ປະທານ ສພຊ ຕ້ອນຮັບປະທານສະພາແຫ່ງລັດ ແລະ ປະທານສະພາລັດຖະມົນຕີ ແຫ່ງ ສ.ກູບາ
16/11/2018

(ສພຊ) ວັນທີ 11 ພະຈິກຜ່ານມາ, ທີ່ສະພາແຫ່ງຊາດ (ສພຊ) ສະຫາຍ ນາງ ປານີ ຢາທໍ່ຕູ້ ປະທານ ສພຊ ໄດ້ຕ້ອນຮັບສະຫາຍ ມີເກັນ ດີເອັດສ-ກາແນນ ແບຣມູເດັດສ ປະທານສະພາແຫ່ງລັດ ແລະ ປະທານສະພາລັດຖະມົນຕີ ແຫ່ງ ສ.ກູບາ ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມລັດຖະກິດຢ່າງເປັນທາງການ ແລະ ເຮັດວຽກຢູ່ ສປປລາວ.

  • , ສະຫາຍ ນາງ ປານີ ຢາທໍ່ຕູ້ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຕີລາຄາສູງການຢ້ຽມຢາມລັດຖະກິດ ຢູ່ ສປປລາວ ໃນຄັ້ງນີ້, ເຊິ່ງສອງປະເທດລາວ-ສ.ກູບາ ເປັນປະເທດເພື່ອນມິດຮ່ວມອຸດົມການທີ່ສະໜິດສະໜົມ ສະນັ້ນ, ການມາຢ້ຽມຢາມໃນຄັ້ງນີ້ ເປັນການເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອ ທີ່ມີມາແຕ່ດົນນານລະຫວ່າງສອງພັກສອງລັດ ແລະ ປະຊາຊົນສອງຊາດໃຫ້ເຕີບໃຫຍ່ຂະຫຍາຍຕົວຂຶ້ນເລື້ອຍໆ; ພ້ອມທັງຊົມເຊີຍຕໍ່ການໄດ້ຮັບແຕ່ງຕັ້ງໃຫ້ເປັນປະທານສະພາແຫ່ງລັດ ແລະ ປະທານສະພາລັດຖະມົນຕີ ແຫ່ງ ສາທາລະນະລັດ ກູບາ, ພ້ອມທັງຊົມເຊີຍການພົບປະກັບສະຫາຍ ບຸນຍັງ ວໍລະຈິດ ປະທານປະເທດ ແຫ່ງ ສປປລາວ ເຊິ່ງເປັນການພົບປະທີ່ມີຄວາມໝາຍສໍາຄັນ ແລະ ໄດ້ຕົກລົງຫລາຍບັນຫາທີ່ສໍາຄັນ; ສະຫາຍປະທານ ສພຊ ລາວ ຍັງໄດ້ໃຫ້ຮູ້ວ່າ ປັດຈຸບັນ ສພຊ ລາວ ພວມກະກຽມດໍາເນີນກອງປະຊຸມສະໄໝສາມັນ ເທື່ອທີ 6 ຂອງ ສພຊ ຊຸດທີ VIII ແລະ ກອງປະຊຸມສະພາປະຊາຊົນແຂວງ ໃນກອງປະຊຸມ ຈະໄດ້ມີການປັບປຸງກົດໝາຍ ແລະ ນິຕິກໍາ; ຕໍ່ກັບການພົວພັນຮ່ວມມືຂອງສອງ ສພຊ ນັ້ນ ພວກເຮົາໄດ້ມີການພົວພັນຮ່ວມມືຢ່າງໃກ້ຊິດ ແລະ ສະໜັບສະໜູນຊ່ວຍເຫລືອເຊິ່ງກັນ ແລະ ກັນຢູ່ໃນພາກພື້ນ ແລະ ສາກົນ.

ສະຫາຍ ມີເກັນ ດີເອັດສ-ກາແນນ ແບຣມູເດັດສ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນຂອງການນໍາພັກ-ລັດ ສປປລາວ ພ້ອມທັງແຈ້ງຜົນການພົບປະສອງຝ່າຍກັບສະຫາຍ ບຸນຍັງ ວໍລະຈິດ ແລະ ສະຫາຍ ທອງລຸນ ສີສຸລິດ ນາຍົກລັດຖະມົນຕີ; ໄລຍະຜ່ານມາ ສອງປະເທດລາວ-ກູບາ ມີມູນເຊື້ອການພົວພັນ ແລະ ຮ່ວມມືທີ່ດີນໍາກັນມາຕະຫລອດລະຫວ່າງສອງພັກສອງລັດ ແລະ ປະຊາຊົນສອງຊາດ; ການຢ້ຽມຢາມຄັ້ງນີ້ ມີຄວາມໝາຍສໍາຄັນທາງດ້ານປະຫວັດສາດ ເຊິ່ງເປັນປີທີ່ລາວພວມສະເຫລີມສະຫລອງເມືອງວຽງໄຊ ເມືອງແຫ່ງປະຫວັດສາດ ຄົບຮອບ 50 ປີ, ວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ ແລະ ວັນສ້າງຕັ້ງສາຍພົວພັນການທູດລາວ-ກູບາ ຄົບຮອບ 44 ປີ ເຊິ່ງເຫັນໄດ້ວ່າ ສອງປະເທດຂອງພວກເຮົາມີການພົວພັນກັນຢ່າງເລິກເຊິ່ງ,  ສະຫາຍ ມີເກັນ ດີເອັດສ-ກາແນນ ແບຣມູເດັດສ ຍັງໄດ້ຢືນຢັນຄືນແນວທາງນະໂຍບາຍຂອງພັກ ແລະ ລັດກູບາ ທີ່ຈະສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນຮ່ວມມືອັນເປັນມູນເຊື້ອລະຫວ່າງສອງພັກ, ສອງລັດ ແລະ ປະຊາຊົນສອງຊາດກູບາ-ລາວ ໃນສະເພາະໜ້າ ແລະ ຍາວນານ ກໍຄືຄວາມມຸ່ງໝັ້ນທີ່ຈະສືບຕໍ່ໃຫ້ການຮ່ວມມື, ແລກປ່ຽນບົດຮຽນ, ການໄປມາຫາສູ່ ກໍຄືການຢ້ຽມຢາມ ຂອງຄະນະຜູ້ແທນຂັ້ນສູງຂອງສອງປະເທດ ພ້ອມທັງຊົມເຊີຍຕໍ່ການຍົກສູງບົດບາດແມ່ຍິງ ທີ່ໄດ້ຮັບການເລືອກຕັ້ງເປັນການນໍາຂັ້ນສູງຂອງ ສພຊ ແລະ ເຊື້ອເຊີນສະຫາຍປະທານ ສພຊ ລາວ ໄປຢ້ຽມຢາມສາທາລະນະລັດກູບາ; ສະຫາຍ ມີເກັນ ດີເອັດສ-ກາແນນ ແບຣມູເດັດສ ຍັງໃຫ້ຮູ້ຕື່ມວ່າ ລັດຖະທຳມະນູນຂອງກູບາ ໄດ້ໃຊ້ມາເປັນເວລາດົນນານແລ້ວ ສະນັ້ນ, ຈະຕ້ອງໄດ້ມີການປັບປຸງໃຫ້ແທດເໝາະກັບສະພາບຂອງສັງຄົມໃນປັດຈຸບັນ ເຊິ່ງໄດ້ຈັດຕັ້ງຄະນະປະຕິຮູບລັດຖະທຳມະນູນ ໃນ 2 ປີຜ່ານມາ ກໍໄດ້ມີໂຄງການປະຕິຮູບລັດຖະທຳມະນູນໃຫມ່ ພາຍຫລັງປະຕິຮູບແລ້ວ ໄດ້ໃຫ້ປະຊາຊົນມີຄໍາຄິດຄໍາເຫັນ ແລະ ນໍາເຂົ້າຜ່ານ ສພຊ ເພື່ອພິຈາລະນາຮັບຮອງໃນເດືອນກຸມພາທີ່ຈະມາເຖິງນີ້.

(ສົມນຶກ ແກ້ວໄຊຍະຈັກ)