ຖະແຫລງຂ່າວການດໍາເນີນກອງປະຊຸມສະໄໝສາມັນເທື່ອທີ 6
19/11/2018

(ສພຊ) ໃນບ່າຍວັນທີ 15 ພະຈິກຜ່ານມາ ທີ່ຫ້ອງປະຊຸມຄະນະເລຂາທິການສະພາ ແຫ່ງຊາດ (ຫລັກ 6) ນະຄອນຫລວງວຽງຈັນ, ທ່ານ ນາງ ສວນສະຫວັນ ວິຍະເກດ ກໍາມະການ ສໍາຮອງສູນກາງພັກ, ເລຂາທິການສະພາແຫ່ງຊາດ ໄດ້ຖະແຫລງຂ່າວກ່ຽວກັບການດໍາເນີນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດຊຸດທີ VIII ເພື່ອແຈ້ງມາ​ຍັງບັນດາທ່ານພະນັກ ງານ-ລັດຖະກອນ, ທະຫານ-ຕຳຫລວດ ນັກຮຽນ, ນັກສຶກສາ, ປັນຍາຊົນ, ກຳມະກອນ, ຊາວຜູ້ ອອກແຮງງານ, ພໍ່ແມ່ພີ່ນ້ອງ, ປະຊາຊົນລາວບັນດາເຜົ່າໃນທົ່ວປະເທດ ແລະ ພີ່ນ້ອງຊາວລາວທີ່ອາ ໄສຢູ່ຕ່າງປະເທດຮັບຊາບກ່ຽວກັບການດຳເນີນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງ ຊາດຊຸດທີ VIII ເຊິ່ງມີເນື້ອດັ່ງນີ້:

ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII ຈະໄດ້ໄຂຂຶ້ນໃນຕອນ ເຊົ້າຂອງວັນອັງຄານທີ 20 ພະຈິກ ແລະ ຈະດໍາເນີນໄປເຖິງວັນສຸກທີ 21 ທັນວາ 2018 ທີ່ຫ້ອງປະ ຊຸມສະພາແຫ່ງຊາດ (ຫລັກ 6),​  ນະຄອນຫລວງວຽງຈັນ ເຊິ່ງຈະໃຊ້ເວລາດໍາເນີນກອງປະຊຸມທັງ ໝົດ 22 ວັນ  (ບໍ່ລວມວັນພັກລັດຖະການ).  

ກອງປະຊຸມຄັ້ງນີ້ຈະພິຈາລະນາ ແລະ ຮັບຮອງບັນຫາສຳຄັນຕ່າງໆຄື:

ວຽກງານຂອງລັດຖະບານ: ພິຈາລະນາ, ຮັບຟັງບົດລາຍງານຂອງທ່ານນາຍົກລັດຖະມົນຕີ ກ່ຽວກັບການຈັດຕັ້ງປະຕິບັດວຽກງານທີ່ພົ້ນເດັ່ນປະຈຳປີ 2018 ແລະທິດທາງວຽກງານຈຸດສຸມໃນປີ 2019 ຂອງລັດຖະບານ; ພິຈາລະນາ, ຮັບຮອງເອົາບົດລາຍງານຂອງທ່ານຮອງນາຍົກລັດຖະມົນຕີ, ລັດຖະມົນກະຊວງການເງິນກ່ຽວກັບສະພາບການຈັດຕັ້ງປະຕິບັດແຜນພັດ​ທະນາ​ເສດຖະກິ​ດ-ສັງຄົມ, ​ແຜນ​ງົບປະມານ​ແຫ່ງ​ລັດ, ແຜນເງິນຕາປີ 2018, ທິດທາງແຜນການປີ 2019 ແລະ ບົດລາຍ ງານການສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2017; ພິຈາລະນາ, ຮັບຮອງເອົາການຊີ້ແຈງຂອງລັດຖະບານຕໍ່ຄຳຊັກຖາມຂອງສອງ 2 ກະຊວງຄື: ກະຊວງໂຍທາທິການ ແລະ ຂົນສົ່ງ ຊີ້ແຈງກ່ຽວກັບສະພາບການກໍ່ສ້າງ ແລະ ສ້ອມແປງຖະໜົນຫົນທາງ (ໃນໄລຍະຜ່ານ ມາເຫັນວ່າ ຄຸນນະພາບການກໍ່ສ້າງຕໍ່າ, ມູນຄ່າການກໍ່ສ້າງສູງ, ແກ່ຍາວເວລາກໍ່ສ້າງ ແລະ ທິດທາງແກ້ ໄຂບັນຫາດັ່ງກ່າວໃນຕໍ່ໜ້າມີແນວໃດ);  ກະຊວງສາທາລະນະສຸກ ຊີ້ແຈງກ່ຽວກັບຄຸນນະພາບການບໍລິ ການການປິ່ນປົວຢູ່ໂຮງໝໍ, ສຸກສາລາ. (ແລະທິດທາງແກ້ໄຂໃນຕໍ່ໜ້າ); ພິຈາລະນາ, ຮັບຟັງບົດລາຍ ງານຂອງລັດຖະບານກ່ຽວກັບການຈັດຕັ້ງປະຕິບັດມະຕິຂອງກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດຊຸດທີ VIII  ວ່າດ້ວຍການພັດທະນາຊົນນະບົດ ແລະ ລຶບລ້າງຄວາມທຸກຍາກ ຕິດພັນກັບເປົ້າໝາຍການພັດທະນາແບບຍືນຍົງ. (ສະບັບເລກທີ 079/ສພຊ, ລົງວັນທີ 17 ພະຈິກ 2017); ພິຈາລະນາ, ຮັບຮອງເອົາການແຕ່ງຕັ້ງຜູ້ວ່າການທະນາຄານແຫ່ງ ສປປ ລາວ ຕາມການ ສະເໜີຂອງທ່ານນາຍົກລັດຖະມົນຕີ; ພິຈາລະນາ, ຮັບຮອງເອົາບົດສະເໜີຂອງລັດຖະບານ ກ່ຽວກັບ ການຄົ້ນຄວ້າຊື່ເອີ້ນຊົນເຜົ່າບຣູ.

ວຽກງານອົງການກວດສອບແຫ່ງລັດ: ພິຈາລະນາ, ຮັບຮອງເອົາບົດລາຍງານຂອງອົງການ ກວດ​ສອບ​ແຫ່ງ​ລັດກ່ຽວ​ກັບ​ການຈັດ​ຕັ້ງ​ປະຕິບັດ​ແຜນການ​ເຄື່ອນ​ໄຫວ​ວຽກ​ງານປະ​ຈໍາປີ 2018 ​ແລະ ​ທິດ​ທາງແຜນການ​ປະ​ຈໍາປີ 2019; ພິຈາລະນາ, ຮັບຮອງເອົາບົດລາຍງານຜົນການກວດ​ສອບ​ບົດສະຫລຸບ​ຂາດ​ຕົວການ​ຈັດ​ຕັ້ງ​ປະຕິບັດ​ແຜນ​ງົບປະມານ​ແຫ່ງ​ລັດປະຈຳປີ 2017; ພິຈາລະນາ, ຮັບ ຮອງເອົາບົດລາຍງານຂອງອົງການກວດກາລັດຖະບານ ກ່ຽວກັບການກວດກາຕາມຜົນການກວດ ສອບບົດສະຫລຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ສົກປີ 2015-2016.

 

ວຽກງານອົງການຍຸຕິທຳ ແລະ ກົດໝາຍ: ພິຈາລະນາ, ຮັບຮອງເອົາບົດລາຍງານຂອງອົງ ການໄອຍະການປະຊາຊົນສູງສຸດ ກ່ຽວ​ກັບ​ການຈັດ​ຕັ້ງ​ປະຕິບັດ​ແຜນການ​ເຄື່ອນ​ໄຫວ​ວຽກ​ງານກາງສະໄໝ (2016-2018), ການເຄື່ອນໄຫວວຽກງານ 9 ເດືອນ ປະຈໍາປີ 2018, ທິດທາງແຜນການ ຮອດປີ 2020 ແລະວຽກງານຈຸດສຸມປະຈໍາປີ 2019; ພິຈາລະນາ, ຮັບຮອງເອົາບົດລາຍງານຂອງ​ສານປະຊາຊົນສູງສຸດ ກ່ຽວ​ກັບ​ການຈັດ​ຕັ້ງ​ປະຕິບັດ​ແຜນການ​ເຄື່ອນ​ໄຫວ​ວຽກ​ງານກາງສະໄໝ (2016-2018), ການເຄື່ອນໄຫວວຽກງານ 9 ເດືອນ ປະຈໍາປີ 2018, ທິດທາງແຜນການຮອດປີ 2020 ແລະ ວຽກງານຈຸດສຸມປະຈໍາປີ 2019; ພິຈາລະນາ, ຮັບຮອງເອົາການຊີ້ແຈງຂອງອົງການ ໄອຍະການປະຊາຊົນສູງສຸດກ່ຽວກັບການຈັດຕັ້ງປະຕິບັດພາລະບົດບາດໃນການຕິດຕາມກວດກາ” ການລະເມີດສັນຍາກູ້ຢືມທີ່ມີຫລັກຊັບຄໍ້າປະກັນແຕ່ມາດຳເນີນຄະດີອາຍາໃນຂໍ້ຫາສໍ້ໂກງຊັບຂອງ ພົນລະເມືອງ.

ວຽກງານສະພາແຫ່ງຊາດ: ພິຈາລະນາ, ຮັບຮອງເອົາບົດລາຍງານ ກ່ຽວ​ກັບ​ການເຄື່ອນໄຫວ ວຽກງານຂອງສະພາແຫ່ງຊາດຊຸດທີ VIII ກາງສະໄໝ (2016-2018), ປະຈໍາປີ 2018, ທິດທາງ ແຜນການແຕ່ປີ 2019 ຮອດກອງປະຊຸມຄັ້ງປະຖົມມະລືກຂອງສະພາແຫ່ງຊາດຊຸດທີ IX​ ແລະ​ແຜນ ວຽກຈຸດສຸມ​ປະ​ຈໍາປີ 2019 ຂອງສະພາແຫ່ງຊາດ; ພິຈາລະນາ, ຮັບຮອງເອົາແຜນການສ້າງ ແລະ ປັບ ປຸງກົດໝາຍຂອງສະພາແຫ່ງຊາດ ປະຈໍາປີ 2019; ພິຈາລະນາ, ຮັບຮອງເອົາແຜນການຕິດຕາມ ກວດກາຂອງຄະນະປະຈໍາສະພາແຫ່ງຊາດປະຈໍາປີ 2019.

ການສ້າງ, ປັບປຸງ ແລະ ທາບທາມຮ່າງກົດໝາຍ ຈໍານວນ 9 ສະບັບໃນນັ້ນ:

ຮ່າງກົດໝາຍສ້າງໃຫມ່ 7 ສະບັບ ຄື: ກົດໝາຍວ່າດ້ວຍສໍານັກງານຜູ່ຕາງໜ້າ ສປປລາວ ປະຈໍາຢູ່ຕ່າງປະເທດ; ກົດໝາຍວ່າດ້ວຍຄົນພິການ; ກົດໝາຍວ່າດ້ວຍຄວາມປອດໄພດ້ານລັງສີ; ກົດໝາຍວ່າດ້ວຍລາຍເຊັນເອເລັກໂຕຣນິກ; ກົດໝາຍວ່າດ້ວຍການປະກັນສຸຂະພາບ; ກົດໝາຍວ່າ ດ້ວຍການລົດໄຟ; ປະມວນກົດໝາຍແພ່ງ.

ຮ່າງກົດໝາຍປັບປຸງ 1 ສະບັບຄື: ກົດໝາຍວ່າດ້ວຍທະນາຄານທຸລະກິດ.

ຮ່າງກົດໝາຍທາບທາມ 1 ສະບັບຄື: ກົດໝາຍວ່າດ້ວຍທີ່ດິນ.

  • ທ່ານ ນາງ ສວນສະຫວັນ ວິຍະເກດ ໄດ້ເຊີນບັນດາທ່ານພະນັກງານ, ລັດຖະ ກອນ, ທະຫານ-ຕຳຫລວດ, ນັກຮຽນ, ນັກສຶກສາ, ປັນຍາຊົນ, ກຳມະກອນ, ຊາວຜູ້ອອກແຮງງານ, ພໍ່ແມ່ພີ່ນ້ອງ, ປະຊາຊົນບັນດາເຜົ່າທຸກຊັ້ນຄົນໃນທົ່ວປະເທດ ແລະ ພີ່ນ້ອງຊາວລາວທີ່ອາໄສຢູ່ຕ່າງ ປະເທດ ຈົ່ງຕິດຕາມການດຳເນີນກອງປະຊຸມສະ ໄໝສາມັນເທື່ອທີ 6 ຂອງສະພາແຫ່ງຊາດຊຸດທີ VIII ຄັ້ງນີ້. ໃນໄລຍະດຳເນີນກອງປະຊຸມສະພາແຫ່ງຊາດ ຄະນະເລຂາທິການສະພາແຫ່ງຊາດ ໄດ້ຈັດ ຕັ້ງໜ່ວຍງານຮັບຜິດຊອບໂທລະສັບສາຍ​ດ່ວນ ເພື່ອຮັບເອົາຄຳຄິດຄຳເຫັນ ແລະ ຄຳສະເໜີໂດຍກົງ ຈາກທົ່ວສັງຄົມ ທີ່ຈະສົ່ງໄປຍັງກອງປະຊຸມ; ບັນດາທ່ານສາມາດສົ່ງຄຳຄິດຄຳເຫັນ ແລະ ຄຳສະເໜີ ໄປຍັງກອງປະຊຸມໄດ້ຕາມວິທີລຸ່ມນີ້:
  • ໂທລະສັບບໍ່ເສຍຄ່າ ໝາຍເລກ: 156
  • ໂທລະສານ       ໝາຍເລກ: 021 413528
  • ສົ່ງເປັນຈົດໝາຍທາງໄປສະນີ ຕູ້ ປນ. 662
  • ສົ່ງອີເມວ: na_session@na.gov.la