ຮອງປະທານຄະນະ ສສຊ ເພດຍິງ ເຜີຍແຜ່ຜົນສຳເລັດກອງປະຊຸມ ສະໄໝສາມັນເທື່ອທີ 5

25/10/2018 00:00 -

(ສພຊ) ລະຫວ່າງວັນທີ 7-13 ຕຸລາ 2018, ທ່ານ ນາງ ທະວີໄສ ພະສະຖານ ຮອງປະທານຄະນະສະມາຊິກສະພາແຫ່ງຊາດ (ສສຊ) ເພດຍິງ, ສສຊ ປະຈໍາເຂດເລືອກຕັ້ງທີ 15 ແຂວງຈໍາປາສັກ ພ້ອມດ້ວຍຄະນະ ໄດ້ເຄື່ອນໄຫວຜັນຂະຫຍາຍ ແລະ ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ (ສພຊ) ຊຸດທີ VIII ແລະ ຜົນສໍາເລັດກອງປະຊຸມສະໄໝສາມັນເທື່ອທີ 5 ຂອງສະພາປະຊາຊົນແຂວງ (ສພຂ) ຈໍາປາສັກ ຊຸດທີ I, ຢູ່ເມືອງມູນລະປະໂມກ ແຂວງຈໍາປາສັກ ເຊິ່ງປະກອບມີ 5 ບ້ານຄື: ບ້ານປາໂມກ, ບ້ານຫົວດອນນາງລອຍ, ບ້ານໃໝ່, ບ້ານສະພັງໃຕ້, ບ້ານນາດີ; ເຂົ້າຮ່ວມໃນຄັ້ງນີ້ ມີທ່ານ ບຸນທຽນ ທອງແກ້ວ ຮອງປະທານ ສພຂ ຈໍາປາສັກ, ທ່ານ ສີທອງ ກິ່ງກ້ານ ຮອງຫົວໜ້າຫ້ອງວ່າການປົກຄອງເມືອງມູນລະປະໂມກ, ບັນດາເລຂາພັກກຸ່ມບ້ານ, ອົງການປົກຄອງຂັ້ນບ້ານ ພະນັກງານ-ລັດຖະກອນ, ທະຫານ, ຕໍາຫລວດ ຕະຫລອດຮອດປະຊາຊົນແຕ່ລະບ້ານເຂົ້້າຮ່ວມ ເຊິ່ງມີຜູ້ເຂົ້າຮ່ວມທັງໝົດ 647 ຄົນ ຍິງ 325 ຄົນ.

ການເຄື່ອນໄຫວຄັ້ງນີ້ ຜູ້ເຂົ້າຮ່ວມໄດ້ຮັບຟັງການເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 5 ຂອງ ສພຊ ຊຸດທີ VIII ເຊິ່ງປະກອບດ້ວຍບັນດາເນື້ອໃນຈິດໃຈສໍາຄັນຂອງກອງປະຊຸມຄື: ມະຕິວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດປະຈໍາ 4 ເດືອນຜ່ານມາ, ຄາດຄະເນການປະຕິບັດແຜນການ 6 ເດືອນຕົ້ນປີ ແລະ ທິດທາງແຜນການວຽກງານຈຸດສຸມ 6 ເດືອນທ້າຍປີ 2018; ມະຕິວ່າດ້ວຍການຮັບຮອງເອົາແຜນແມ່ບົດຈັດສັນທີ່ດິນແຫ່ງຊາດ ຮອດປີ 2030; ມະຕິວ່າດ້ວຍການຮັບຮອງເອົາການແຕ່ງຕັ້ງສະມາຊິກສະພາຜູ້ພິພາກສາຂອງສານປະຊາຊົນສູງສຸດ; ມະຕິວ່າດ້ວຍການຊີ້ແຈງຂອງລັດຖະບານຕໍ່ຄໍາຊັກຖາມຂອງສະພາແຫ່ງຊາດ ແລະ ບັນດາກົດໝາຍທີ່ສະພາແຫ່ງຊາດໄດ້ພິຈາລະນາຮັບຮອງການສ້າງ ແລະ ປັບປຸງກົດໝາຍຈໍານວນ 13 ສະບັບ, ໃນນີ້ມີກົດໝາຍທີ່ສ້າງໃໝ່ 5 ສະບັບ.

          ຈາກນັ້ນ, ກໍໄດ້ຮັບຟັງການເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 5 ຂອງ ສພຂ ຈໍາປາສັກ ຊຸດທີ I ໂດຍການນໍາເອົາບັນດາເນື້ອໃນສໍາຄັນຂອງກອງປະຊຸມດັ່ງກ່າວລົງເຜີຍແຜ່ເຊັ່ນ: ມະຕິວ່າດ້ວຍການຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດກິດ-ສັງຄົມ ປະຈໍາ 6 ເດືອນຕົ້ນປີ ແລະແຜນການວຽກງານຈຸດສຸມ 6 ເດືອນທ້າຍປີ 2018; ມະຕິວ່າດ້ວຍການຮັບຮອງເອົາຂໍ້ຕົກລົງຂອງເຈົ້າແຂວງວ່າດ້ວຍການປະເມີນມູນຄ່າທີ່ດິນ 6 ເມືອງ; ບົດລາຍງານການເຄື່ອນໄຫວປະຈໍາ 6 ເດືອນຕົ້ນປີ ແລະ ທິດທາງຈຸດສຸມ 6 ເດືອນຈຸດສຸມທ້າຍປີ 2018 ແລະ ການຊີ້ແຈງຂອງບັນດາພະແນກການອ້ອມຂ້າງແຂວງກ່ຽວກັບການແກ້ໄຂບັນຫາສະພາບພົ້ນເດັ່ນທີ່ເກີດຂຶ້ນໃນສັງຄົມ ຕາມການລາຍງານຂອງກອງປະຊຸມສະໄໝສາມັນເທື່ອທີ 5 ຂອງ ສພຂ ຈໍາປາສັກ ຊຸດທີ່ I.

ພ້ອມນັ້ນ ຄະນະກໍໄດ້ຮັບຟັງການປະກອບຄໍາຄິດຄໍາເຫັນ ແລະ ຄໍາສະເໜີຂອງພໍ່ແມ່ປະຊາຊົນ ທີ່ໄດ້ສະເໜີມາຍັງບັນດາພາກສ່ວນທີ່ກ່ຽວຂ້ອງໃຫ້ຊ່ວຍຄົ້ນຄວ້າ, ແກ້ໄຂຈຸດບົກຜ່ອງຕ່າງໆ ເພື່ອເຮັດໃຫ້ຊີວິດການເປັນຢູ່ຂອງພໍ່ແມ່ປະຊາຊົນດີຂຶ້ນເປັນຕົ້ນ:  1) ຄ່າທໍານຽມໃນການຊົມໃຊ້ກະແສໄຟຟ້າເຂົ້າໃນການເຮັດນາແຊງ, ການປູກຝັງເຮັດສວນໃນລະດູແລ້ງ ແມ່ນສູງຫລາຍ ເຊິ່ງເຮັດໃຫ້ຕົ້ນທຶນຂອງການຜະລິດສູງ ເຮັດໃຫ້ປະຊາຊົນບໍ່ສາມາດທໍາການຜະລິດຜົນລະປູກໄດ້ຢ່າງຕໍ່ເນື່ອງ;  2) ບໍລິສັດທີ່ມາສໍາປະທານເຮັດທ່າບັກຂ້າມແມ່ນໍ້າຂອງ ແມ່ນໄດ້ເຮັດໃຫ້ດິນເຮືອນຂອງປະຊາຊົນຢູ່ເຂດໃກ້ຄຽງທ່າບັກດັ່ງກ່າວຖືກຟອງນໍ້າຈາກເຮືອບັກ ເຊາະເຈື່ອນ ແຕ່ບໍ່ໄດ້ຮັບການຊົດເຊີຍ ຫລື ທົດແທນໃດໆ;  3) ບັນຫາຂອງຄູ-ອາຈານແມ່ນມີລັກສະນະເຫລືອບໍ່ພໍ ຍ້ອນການບັນຈຸຄູສອນ ແມ່ນຍັງບໍ່ໄດ້ຕາມສາຂາວິຊາທີ່ມີຄວາມຕ້ອງການ, ສະເໜີໃຫ້ຮັບລັດຖະກອນຄູຕາມສາຂາ-ວິຊາທີ່ເຫັນວ່າມີຄວາມຕ້ອງການແທ້ໆ ເພື່ອຕອບສະໜອງຄວາມຕ້ອງການຂອງການຮຽນ-ການສອນ;  4) ການເຮັດປຶ້ມສໍາມະໂນຄົວ ແລະ ບັດປະຈໍາຕົວຢູ່ພາຍໃນເມືອງ ແມ່ນໄດ້ເສຍຄ່າທໍານຽມເຂົ້າໃນການເຮັດເອກະສານດັ່ງກ່າວສູງຫລາຍ, ສະເໜີໃຫ້ຂັ້ນເທິງກວດກາ ແລະ ປັບປຸງຄືນ ເພື່ອໃຫ້ມີຄວາມເໝາະສົມ ແລະ ສອດຄ່ອງກັບກົດໝາຍທີ່ໄດ້ກໍານົດໄວ້;   5) ບັນຫາການດູດຫີນ, ດູດຊາຍຂອງບັນດາບໍລິສັດທີ່ມາສໍາປະທານ ແມ່ນໄດ້ລົບກວນການທໍາມາຫາກິນ (ການຫາປາ) ຂອງປະຊາຊົນພາຍໃນບ້ານປາໂມກ ເຊິ່ງມັນໄດ້ສົ່ງສຽງໃນຄື້ນນໍ້າ ເຮັດໃຫ້ການຫາປາບໍ່ສະດວກຄືເມື່ອກ່ອນ;  6) ການສຶກສາຂອງລູກຫລານພາຍໃນບ້ານ ຫລັງຈາກຮຽນຈົບວິຊາສະເພາະມາແລ້ວຍັງບໍ່ມີວຽກເຮັດງານທໍາ;  7) ປາກົດການຫຍໍ້ທໍ້ກ່ຽວກັບບັນຫາການລັກລອບຄ້າຂາຍຢາເສບຕິດພາກສ່ວນກ່ຽວຂ້ອງຍັງບໍ່ທັນມີມາດຕະການທີ່ເຂັ້ມງວດຕໍ່ຜູ້ຄ້າຂາຍເທົ່າທີ່ຄວນ ຍ້ອນວ່າທີ່ຜ່ານມາເຈົ້າໜ້າທີ່ຂັ້ນບ້ານຈັບໄດ້ຜູ້ທີ່ຄ້າຂາຍຢາເສບຕິດໄປມອບໃຫ້, ແຕ່ບໍ່ພໍເທົ່າໃດມື້ກໍເຫັນຜູ້ກ່ຽວກັບມາ ເຊິ່ງເຮັດໃຫ້ເຈົ້າໜ້າທີ່ໆຈັບພວກກ່ຽວນັ້ນມີຄວາມຢ້ານກົວໃນການດໍາລົງຊີວິດ ແລະ ບໍ່ກ້າປະຕິບັດໜ້າທີ່ວຽກງານຂອງຕົນອີກຕໍ່ໄປ;  8) ບັນຫາເສັ້ນທາງແຕ່ເທສະບານເມືອງໄປເຖິງບ້ານ ປັດຈຸບັນນີ້ ການໄປມາຫາສູ່ກັນ ແມ່ນມີຄວາມທຸລະກັນດານຫລາຍ ເນື່ອງຈາກວ່າເປັນທາງດິນແດງ ເມື່ອຮອດລະດູຝົນແມ່ນຈະເປັນຂຸມ, ເປັນບວກເລິກ ແລະ ປັດຈຸບັນນີ້ກໍຍັງເປັນຂຸມເລິກຢູ່;  9) ປະຊາຊົນ ສະເໜີກ່ຽວກັບການນໍາໃຊ້ໄຟຟ້າພາຍໃນບ້ານແມ່ນຍັງບໍ່ມີຄວາມພຽງພໍເທື່ອ ເຊິ່ງໄລຍະຜ່ານມາແມ່ນໄດ້ມີໂຄງການຢັ່ງສາຍໄຟຟ້າມາຮອດບ້ານ ເປັນເວລາ 2 ປີກວ່າແລ້ວ ແຕ່ຍັງບໍ່ມີໝໍ້ແບ່ງໄຟເທື່ອ, ສະນັ້ນ ຈຶ່ງສະເໜີໃຫ້ພາກສ່ວນກ່ຽວຂ້ອງນໍາໝໍ້ແບ່ງມາໃສ່ ເພື່ອຈະໄດ້ເຮັດໃຫ້ປະຊາຊົນພາຍໃນບ້ານໄດ້ນໍາໃຊ້ໄຟຟ້າພຽງພໍ.

ຫລັງຈາກໄດ້ຮັບຟັງບັນດາຂໍ້ສະເໜີ ຈາກປະຊາຊົນແລ້ວ ຄະນະກໍໄດ້ຊີ້ແຈງອະທິບາຍ, ແນະນໍາຕາມກົດໝາຍ, ລະບຽບການ ເພື່ອໃຫ້ປະຊາຊົນເຂົ້າໃຈ ພ້ອມທັງຊຸກຍູ້, ປຸກລະດົມໃຫ້ປະຊາຊົນມີສ່ວນຮ່ວມຢ່າງກວ້າງຂວາງ ເຂົ້າໃນການພັດທະນາເສດຖະກິດ-ສັງຄົມ, ມີພັນທະໃນການສ້າງສາ ແລະ ພັດທະນາປະເທດຊາດ.

ໃນໂອກາດນີ້, ທ່ານ ນາງ ທະວີໄສ ພະສະຖານ ພ້ອມດ້ວຍຄະນະ ຍັງໄດ້ມອບເຄື່ອງຊ່ວຍເຫລືອໃຫ້ປະຊາຊົນ ຜູ້ທີ່ໄດ້ຮັບຜົນກະທົບຈາກອຸທົກກະໄພ ໃນ 7 ບ້ານ ຄື: ບ້ານກະດັນ, ບ້ານໜອງບົວທອງ, ບ້ານປາໂມກ, ບ້ານຫົວດອນນາງລອຍ, ບ້ານໃໝ່, ບ້ານສະພັງໃຕ້ ແລະ ບ້ານນາດີ; ເຊິ່ງເຄື່ອງຊ່ວຍເຫລືອໃນຄັ້ງນີ້ ມີ: ເຄື່ອງນຸ່ງຫົ່ມ , ເຄື່ອງບໍລິໂພກ, ເຄື່ອງອຸປະໂພກ ແລະ ເຄື່ອງໃຊ້ທີ່ຈໍາເປັນແກ່ແມ່ຍິງຈໍານວນໜຶ່ງ ລວມມູນຄ່າ 11 ລ້ານກວ່າກີບ ເພື່ອຊ່ວຍເຫລືອບັນເທົາທຸກ ແລະ ເປັນກໍາລັງໃຈໃຫ້ກັບປະຊາຊົນ.