ປະທານ ກຕທ ຮັບທູດຕ່າງປະເທດ

11/10/2018 00:00 -

(ສພຊ) ໃນຕອນເຊົ້າຂອງວັນທີ 5 ຕຸລາ 2018, ທີ່ສະພາແຫ່ງຊາດ (ສພຊ) ທ່ານ ເອກສະ ຫວ່າງ ວົງວິຈິດ ປະທານກໍາມາທິການການຕ່າງປະເທດ (ກຕທ) ສະພາແຫ່ງຊາດ ໄດ້ຕ້ອນຮັບທ່ານ   ມາຣັກ ລິບບຣິກກີ (Marek Libricky) ເອກອັກຄະລັດຖະທູດ ແຫ່ງ ສາທາລະນະລັດ ເຊັກ ປະຈໍາ ສປປລາວ ເຊິ່ງມີສໍານັກງານສະຖານທູດຕັ້ງຢູ່ບາງກອກ, ຣາຊະອານາຈັກໄທ.

        ໂອກາດດັ່ງກ່າວ, ທ່ານ ເອກສະຫວ່າງ ວົງວິຈິດ ໄດ້ສະແດງຄວາມຍິນດີຕ້ອນຮັບທ່ານ ເອກອັກ ຄະລັດຖະທູດ ດ້ວຍຄວາມຈິງໃຈ ພ້ອມທັງສະແດງຄວາມຍ້ອງຍໍ ສາທາລະນະລັດເຊັກ ເປັນປະເທດທີ່ ສວຍງາມ, ຄົນເຊັກເປັນຄົນດີມີນໍ້າໃຈ; ທ່ານຍັງໄດ້ຕີລາຄາສູງການພົວພັນຮ່ວມມື ລາວ-ເຊັກ ໃນໄລ ຍະຜ່ານມາ ລະຫວ່າງສອງປະເທດ ເປັນຕົ້ນແມ່ນການສ້າງໂຮງໝໍມິດຕະພາບຫລັງໃໝ່ ເຊິ່ງເປັນໂຮງໝໍ ທີ່ມີມາດຕະຖານເອີຣົບ ແລະ ໂຮງໝໍຢູ່ນະຄອນປາກເຊ ແຂວງຈໍາປາສັກ ພ້ອມທັງສະເໜີໃຫ້ທ່ານ ເອກອັກຄະລັດຖະທູດ ຈົ່ງເຮັດໜ້າທີ່ສືບຕໍ່ເສີມຂະຫຍາຍສາຍພົວພັນທັງສອງປະເທດ, ການພົວພັນ ສອງສະພາແຫ່ງຊາດ ລາວ-ເຊັກ ພັດທະນາໃຫ້ແໜ້ນແຟ້ນຂຶ້ນກວ່າເກົ່າ ຈາກນັ້ນ, ກໍໄດ້ປຶກສາຫາລືກັນ ກ່ຽວກັບການໄປຢ້ຽມຢາມສາທາລະນະລັດເຊັກຂອງປະທານ ສພຊ ລາວ.

        ໃນໂອກາດນີ້, ທ່ານ ມາຣັກ ລິບບຣິກກີ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ຈາກທ່ານປະທານ ກຕທ ພ້ອມທັງກ່າວວ່າ ຈະສືບຕໍ່ເສີມຂະຫຍາຍສາຍພົວພັນມິດຕະພາບອັນດີງາມ ລະຫວ່າງສອງປະເທດໃຫ້ໄດ້ຮັບໝາກຜົນດີຂຶ້ນກວ່າເກົ່າ ແລະ ຫວັງຢ່າງຍິ່ງວ່າ ຄະນະນໍາຂັ້ນສູງສະພາ ແຫ່ງຊາດລາວ ຈະເດີນທາງໄປຢ້ຽມຢາມສາທາລະນະລັດເຊັກ ໃນໄວໆນີ້.

        ວັນຈັນທີ 8 ຕຸລາຜ່ານມາ, ທ່ານ ເອກສະຫວ່າງ ວົງວິຈິດ ໄດ້ຕ້ອນຮັບທ່ານ ອາເມດ ໄອເດມ ອາກີ (Ahmet Idem AKAY) ເອກອັກຄະລັດຖະທູດ ແຫ່ງ ສາທາລະນະລັດ ຕວກກີ ປະຈໍາ ສປປລາວ ຄົນໃຫມ່ ໃນໂອກາດມາດໍາລົງຕໍາແໜ່ງເປັນເອກອັກຄະລັດຖະທູດຢູ່ ສປປລາວ.

        ທ່ານ ເອກສະຫວ່າງ ວົງວິຈິດ ໄດ້ສະແດງຄວາມຍິນດີຕ້ອນຮັບ, ຊົມເຊີຍ ແລະ ຕີລາຄາສູງຕໍ່ ທ່ານ ອາເມດ ໄອເດມ ອາກີ ທີ່ໄດ້ຮັບການແຕ່ງຕັ້ງໃຫ້ມາດໍາລົງຕໍາແໜ່ງເປັນເອກອັກຄະລັດຖະທູດ ຄົນໃຫມ່ປະຈໍາ ສປປລາວ ໃນຄັ້ງນີ້ ເຊິ່ງເປັນການປະກອບສ່ວນສໍາຄັນໃນການຮັດແໜ້ນ ສາຍພົວ ພັວການຮ່ວມມືຊ່ວຍເຫລືອເຊິ່ງກັນ ແລະ ກັນ ລະຫວ່າງລາວ-ຕວກກີ ໃຫ້ມີບາດກ້າວ ຂະຫຍາຍຕົວຍິ່ງຂຶ້້ນ.

        ທ່ານ ອາເມດ ໄອເດມ ອາກີ ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງກ່າວວ່າ ຈະສຸມທຸກຄວາມສາມາດ ແລະ ສະຕິປັນຍາເຂົ້າໃນການປະກອບສ່ວນເສີມສ້າງ ສາຍພົວພັນຮ່ວມມືລະຫວ່າງ ລາວ-ຕວກກີ ໃນທຸກຂົງເຂດວຽກງານ.