ເຝິກອົບອົມວຽກງານຄຸ້ມຄອງ, ພັດທະນາບຸກຄະລາກອນ ແລະວຽກງານກວດກາ

25/10/2018 00:00 -

(ສພຊ) ໂດຍການໃຫ້ທຶນຊ່ວຍເຫລືອລ້າຂອງໂຄງການເຊກາ (Citizen Engagement for Good Governance, Accountability and the Rule of Law-CEGGA) ກົມຈັດຕັ້ງພະນັກງານ ແລະ ກົມກວດກາ ຄະນະເລຂາທິການສະພາແຫ່ງຊາດ (ສພຊ) ໄດ້ຈັດກອງປະຊຸມເຝິກອົບຮົມວຽກງານຄຸ້ມຄອງ, ພັດທະນາບຸກຄະລາກອນ ແລະ ວຽກງານກວດກາໃຫ້ລັດຖະກອນຂອງ ສພຊ ແລະ ສະພາປະຊາຊົນຂັ້ນແຂວງ (ສພຂ) ໃນລະຫວ່າງວັນທີ 20-23 ຕຸລາ 2018 ທີ່ທ່າລາດ ແຂວງວຽງຈັນ ໂດຍການເປັນປະທານຂອງທ່ານ ນາງ ສວນສະຫວັນ ວິຍະເກດ ເລຂາທິການ ສພຊ; ມີທ່ານ ສຸບັນ ສະວະບຸດ ຮອງເລຂາທິການ, ບັນດາທ່ານຫົວໜ້າ-ຮອງຫົວໜ້າກົມຈັດຕັ້ງ-ພະນັກງານ ແລະ ກົມກວດກາ ພ້ອມດ້ວຍຕາງໜ້າພະນັກງານລັດຖະກອນ ແລະ ລັດຖະກອນວິຊາການຂອງ ສພຊ ທີ່ກ່ຽວຂ້ອງເຂົ້າຮ່ວມ.

          ທັງນີ້, ກໍເພື່ອຍົກສູງບົດບາດ, ໜ້າທີ່ຮັບຜິດຊອບ ແລະ ຫົວຄິດປະດິດສ້າງຂອງພະນັກງານ-ລັດຖະກອນ ສພຂ ໃນການຈັດຕັ້ງປະຕິບັດວຽກງານຄຸ້ມຄອງພະນັກງານ-ລັດຖະກອນ ໃຫ້ມີປະສິດທິພາບ ໂດຍສະເພາະການຍົກສູງຄວາມຮູ້ ແລະ ຄວາມເຂົ້າໃຈຢ່າງລະອຽດຕໍ່ບັນດານິຕິກຳຕ່າງໆເຊັ່ນ: ການຈັດຕັ້ງປະຕິບັດກົດໝາຍວ່າດ້ວຍພະນັກງານ-ລັດຖະກອນ, ກົດໝາຍວ່າດ້ວຍປະກັນສັງຄົມ, ການເຮັດສັນຍາກັບລັດຖະກອນໃໝ່, ການກຳນົດຕຳແໜ່ງບໍລິຫານປະເພດຕ່າງໆຂອງ ສພຊ ແລະ ສພຂ ແລະ ອື່ນໆ; ເພື່ອເຮັດໃຫ້ການຈັດຕັ້ງປະຕິບັດຕົວຈິງມີຄວາມຖືກຕ້ອງເປັນເອກະພາບ ກ່ອນນຳສະເໜີຂັ້ນເທິງພິຈາລະນາຕາມຂັ້ນຕອນ ທັງມີຄວາມສະດວກ, ສອດຄ່ອງຕາມລະບຽບການທີ່ໄດ້ກຳນົດໄວ້ ໃຫ້ມີປະສິດທິພາບ ແລະ ປະສິດທິຜົນເພີ່ມຂຶ້ນ; ເພື່ອເຮັດໃຫ້ລັດຖະກອນ ກົມຈັດຕັ້ງ-ພະນັກງານ, ກົມກວດກາ ແລະ ສພຂ ສາມາດຮັບຮູ້ ແລະ ເຂົ້າໃຈຢ່າງຖືກຕ້ອງກ່ຽວກັບການຕິດຕາມກວດກາໂຄງການລົງທຶນຂອງລັດເລີ່ມແຕ່ຫົວທີ ເພື່ອປ້ອງກັນການລະເມີດກົດໝາຍ, ລະບຽບການ ແລະ ພຶດຕິກຳອື່ນທີ່ເປັນການສໍ້ລາດບັງຫລວງ ແນໃສ່ເຮັດໃຫ້ໂຄງການລົງທຶນຂອງລັດ ໄດ້ຮັບການຈັດຕັ້ງປະຕິບັດດ້ວຍຄວາມໂປ່ງໃສ, ປະຢັດ ແລະ ມີປະສິດທິຜົນສູງ, ກຳໄດ້ສະພາບການຂໍ້ມູນການຈັດຕັ້ງປະຕິບັດໂຄງການລົງທຶນຂອງລັດ ແນໃສ່ຍົກທັດສະນະຄຸນທາດການເມືອງ ແລະ ຄຸນສົມບັດສິນທຳປະຕິວັດ ໃຫ້ມີຄວາມໜັກແໜ້ນເຂັ້ມແຂງກວ່າເກົ່າ; ປັບປຸງວຽກງານການຈັດຕັ້ງ-ພະນັກງານ ແລະ ວຽກງານກວດກາໃຫ້ມີຄຸນນະພາບ, ມີການເຄື່ອນໄຫວປົກກະຕິ, ຕໍ່ເນື່ອງ ແລະ ສາມາດຮັບປະກັນຄວາມຖືກຕ້ອງ.

          ທ່ານ ນາງ ສວນສະຫວັນ ວິຍະເກດ ໄດ້ມີຄຳເຫັນໃນພິທີເປີດກອງປະຊຸມວ່າ: ພະນັກງານມີບົດບາດສຳຄັນ ເປັນຜູ້ຕັດສິນຜົນໄດ້ຜົນເສຍໃນການປະຕິບັດແນວທາງນະໂຍບາຍຂອງພັກ-ລັດຂອງພວກເຮົາ ຍິ່ງມີຄວາມຈຳເປັນຕ້ອງມີຖັນແຖວພະນັກງານທີ່ມີຄວາມຮູ້, ຄວາມສາມາດ, ມີຄຸນສົມບັດສິນທຳປະຕິວັດ, ມີທາດແທ້ຫລັກໝັ້ນການເມືອງທີ່ໜັກແໜ້ນ, ມີລະບຽບວິໄນ, ເຄົາລົບ ແລະ ປະຕິບັດຕາມລະບຽບກົດໝາຍຢ່າງເຂັ້ມງວດ ດັ່ງນັ້ນ, ກອງປະຊຸມເຝິກອົບຮົມວຽກງານຄຸ້ມຄອງ ແລະ ພັດທະນາບຸກຄະລາກອນໃນຄັ້ງນີ້ ຈະເປັນອີກບາດກ້າວໜຶ່ງທີ່ຈະຊ່ວຍຍົກສູງບົດບາດ, ໜ້າທີ່ຮັບຜິດຊອບ ແລະ ຫົວຄິດປະດິດສ້າງ ໃຫ້ແກ່ພະນັກງານ-ລັດຖະກອນຂອງຄະນະເລຂາທິການ ສພຊ ແລະ ສພຂ ເຂົ້າໃຈ ແລະ ເປັນເອກະພາບກັນໃນການຈັດຕັ້ງປະຕິບັດກົດໝາຍວ່າດ້ວຍລັດຖະກອນ ແລະ ກົດໝາຍທີ່ກ່ຽວຂ້ອງຈຳນວນໜຶ່ງ. ຄຽງຄູ່ກັນນັ້ນ, ຍັງຈະໄດ້ຮັບຮູ້ ແລະ ເຂົ້າໃຈຢ່າງຖືກຕ້ອງກ່ຽວກັບວຽກງານການຕິດຕາມກວດກາໂຄງການລົງທຶນຂອງລັດ ເພື່ອປ້ອງກັນການລະເມີດກົດໝາຍ, ກົດລະບຽບ ແລະ ພຶດຕິກຳອື່ນໆທີ່ເປັນການສໍ້ລາດບັງຫລວງ.