການເຊິ່ງກັນ ແລະກັນ ໃນການປະຕິບັດໜ້າທີ່ວຽກງານຕົວຈິງ ເພື່ອຊອກໃຫ້ເຫັນຂໍ້ສະດວກ-ຂໍ້ຫຍຸ້ງຍາກ ແລະວິທີການປັບປຸງແກ້ໄຂ​ ​ແນ​ໃສ່ຮັບປະກັນ​ການ​ເປັນ​ເສນາ​ທິການ​ໃຫ້​ແກ່ສະພາແຫ່ງຊາດໃນປັດຈຸບັນ ​ແລະ​ຕໍ່ໜ້າ.