ສະພາແຫ່ງຊາດແຫ່ງ ສປປ ລາວ-ລາຍລະອຽດຂອງຂ່າວສານ
 

ຄະນະຜູ້ແທນ ສພຊ ສຳເລັດການເຂົ້າຮ່ວມກອງປະຊຸມໄອປາ 38
26/09/2017

(ສພຊ) ທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ ພ້ອມດ້ວຍຄະນະ ໄດ້ສຳເລັດການເຂົ້າຮ່ວມກອງ​ປະຊຸມ​ລັດຖະສະພາ​ລະຫວ່າງ​ຊາດ​ອາ​ຊຽນ ຫລື ​ໄອ​ປາ ຄັ້ງ​ທີ 38 ທີ່​ນະຄອນຫລວງ​ມາ​ນີລາ ປະ​ເທດ​ຟິລິບ​ປິນ ເຊິ່ງກອງປະຊຸມດັ່ງກ່າວ ​ໄດ້ປິດລົງຢ່າງເປັນທາງການເມື່ອຕອນບ່າຍວັນທີ 19 ກັນຍາຜ່ານມາ ພາຍຫລັງທີ່ໄດ້ດຳເນີນມາເປັນເວລາ 5 ວັນ.

          ກອງປະຊຸມໄດ້ຮັບຟັງການລາຍງານຜົນຂອງກອງປະຊຸມຕ່າງໆປິ່ນອ້ອມ ເປັນຕົ້ນແມ່ນກອງປະຊຸມກຳມາທິການເສດຖະກິດ ມີມະຕິວ່າດ້ວຍການພັດທະນານະໂຍບາຍ ແລະ ຍຸດທະສາດເພື່ອແກ້ໄຂບັນຫາກ່ຽວກັບຄວາມໝັ້ນຄົງທາງດ້ານສະບຽງອາຫານຢູ່ໃນພາກພື້ນ ເພື່ອສະໜັບສະໜູນເປົ້າໝາຍການພັດທະນາແບບຍືນຍົງຂອງອົງການສະຫະປະຊາຊາດທີ່ມີຄາດໝາຍໃນການຫລຸດຜ່ອນຄວາມທຸກຍາກ, ລຶບລ້າງໄພອຶດຫິວ ແລະ ຫລຸດຜ່ອນຜົນກະທົບຈາກການປ່ຽນແປງດິນຟ້າອາກາດ ໂດຍໄດ້ຮຽກຮ້ອງໃຫ້ບັນດາລັດຖະສະພາສະມາຊິກຮ່ວມມືກັນ ແລະ ຮ່ວມມືກັບຂະແໜງການອື່ນໆໃນຂອບແຜນງານອາຊຽນ ເພື່ອໃຫ້ມີຄວາມໝັ້ນຄົງທາງດ້ານສະບຽງອາຫານ, ແລະ ມະຕິວ່າດ້ວຍການສະໜັບສະໜູນການຈັດຕັ້ງປະຕິບັດໂຄງການການເງິນແບບທົ່ວເຖິງໃນອາຊຽນ ເຊິ່ງຮຽກຮ້ອງໃຫ້ລັດຖະສະພາສະມາຊິກພັດທະນານະໂຍບາຍ ແລະ ແຜນງານທີ່ອຳນວຍຄວາມສະດວກ ແລະ ສະໜັບສະໜູນການເຂົ້າເຖິງການບໍລິການທາງດ້ານການເງິນ ໂດຍສະເພາະກຸ່ມເປົ້າໝາຍທີ່ມີລາຍຮັບໜ້ອຍ, ສະໜັບສະໜູນການສ້າງພື້ນຖານໂຄງລ່າງທາງດ້ານການເງິນ ແລະ ເຄືອຄ່າຍທີ່ຍົກສູງການເຂົ້າເຖິງການບໍລິການດ້ານການເງິນ ແນໃສ່ຂະແໜງການທຸລະກິດຈຸລະພາກ, ຂະໜາດນ້ອຍ ແລະ ຂະໜາດກາງ.

ພ້ອມນັ້ນ, ກອງປະຊຸມກຳມາທິການວຽກງານສັງຄົມ ໄດ້ທົບທວນຄືນມະຕິກ່ຽວກັບການສົ່ງເສີມການມີສ່ວນຮ່ວມຂອງປະຊາຊົນປະເທດສະມາຊິກອາຊຽນ​ໃນ​ການ​ກຳນົດ​ນະ​ໂຍບາຍ​ທົ່ວ​ໄປ, ມະຕິວ່າ​ດ້ວຍ​ການ​ປະຕິ​ຮູບ​ສະມັດຊາ​ລັດຖະສະພາ​ລະຫວ່າງ​ອາຊຽນ​ເພື່ອ​ສະກັດ​ກັ້ນ ​ແລະ ​ຕ້ານ​ໄພ​ຄຸກ​ຄາມ​ຂອງ​ຢາ​ເສບ​ຕິດ ​ມາ​ເປັນ​ສະພາ​ທີ່​ປຶກສາ​ສະມັດຊາ​ລັດຖະສະພາ​ລະຫວ່າງ​ຊາດ​ອາ​ຊຽນກ່ຽວ​ກັບ​ໄພ​ອັນຕະລາຍ​ຂອງ​ຢາ​ເສບ​ຕິດ, ​ແລະ ມະຕິ​ວ່າ​ດ້ວຍ​ການ​ຮັບຮອງ​ເອົາ​ບົດ​ລາຍ​ງານ​ກອງ​ປະຊຸ​ມສະມັດຊາ​ລັດຖະສະພາ​ລະຫວ່າງ​ຊາດ​ອາ​ຊຽນ ​ເພື່ອສະກັດ​ກັ້ນ ​ແລະ ຕ້ານ​ໄພ​ຄຸກ​ຄາມ​ຂອງ​ຢາ​ເສບ​ຕິດ​ຄັ້ງ​ທີ 13 ​ເພື່ອ​ຕໍ່ສູ້​ກັບ​ບັນຫາ​ຢາ​ເສບ​ຕິດ, ທົບ​ທວນ​ມະຕິ​ກອງ​ປະຊຸມ​ຂໍ້​ກຳນົດ​ຂອງ​ຄະນະ​ກຳມະການ​ໄອ​​ໂຟຄອມ; ​ເນັ້ນ​ໃສ່ 2 ມະຕິ ​ເພື່ອ​ເສີມ​ສ້າງ​ຄວາມ​ພະຍາຍາມ​ໃນ​ການ​ຕໍ່ສູ້​ກັບ​ການ​ຄຸກ​ຄາມ​ດ້ານ​ຢາ​ເສບ​ຕິດ​ໃນ​ພູມິ​ພາກ​ອາ​ຊຽນ ​ເພື່ອ​ສ້າງ​ໃຫ້​ປະຊາ​ຄົມ​ອາຊຽນປອດ​ຢາ​ເສບ​ຕິດ ​ແລະ ການ​ໃຫ້​ຄວາມ​ສຳຄັນ​ໃນ​ການ​ປະຕິ​ຮູບ AIFOCOM ມາ​ເປັນ AIPACODD.

ນອກຈາກນັ້ນ, ກໍມີຜົນກອງປະຊຸມກຳມາທິການວຽກງານພາຍໃນ ທີ່ໄດ້ຄົ້ນຄວ້າ ແລະ ປະກອບຄຳຄິດຄຳເຫັນໃສ່ການປັບປຸງກາໝາຍໄອປາຄືນໃໝ່, ການປັບປຸງທຳມະນູນໄອປາ, ການຄາດຄະເນງົບປະມານຊາດອາຊຽນ; ການຄາດຄະເນງົບປະມານເພີ່ມ ແລະ ງົບປະມານຮ່ວງພິເສດ, ແຜນແມ່ບົດດ້ານການສື່ສານໄອປາ, ການຕີພິມປຶ້ມທີ່ລະນຶກຄົບຮອບ 40 ປີຂອງໄອປາ ແລະ ການສະແດງຄວາມຍ້ອງຍໍຊົມເຊີຍຕໍ່ລັດຖະສະພາຟີລິບປິນ ໃນການຕີພິມ  ແລະ ຜະລິດປຶ້ມດັ່ງກ່າວ, ການສະແດງຄວາມຊົມເຊີຍຕໍ່ເຢຍລະມັນ ສຳລັບການຮ່ວມມື ແລະ ການຈັດຕັ້ງປະຕິບັດໂຄງການພັດທະນາຄວາມອາດສາມາດສຳລັບໄອປາ, ປຶ້ມຄູ່ມືຮັບຮອງເອົາລັດຖະສະພາຈໍເຈຍ, ປາກີສະຖານ ແລະ ຢູເຄຣນ ເຂົ້າເປັນຜູ້ສັງເກດການຂອງໄອປາ, ການຮັບຮອງເອົາແຜນງານປີ 2017 ຂອງກອງເລຂາໄອປາ, ການສະແດງຄວາມຊົມເຊີຍຕໍ່ການສຳເລັດໜ້າທີ່ຂອງທ່ານ ປັນຕາລີອອນ ດີ ອາວາເຣສ ໃນຖານະປະທານໄອປາຄັ້ງທີ 38 , ຮັບຮອງເອົາວັນເວລາ ແລະ ສະຖານທີ່ຂອງກອງປະຊຸມໃຫຍ່ໄອປາຄັ້ງທີ 39 ເຊິ່ງແມ່ນປະເທດສິງກະໂປຈະເປັນເຈົ້າພາບ ແລະ ມະຕິວ່າດ້ວຍການສົ່ງຮ່າງມະຕິຂອງບັນດາລັດຖະສະພາສະມາຊິກໄອປາ ແລະ ອື່ນໆ.