ໃນໂອກາດອັນສະຫງ່າລາສີ ທີ່ມີຄວາມໝາຍສໍາຄັນທາງປະຫວັດ ສາດຄືດັ່ງກ່າວນີ້, ກອງປະຊຸມ ຂໍສະແດງຄວາມຂໍ່ານັບຮັບຕ້ອນອັນອົບອຸ່ນມາຍັງທ່ານ ບຸນຍັງ ວໍລະຈິດ, ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ທີ່ໄດ້ໃຫ້ກຽດເຂົ້າຮ່ວມກອງປະຊຸມຄັ້ງນີ້ ຢ່າງສຸດອົກສຸດໃຈ! (ຂໍຊົມເຊີຍ).

         ຂໍສະແດງຄວາມຂໍ່ານັບຊົມເຊີຍ ບັນດາທ່ານຜູ້ນໍາ, ອາດີດການນໍາຂັ້ນສູງ ຂອງພັກ-ລັດ, ບັນດາທ່ານນັກປະຕິວັດອາວຸໂສ, ຜູ້ຊົງຄຸນວຸດທິ, ບັນດາທ່ານສະມາຊິກສະພາແຫ່ງຊາດ, ອາດີດສະມາຊິກສະພາແຫ່ງຊາດ, ຜູ້ຕາງໜ້າອົງການຈັດຕັ້ງພັກ-ລັດ, ອົງການຈັດຕັ້ງແນວລາວສ້າງຊາດ, ສະ ຫະພັນນັກຮົບເກົ່າ, ອົງການຈັດຕັ້ງມະຫາຊົນ, ສະຖາບັນ, ນັກທຸລະກິດ ແລະ ທ່ານຜູ້ຕາງໜ້າພາກສ່ວນຕ່າງໆ ທີ່ໄດ້ໃຫ້ກຽດເຂົ້າຮ່ວມກອງປະຊຸມຄັ້ງນີ້ (ຂໍຊົມເຊີຍ).

ບັນດາທ່ານຜູ້ນໍາພັກ-ລັດ, ສະມາຊິກສະພາແຫ່ງຊາດ, ທ່ານຍິງທ່ານຊາຍທີ່ນັບຖື

         ເປັນໄລຍະເວລາ 3 ປີ, ທີ່ທົ່ວພັກ-ລັດ ແລະ ທົ່ວປວງຊົນລາວບັນດາເຜົ່າໃນທົ່ວປະເທດ ໄດ້ສຸມໃສ່ ຈັດຕັ້ງຜັນຂະຫຍາຍມະຕິກອງປະ ຊຸມໃຫຍ່ຄັ້ງທີ X ຂອງພັກ, ແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ VIII ໄດ້ຮັບຜົນສໍາເລັດໃນຫຼາຍດ້ານ. ສໍາລັບປີ 2018 ນີ້, ເຖິງວ່າສະພາບແວດລ້ອມພາຍໃນ ແລະ ສາກົນ ມີທັງສິ່ງທີ່ເອື້ອອໍານວຍ ແລະ ສິ່ງຫຍຸ້ງຍາກທ້າທາຍ ເປັນຕົ້ນ: ການກີດກັ້ນທາງດ້ານການຄ້າລະຫວ່າງປະເທດມະຫາອໍານາດ, ການຜັນຜວນຂອງລາຄານໍ້າມັນໃນຕະຫຼາດໂລກ, ໄພພິບັດທາງທໍາມະຊາດ ແລະ ອື່ນໆ ຊຶ່ງໄດ້ສົ່ງຜົນກະທົບຕໍ່ການພັດທະ ນາເສດຖະກິດ-ສັງຄົມ ຂອງໂລກ, ພາກພື້ນ ລວມທັງ ສປປ ລາວ ພວກເຮົາ. ສໍາລັບປະເທດພວກເຮົາ ໃນໄລຍະລະດູຝົນທີ່ຜ່ານມາ ຢູ່ຫຼາຍທ້ອງ ຖິ່ນໃນຂອບເຂດທົ່ວປະເທດ ແມ່ນໄດ້ຮັບຜົນກະທົບຢ່າງໜັກໜ່ວງ ຈາກໄພພິບັດທາງທໍາມະຊາດ,  ຊຶ່ງໄດ້ສ້າງຄວາມເສຍຫາຍໃຫ້ແກ່ຊີວິດ, ຊັບສິນ, ການຜະລິດຂອງປະຊາຊົນ ລວມທັງພື້ນຖານໂຄງລ່າງຕ່າງໆ, ແຕ່ດ້ວຍຄວາມເອົາໃຈໃສ່ຊີ້ນໍາ-ນໍາພາ ຢ່າງໃກ້ຊິດຂອງສູນກາງພັກ, ດ້ວຍຄວາມເປັນເຈົ້າການສູ້ຊົນບຸກບືນຂອງອົງການລັດຂັ້ນຕ່າງໆ ໂດຍສະເພາະ ລັດຖະບານ ກໍຄື ອົງການປົກຄອງທ້ອງຖິ່ນທຸກຂັ້ນ, ດ້ວຍຄວາມສາມັກຄີເປັນປຶກແຜ່ນບົນນໍ້າໃຈຮັກແພງ ຕອມຕຸ້ມຊ່ວຍເຫຼືອຊຶ່ງກັນ ແລະ ກັນ ໄດ້ ຮ່ວມກັນປະກອບທຶນຮອນ, ວັດຖຸສິ່ງຂອງ ແລະ ເຫື່ອແຮງຈາກປະຊາ ຊົນລາວບັນດາເຜົ່າ, ຈາກທຸກພາກສ່ວນທັງພາຍໃນ ແລະ ຕ່າງປະເທດ, ບັນດາປະເທດເພື່ອນມິດ, ອົງການຈັດຕັ້ງສາກົນ, ເຮັດໃຫ້ພວກເຮົາສາ ມາດຜ່ານຜ່າຄວາມຫຍຸ້ງຍາກ ແລະ ສາມາດຟື້ນຟູສະພາບການດັ່ງກ່າວເຂົ້າສູ່ປົກກະຕິ. ລັດຖະບານສາມາດຈັດຕັ້ງປະຕິບັດ ບັນດາຄາດໝາຍໃຫຍ່ທີ່ກໍານົດໄວ້ໃນມະຕິກອງປະຊຸມສະໄໝສາມັນເທື່ອທີ 4 ແລະ 5 ຂອງສະພາແຫ່ງຊາດຊຸດທີ VIII, ກ່ຽວກັບເສດຖະກິດມະຫາພາກ, ດ້ານແຫຼ່ງທຶນພັດທະນາ, ດ້ານວັດທະນະທໍາ-ສັງຄົມ, ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ກໍ່ຄື ດ້ານຊັບພະຍາກອນທໍາມະຊາດ ແລະ ສິ່ງແວດລ້ອມ ໄດ້ຮັບຜົນສໍາເລັດໃນຫຼາຍດ້ານ ເປັນຕົ້ນ: ປະ ເທດຊາດ ສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບໂດຍພື້ນຖານ. ພິເສດ ລັດຖະບານ ໄດ້ເອົາໃຈໃສ່ຊີ້ນໍາ ແລະ ຈັດຕັ້ງປະຕິບັດຫຼາຍມາດຕະການຊຸກຍູ້ເສດຖະກິດ ຢ່າງເປັນຮູບປະທໍາ ແລະ ໄດ້ຮັບຜົນສໍາເລັດ ເຊັ່ນ: ສາມາດບໍລິຫານ ແລະ ປະຕິບັດນະໂຍບາຍເງິນຕາ ຢູ່ໃນກອບ ທີ່ສະພາແຫ່ງຊາດກໍານົດໄວ້; ໄດ້ເອົາໃຈໃສ່ ປັບປຸງກົນໄກ ແລະ ຮູບການຈັດເກັບລາຍຮັບດ້ວຍລະບົບທັນສະໄໝ, ໄດ້ປະຕິບັດມາດຕະການກວດສອບ, ກວດກາລັດ ໃນບັນດາໂຄງການລົງທຶນຂອງລັດ ຊຶ່ງສາມາດເກັບກູ້ ແລະ ປະຍັດງົບປະມານຂອງລັດໄດ້ຫຼາຍພໍສົມຄວນ, ໄດ້ຍົກສູງປະສິດທິພາບໃນການບໍລິຫານ-ຄຸ້ມຄອງລັດດ້ວຍລະບຽບກົດໝາຍດີຂຶ້ນ, ເອົາໃຈໃສ່ແກ້ໄຂປາກົດການຫຍໍ້ທໍ້ໃນສັງຄົມ ແລະ ປັບປຸງຊີວິດການເປັນຢູ່ຂອງປະຊາຊົນ ຢູ່ເຂດຊົນນະບົດດີຂຶ້ນເປັນກ້າວໆ.

         ເຖິງວ່າ, ຄວາມຫຍຸ້ງຍາກທາງດ້ານເສດຖະກິດ-ການເງິນ ຍັງເປັນບັນຫາທ້າທາຍຕໍ່ການພັດທະນາເສດຖະກິດ-ສັງຄົມ ພໍສົມຄວນ, ແຕ່ບັນ ດາຜົນງານ ແລະ ຜົນສໍາເລັດທີ່ຍາດມາໄດ້ໃນຊຸມປີຜ່ານມານັ້ນ, ໄດ້ກາຍ ເປັນບົດຮຽນອັນປະເສີດ ແລະ ເປັນພື້ນຖານສໍາຄັນໃຫ້ແກ່ການສ້າງບາດ ກ້າວ ແລະ ທ່ວງທ່າໃໝ່ແກ່ການພັດທະນາເສດຖະກິດ-ສັງຄົມຂອງປະ ເທດໃນຊຸມປີຕໍ່ໜ້າ, ພ້ອມທັງໄດ້ສ້າງຄວາມເຊື່ອໝັ້ນຂອງປະຊາຊົນຕໍ່ການນໍາພາຂອງພັກ, ການຄຸ້ມຄອງບໍລິຫານລັດຂອງພວກເຮົາ.

 

ບັນດາທ່ານທີ່ນັບຖື ແລະ ຮັກແພງ! 

ກອງປະຊຸມຄັ້ງນີ້ ຈະໄດ້ສຸມໃສ່ພິຈາລະນາ, ຕົກລົງ ບັນຫາສໍາຄັນທີ່ເປັນພື້ນຖານຂອງປະເທດຊາດ ດັ່ງນີ້:

1. ຮັບຟັງບົດລາຍງານຂອງ ທ່ານ ນາຍົກລັດຖະມົນຕີ ກ່ຽວກັບ ການເຄື່ອນໄຫວວຽກງານພົ້ນເດັ່ນຂອງລັດຖະບານ ໃນໄລຍະຜ່ານມາ ແລະ ທິດທາງຈຸດສຸມໃນປີຕໍ່ໜ້າ;
2. ພິຈາລະນາ, ຮັບຮອງເອົາບົດລາຍງານ ກ່ຽວກັບ ສະພາບການຈັດຕັ້ງປະຕິ ບັດແຜນພັດ​ທະນາ​ເສດຖະກິ​ດ-ສັງຄົມ, ​ແຜນ​ງົບປະມານ​ແຫ່ງ​ລັດ, ແຜນເງິນຕາ ປີ 2018 ແລະ ທິດ​ທາງແຜນການ ປະ​ຈໍາປີ 2019 ຂອງລັດຖະບານ;
3. ພິຈາລະນາ, ຮັບຮອງເອົາການຊີ້ແຈງຂອງລັດຖະບານ ກ່ຽວກັບຄຸນນະພາບການກໍ່ສ້າງ ແລະ ການສ້ອມແປງຖະໜົນຫົນທາງ; ຄຸນນະພາບການບໍລິການ ການປິ່ນປົວຢູ່ໂຮງໝໍເມືອງ ແລະ ສຸກສາລາ. ການຊີ້ແຈງອະທິ ບາຍຂອງອົງການໄອຍະການປະຊາຊົນສູງສຸດ ກ່ຽວກັບການປະຕິບັດກົດໝາຍວ່າດ້ວຍຂໍ້ຜູກພັນໃນສັນຍາ ແລະ ນອກສັນຍາ ກ່ຽວກັບ ການຫັນ ການລະເມີດສັນຍາກູ້ຢືມມາດໍາເນີນເປັນຄະດີອາຍາ ແລະ ທິດທາງແກ້ໄຂໃນຕໍ່ໜ້າ. ນອກຈາກນັ້ນ, ໃນກອງປະຊຸມຄັ້ງນີ້ ຍັງຈະໄດ້ຮັບຟັງການຊີ້ແຈງອະທິບາຍເພີ່ມເຕີມຈາກທ່ານນາຍົກລັດຖະມົນຕີ, ບັນດາທ່ານລັດຖະມົນ ຕີ ຈາກກະຊວງ, ອົງການທີ່ກ່ຽວຂ້ອງຈໍານວນໜຶ່ງ ທີ່ພົວພັນເຖິງບັນຫາທີ່ພົ້ນເດັ່ນໃນການຄຸ້ມຄອງ-ບໍລິຫານລັດ ທາງດ້ານເສດຖະກິດ-ສັງຄົມ ຊຶ່ງສະມາຊິກສະພາແຫ່ງຊາດນໍາມາສະເໜີໃນກອງປະຊຸມຄັ້ງນີ້;
4. ຮັບຟັງ ແລະ ພິຈາລະນາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດມະຕິ ຂອງກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ VIII ສະບັບເລກທີ 079/ສພຊ, ລົງວັນທີ 17 ພະຈິກ 2017 ວ່າດ້ວຍການພັດທະນາຊົນນະບົດ ແລະ ລຶບລ້າງຄວາມ ທຸກຍາກ ຕິດພັນກັບເປົ້າໝາຍການພັດທະນາແບບຍືນຍົງ;
5. ພິຈາລະນາ, ຮັບຮອງເອົາ ບົດລາຍງານຂອງອົງການກວດ​ສອບ​ແຫ່ງ​ລັດ ກ່ຽວ​ກັບ ​ການຈັດ​ຕັ້ງ​ປະຕິບັດ​ແຜນການ​ເຄື່ອນ​ໄຫວ​ວຽກ​ງານ ປະ​ຈໍາປີ 2018 ​ແລະ ​ທິດ​ທາງແຜນການ​ ປະ​ຈໍາປີ 2019; ບົດລາຍງານຜົນການກວດ​ສອບ​ບົດສະຫຼຸບ​ຂາດ​ຕົວ ການ​ຈັດ​ຕັ້ງ​ປະຕິບັດແຜນ​ງົບປະມານ​ແຫ່ງ​ລັດ ປະຈຳປີ 2017;
6. ພິຈາລະນາ, ຮັບຮອງເອົາ ບົດລາຍງານຂອງອົງການກວດກາລັດ ຖະບານ ກ່ຽວກັບ ການກວດກາ ຕາມຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານສົກປີ 2013-2014; 2014-2015 ແລະ 2015-2016;
7. ພິຈາລະນາ, ຮັບຮອງເອົາການແຕ່ງຕັ້ງຜູ້ວ່າການທະນາຄານ ແຫ່ງ ສປປ ລາວ ຕາມການສະເໜີຂອງ  ທ່ານນາຍົກລັດຖະມົນຕີ;
8. ພິຈາລະນາ, ຮັບຮອງເອົາບົດສະເໜີຂອງລັດຖະບານ ກ່ຽວກັບຊົນເຜົ່າບຣູ.
9. ພິຈາລະນາ, ຮັບຮອງເອົາ ບົດລາຍງານຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ກ່ຽວ​ກັບ​ການຈັດ​ຕັ້ງ​ປະຕິ ບັດ​ ແຜນການ​ເຄື່ອນ​ໄຫວ​ວຽກ​ງານກາງ​ສະ​ໄໝ (2016-2018), ປະຈໍາປີ 2018, ທິດທາງແຜນການ ຮອດປີ 2020 ແລະ ວຽກງານຈຸດສຸມ ປະ​ຈໍາປີ 2019;
10. ພິຈາລະນາ, ຮັບຮອງເອົາ ບົດລາຍງານ ກ່ຽວ​ກັບ​ ການເຄື່ອນ ໄຫວວຽກງານ ກາງ​ສະ​ໄໝ ຂອງສະພາແຫ່ງຊາດ ຊຸດທີ VIII (2016-2018), ປະຈໍາປີ 2018, ທິດທາງແຜນການ ຮອດກອງປະຊຸມຄັ້ງປະຖົມມະລືກ ຂອງສະພາແຫ່ງຊາດ ຊຸດທີ IX​ ແລະ​ ແຜນວຽກຈຸດສຸມ​ ປະ​ຈໍາປີ 2019.
11. ພິຈາລະນາ, ຮັບຮອງເອົາແຜນການສ້າງ ແລະ ປັບປຸງກົດໝາຍ;ແຜນການຕິດຕາມກວດກາ ປະຈໍາປີ 2019 ຂອງສະພາແຫ່ງຊາດ;
12. ພິຈາລະນາ ແລະ ຮັບຮອງ ການສ້າງ ແລະ ປັບປຸງຮ່າງກົດໝາຍ ຈໍານວນ 8 ສະບັບ ຄື:

- ໃນຂົງເຂດເສດຖະກິດ 4 ສະບັບ,

- ຂົງເຂດວັດທະນະທໍາ-ສັງຄົມ 2 ສະບັບ,

- ຂົງເຂດປົກຄອງ ແລະ ຍຸຕິທໍາ 1 ສະບັບ ແລະ

- ຂົງເຂດຕ່າງປະເທດ 1 ສະບັບ.

    ນອກນັ້ນ, ກອງປະຊຸມຍັງຈະໄດ້ປະກອບຄວາມເຫັນໃສ່ຮ່າງກົດໝາຍວ່າດ້ວຍ ທີ່ດິນ (ສະບັບປັບປຸງ) ຊຶ່ງເປັນຮ່າງກົດໝາຍທີ່ສໍາຄັນ ໃນການຈັດຕັ້ງຜັນຂະຫຍາຍມະຕິ ຂອງຄະນະບໍລິຫານງານສູນກາງພັກ ວ່າດ້ວຍການເພີ່ມທະວີວຽກງານຄຸ້ມຄອງ ແລະ ພັດທະນາທີ່ດິນໃນໄລຍະໃໝ່ສະບັບເລກທີ 026/ຄບສພ, ລົງວັນທີ 03/08/2017 ໃຫ້ເປັນອັນລະອຽດ ເພື່ອເພີ່ມທະວີການຄຸ້ມຄອງທີ່ດິນ ແລະ ສົ່ງ ເສີມການນໍາໃຊ້ທີ່ດິນ ຊຶ່ງເປັນທ່າແຮງທາງດ້ານຊັບພະຍາກອນ ໃຫ້ມີປະສິດທິຜົນ ແກ່ການພັດທະນາເສດຖະກິດແຫ່ງຊາດ ກໍ່ຄື ການສົ່ງເສີມການຜະລິດ ແລະ ປັບປຸງຊີວິດການເປັນຢູ່ຂອງປະຊາຊົນລາວບັນດາເຜົ່າໃຫ້ນັບມື້ນັບດີຂຶ້ນ.

ບັນດາທ່ານທີ່ນັບຖື ແລະ ຮັກແພງ!

         ເນື້ອໃນທີ່ນໍາມາພິຈາລະນາ, ຮັບຮອງໃນກອງປະຊຸມຄັ້ງນີ້, ລ້ວນແຕ່ແມ່ນບັນຫາສໍາຄັນທີ່ເປັນພື້ນຖານຂອງຊາດ ໃນການສືບຕໍ່ຈັດຕັ້ງຜັນຂະຫຍາຍມະຕິ X ຂອງພັກ ກໍ່ຄື ແຜນພັດທະນາເສດຖະກິດ-ສັງຄົມ, ແຜນງົບປະມານ ແຫ່ງລັດ 5 ປີ ໃຫ້ເປັນແຜນລະອຽດປະຈໍາປີ 2019 ສະນັ້ນ, ຕາງໜ້າຄະນະປະຈໍາສະພາແຫ່ງຊາດ, ຂ້າພະເຈົ້າຮຽກຮ້ອງມາຍັງບັນດາທ່ານສະມາ ຊິກສະພາແຫ່ງຊາດ ຈົ່ງໄດ້ເຊີດຊູຄວາມຮັບຜິດຊອບ ການເມືອງໃນການຄົ້ນຄວ້າພິຈາລະນາຢ່າງເລິກເຊິ່ງ, ບົນພື້ນຖານສະພາບຄວາມເປັນຈິງທາງດ້ານເສດຖະກິດ-ສັງຄົມຂອງປະເທດ ແລະ ຂອງທ້ອງ ຖິ່ນຕົນ ໃນຖານະທີ່ເປັນຕົວແທນຂອງປະຊາຊົນ, ເສີມຂະຫຍາຍສິດ ປະ ຊາທິປະໄຕ ແລະ ຄວາມສາມັກຄີ ປະກອບຄວາມຄິດເຫັນ,  ພິຈາລະນາ ແລະ ຮັບຮອງເອົາເນື້ອໃນຂອງກອງປະຊຸມຄັ້ງນີ້ ໃຫ້ບັນລຸຜົນຕາມຈຸດປະ ສົງຄາດໝາຍທີ່ວາງໄວ້, ທັງສາມາດສະໜອງຕອບຄວາມຮຽກຮ້ອງຕ້ອງ ການ ແລະ ຄວາມຄອງຄອຍຂອງປະຊາຊົນໃນທົ່ວປະເທດ.

         ບົນຈິດໃຈດັ່ງກ່າວ, ຂ້າພະເຈົ້າ ປະກາດໄຂກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ VIII ຢ່າງເປັນທາງການ ນັບແຕ່ເວລານີ້ເປັນຕົ້ນໄປ.

 

(ຂໍຂອບໃຈ)