ສະພາແຫ່ງຊາດແຫ່ງ ສປປ ລາວ-ລາຍລະອຽດຂອງຂ່າວສານ
 

ກອງປະຊຸມປະຈໍາປີ ຂອງຄະນະຮັບຜິດຊອບວຽກງານເຂດເລືອກຕັ້ງ
20/10/2017

ກອງປະຊຸມປະຈໍາປີ ຂອງຄະນະຮັບຜິດຊອບວຽກງານເຂດເລືອກຕັ້ງ ໄດ້ດໍາເນີນລະຫວ່າງວັນທີ 27-28 ກັນຍາ 2017 ທີ່ຫໍວັດທະນາທໍາແຫ່ງຊາດ ໂດຍການເປັນປະທານຂອງທ່ານ ພົງສະ ເໜ່ ຍຸຕິທໍາ ຫົວໜ້າຄະນະຮັບຜິດຊອບວຽກງານເຂດເລືອກຕັ້ງ; ເຂົ້າຮ່ວມມີທ່ານ ສົມພັນ ແພງຄໍາມີ ຮອງປະທານຄະນະປະຈໍາ, ຮອງປະທານສະພາແຫ່ງຊາດ ທັງເປັນຜູ້ຊີ້ນໍາວຽກງານເຂດເລືອກຕັ້ງ, ມີປະທານຄະນະສະມາຊິກສະພາແຫ່ງຊາດ (ສສຊ) ປະຈໍາ 18 ເຂດເລືອກຕັ້ງ, ຮອງປະທານກໍາມາທິການ, ເລຂາທິການສະພາແຫ່ງຊາດປະຈໍາແຕ່ລະເຂດເລືອກຕັ້ງ ແລະ ພະນັກງານວິຊາການ.

        ກອງປະຊຸມຄັ້ງນີ້, ແມ່ນເພື່ອກະກຽມເນື້ອໃນ ແລະ ຂໍ້ມູນຕ່າງໆ ໃຫ້ແກ່ກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ VIII, ເພື່ອສະຫລຸບຕີລາຄາຄືນການຈັດຕັ້ງປະຕິ ບັດວຽກງານຂອງຄະນະຮັບຜິດຊອບວຽກງານເຂດເລືອກຕັ້ງ ນັບແຕ່ກອງປະຊຸມຄັ້ງປະຖົມມະລືກມາຮອດປັດຈຸບັນ ແລະ ວາງທິດທາງແຜນການເຄື່ອນໄຫວປະຈໍາປີ 2018. ພ້ອມກັນນັ້ນ, ກໍເພື່ອປຶກສາຫາລື ແລະ ຂໍຄໍາຄິດຄໍາເຫັນຈາກທ່ານປະທານ, ຮອງປະທານຄະນະ ສສຊ ປະຈໍາເຂດເລືອກຕັ້ງ ກ່ຽວກັບການດໍາເນີນກອງປະຊຸມປະຈໍາປີ ຄະນະ ສສຊ ປະຈໍາເຂດເລືອກຕັ້ງ ແລະ ເພື່ອສ້າງຄວາມເປັນເອກະພາບກັນ ແລະ ຮັບປະກັນໃຫ້ແກ່ການດໍາເນີນກອງປະຊຸມດັ່ງກ່າວໃຫ້ບັນລຸຕາມຄາດໝາຍ ແລະ ມີປະສິດທິຜົນດີ.

        ຜູ້ເຂົ້າຮ່ວມກອງປະຊຸມ ຍັງຮັບຟັງການລາຍງານສະພາບກ່ຽວກັບກົງຈັກການຈັດຕັ້ງ ແລະການເຄື່ອນໄຫວວຽກງານຕົວຈິງ ຂອງຄະນະ ສສຊ ປະຈໍາເຂດເລືອກ ຂອງ 3 ເຂດເລືອກຕັ້ງຄື: ນະຄອນຫລວງວຽງຈັນ, ຊຽງຂວາງ ແລະ ສະຫວັນນະເຂດ; ບັນດາຜູ້ເຂັ້າຮ່ວມໄດ້ປຶກສາຫາລືບາງວຽກງານທີ່ສໍາຄັນ ທີ່ຢູ່ໃນຄວາມຮັບຜິດຊອບຂອງຄະນະຮັບຜິດຊອບວຽກງານເຂດເລືອກຕັ້ງເປັນຕົ້ນ: ການກະກຽມດໍາເນີນກອງປະຊຸມປະຈໍາປີ ຂອງຄະນະ ສສຊ ປະຈໍາເຂດເລືອກຕັ້ງ, ການສ້າງຕັ້ງໜ່ວຍສະມາຊິກສະພາປະຊາຊົນແຂວງ, ນະຄອນຫລວງ ປະຈໍາເຂດເລືອກຕັ້ງຢູ່ເມືອງ, ການຮ່າງນິຕິກໍາທີ່ສໍາຄັນຂອງທ້ອງຖ່ິນ ແລະ ກອງປະຊຸມຍັງຈະໄດ້ຮັບຟັງການໂອ້ລົມຂອງທ່ານຮອງປະ ທານສະພາແຫ່ງຊາດ.