ພົບປະສອງຝ່າຍ ສະພາແຫ່ງຊາດ ລາວ-ຫວຽດນາມ ທີ່ ຮ່າໂນ້ຍ
23/07/2018

(ສພຊ) ຕອນເຊົ້້າວັນອັງຄານ ທີ 17 ກໍລະກົດ 2018 ນະຄອນຫລວງຮ່າໂນ້ຍ ສສ.ຫວຽດນາມ, ໄດ້ມີການພົບປະສອງຝ່າຍ ລະຫວ່າງ ສະພາແຫ່ງຊາດລາວ ນໍາໂດຍ ສະຫາຍ ແສງນວນ ໄຊຍະລາດ, ເລຂາທິການສູນກາງພັກ, ຮອງປະທານສະພາແຫ່ງຊາດລາວ ພ້ອມດ້ວຍຄະນະ ແລະ ສະພາແຫ່ງຊາດຫວຽດນາມ ນໍາໂດຍ ສະຫາຍ ນາງ ຕ໋ອງ ທິ ຝ໋ອງ, ກໍາມະການກົມການເມືອງສູນກາງພັກກອມມູນິດຫວຽດນາມ, ຮອງປະທານ ຜູ້ປະຈໍາການ ສະພາແຫ່ງຊາດຫວຽດນາມ ພ້ອມດ້ວຍຄະນະ.

ສະຫາຍ ແສງນວນ ໄຊຍະລາດ ໄດ້ສະແດງຄວາມຂອບໃຈຢ່າງສູງຕໍ່ສະຫາຍ ນາງ ຕ໋ອງ ທິ ຝ໋ອງ ທີ່ໄດ້ເຊື້ອເຊີນສະຫາຍ ຮອງປະທານສະພາແຫ່ງຊາດ ພ້ອມດ້ວຍຄະນະຜູ້ແທນສະພາແຫ່ງຊາດ ແຫ່ງ ສປປລາວ ມາຢ້ຽມຢາມ ແລະ ເຮັດວຽກຢູ່ ສສ.ຫວຽດນາມ ແລະ ການຕ້ອນຮັບຢ່າງ​ອົບ​ອຸ່ນ ​ເຕັມ​ໄປ​ດ້ວຍໄມຕີຈິດມິດຕະພາບອັນດູດດື່ມ, ຄວາມສາມັກຄີຮັກແພງ ​ແລະ ອັນສະໜິດສະໜົມ ຈາກ​ບັນ​ດາ​ສະຫາຍ​ການ​ນຳ ​ແລະ ​ພະນັກງານ​ສະພາ​ແຫ່ງ​ຊາດ​ຫວຽດນາມ​ ອ້າຍ​ນ້ອງ; ການ​ມາ​ຢ້ຽມ​ຢາມ​​ ແລະ ​ເຮັດ​ວຽກໃນ​​ຄັ້ງ​ນີ້ ແມ່ນເພື່ອສືບຕໍ່ຮັດແໜ້ນສາຍພົວພັນມິດຕະພາບ ທີ່ເປັນມູນເຊື້ອ, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນ ສອງຊາດ ທີ່ ທ່ານປະທານ ໂຮ ຈີ່ ມິນ ແລະ ທ່ານປະທານ ໄກສອນ ພົມວິຫານ ເປັນຜູ້ກໍ່ຕັ້ງ ແລະ ຜູ້ນຳພັກ, ລັດ ແລະ ປະຊາຊົນລາວ ແລະ ຫວຽດນາມ ຮຸ່ນຕໍ່ໆມາ ໄດ້ສືບຕໍ່ເພີ່ມພູນຄູນສ້າງມູນເຊື້ອສາຍພົວພັນດັ່ງກ່າວ ໃຫ້ພັດທະນາຂື້ນຢ່າງບໍ່ຢຸດຢັ້ງ. ພ້ອມ​ທັງ, ​ເປັນ​ການ​ເສີມຂະຫຍາຍ​ການ​ພົວພັນ ​ແລະ​ ຮ່ວມ​ມື ລະຫວ່າງ​ ສອງອົງການນິຕິບັນຍັດ ຂອງສອງປະເທດ ລາວ-ຫວຽດນາມ ທີ່​ມີ​ມາ​ແຕ່​ດົນ​ນານ​ແລ້ວ​ນັ້ນ ໃຫ້​ມີ​ຄວາມແໜ້ນ​ແຟ້ນ ​ຈະ​ເລີນງອກ​ງາມ​ ແລະ ເກີດດອກ​ອອກ​ຜົນ​ຍິ່ງໆ​ຂຶ້ນ.

ສະຫາຍ ຮອງປະທານສະພາແຫ່ງຊາດລາວ ໄດ້ສະເໜີໃຫ້ມີການສືບຕໍ່ຮັດແໜ້ນສາຍພົວພັນມິດຕະພາບ ແລະ ການຮ່ວມມື ລະຫວ່າງສອງສະພາແຫ່ງຊາດ ກໍຄື ສອງກຳມາທິການຕ່າງປະເທດຂອງສະພາແຫ່ງຊາດ ລາວ ແລະ ສະພາແຫ່ງຊາດ ຫວຽດນາມ ຄື:  ສຶບຕໍ່ການແລກປ່ຽນຄະນະຜູ້ແທນລະດັບສູງສຸດ, ລະດັບກຳມາທິການ, ລະດັບວິຊາການ ຈາກ ສູນກາງ ແລະທ້ອງຖິ່ນ ແລະ ຈັດສຳມະນາ ເພື່ອແລກປ່ຽນບົດຮຽນໃນຫົວຂໍ້ຕ່າງໆ ກ່ຽວກັບການຍົກສູງປະຕິສິດພາບການຈັດຕັ້ງປະຕິບັດພາລະບົດບາດ ຂອງສະພາແຫ່ງຊາດ ແລະ ສະພາປະຊາຊົນແຂວງ ຕາມເນື້ອໃນຈິດໃຈ ຂອງບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ລະຫວ່າງ ສອງສະພາແຫ່ງຊາດ ລາວ-ຫວຽດນາມ; ສະເໜີໃຫ້ສອງກໍາມາທິການການຕ່າງປະເທດສະພາ​ແຫ່ງ​ຊາດ​ ລາວ-ຫວຽດນາມ ຮ່ວມກັນລົງຕິດຕາມກວດກາການແກ້ບັນຫາການຍົກຍ້າຍພູມລໍາເນົາຕາມລໍາພັງໃຈ ແລະ ການແຕ່ງດອງທີ່ບໍ່ຖືກຕ້ອງຕາມລະບຽບ ຢູ່ຕາມບໍລິເວນຊາຍແດນລາວ-ຫວຽດນາມ; ສຶບຕໍ່ແລກປ່ຽນທັດສະນະ ແລະ ສະໜັບສະໜູນ ເຊິ່ງກັນ ແລະ ກັນ ໃນເວທີປຶກສາຫາລືລັດຖະສະພາພາກພື້ນ ແລະ ສາກົນ ທີ່ສອງອົງການນິຕິບັນຍັດລາວ-ຫວຽດນາມ ໄດ້ເຂົ້າເປັນພາຄີ; ​ສຶບຕໍ່ຕິດຕາມກວດກາ ແລະ ຊຸກຍູ້ ການ​ຈັດ​ຕັ້ງ​ປະຕິບັດ​ສັນຍາ, ສົນທິສັນຍາ, ຂໍ້ຕົກລົງ ແລະ ນິຕິກຳອື່ນໆ ທີ່ສອງລັດຖະບານໄດ້ລົງນາມຮ່ວມກັນ, ເປັນຕົ້ນ ແມ່ນການຈັດຕັ້ງປະຕິບັດໂຄງການກໍ່ສ້າງຫໍສະພາແຫ່ງຊາດລາວຫລັງໃໝ່ ຊື່ງໄດ້ຮັບເງີນທືນຊ່ວຍເຫຼືອລ້າ ຈາກ ພັກ ແລະ ລັດຖະບານຫວຽດນາມ; ພ້ອມນັ້ນ ໄດ້ແຈ້ງວ່າ ສະຫາຍປະທານ​ສະພາ​ແຫ່ງ​ຊາດ​ລາວ ໃຫ້ການຢືນຢັນ​ວ່າຈະ​ເດີນທາງ​ມາ​ຢ້ຽມຢາມສັນຖະວະ​ໄມຕີ ທີ່ ສສ.ຫວຽດນາມ​ ​ໃນ​​ໄຕ​ມາດ​ທີ 4 ຂອງ​ປີ 2018 ນີ້.

 

ສະຫາຍ ນາງ ຕ໋ອງ ທິ ຝ໋ອງ ໄດ້ສະແດງຄວາມຕ້ອນຮັບ ສະຫາຍ ຮອງປະທານສະພາແຫ່ງຊາດລາວ ພ້ອມດ້ວຍຄະນະ ຢ່າງອົບອຸ່ນໝົດຈິດໝົດໃຈ ແລະ ໄດ້ສະແດງຄວາມເຫັນດີເປັນເອກະພາບຕໍ່ການສະເໜີ ຂອງສະຫາຍ ຮອງປະທານສະພາແຫ່ງຊາດ ໃນການສືບຕໍ່ຮັດແໜ້ນສາຍພົວພັນມິດຕະພາບ ແລະ ການຮ່ວມມື ລະຫວ່າງສອງສະພາແຫ່ງຊາດ ກໍຄື ສອງກຳມາທິການຕ່າງປະເທດຂອງສະພາແຫ່ງຊາດ ລາວ ແລະ ສະພາແຫ່ງຊາດ ຫວຽດນາມ; ພ້ອມທັງໄດ້ອວຍພອນໃຫ້ການຢ້ຽມຢາມ ແລະ ເຮັດວຽກ ຢູ່ ສສ.ຫວຽດນາມ ຂອງສະຫາຍ ຮອງປະທານສະພາແຫ່ງຊາດລາວ ປະສົບຜົນສໍາເລັດຢ່າງຈົບງາມ.

 

ຕອນແລງຂອງວັນດຽວກັນ ສະຫາຍ ແສງນວນ ໄຊຍະລາດ ຮອງປະທານສະພາແຫ່ງຊາດ ແຫ່ງ ສປປລາວ ຍັງໄດ້ເຂົ້າຢ້ຽມຂໍ່ານັບ ສະຫາຍນາງ ຫວຽນ ທິ ກິມ ເງິນ ປະທານສະພາແຫ່ງຊາດ ແຫ່ງ ສສ.ຫວຽດນາມ.