ຫົວໜ້າຄະນະຮັບຜິດຊອບວຽກງານເຂດເລືອກຕັ້ງ ເຮັດວຽກຮ່ວມກັບ ສພຂ ຫຼວງນ້ຳທາ

31/10/2018 00:00 -

(ສພຊ) ວັນທີ 19 ຕຸລາ 2018 ທີ່ຫ້ອງປະຊຸມສະພາປະຊາຊົນແຂວງ (ສພຂ) ຫລວງນໍ້າທາ, ທ່ານ ພົງສະເໜ່ ຍຸຕິທຳ ຫົວໜ້າຄະນະຮັບຜິດຊອບວຽກງານເຂດເລືອກຕັ້ງ ສະພາແຫ່ງຊາດ (ສພຊ)​ ພ້ອມດ້ວຍຄະນະ ໄດ້ເຄື່ອນໄຫວເຮັດວຽກ ແລະ ເປີດກອງປະຊຸມຮ່ວມກັບ ສພຂ ຫລວງນໍ້າທາ ກ່ຽວກັບການທາບທາມໂຄງປະກອບກົງຈັກການຈັດຕັ້ງ ແລະ ບຸກຄະລາກອນຂອງ ສພຂ ຊຸດທີ II ແລະ ການສ້າງ ແລະ ຈັດຕັ້ງປະຕິບັດນິຕິກໍາລຸ່ມກົດໝາຍ 5 ສະບັບ ເຂົ້າຮ່ວມມີບັນດາທ່ານຄະນະປະຈໍາສະພາປະຊາຊົນແຂວງ, ສະມາຊິກສະພາແຫ່ງຊາດ (ສສຊ), ສະມາຊິກສະພາປະຊາຊົນແຂວງ (ສສຂ), ຫົວໜ້າ-ຮອງຫົວໜ້າພະແນກການທີ່ກ່ຽວຂ້ອງ, ຄະນະເລຂາທິການ ສພຂ, ຫົວໜ້າ-ຮອງຫົວໜ້າຂະແໜງ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມທັງໝົດ 22 ທ່ານ.

         ກອງປະຊຸມ ໄດ້ຮັບຟັງການສະເໜີຈຸດປະສົງ ແລະ ວິທີການທາບທາມໂຄງປະກອບກົງຈັກການຈັດຕັ້ງ ແລະ ບຸກຄະລາກອນຂອງ ສພຂ ຊຸດທີ II  ເປັນຕົ້ນ: ໂຄງປະກອບຂອງ ສພຂ ຫລວງນ້ຳທາ ເຊິ່ງປະກອບມີ: ສະມາຊິກສະພາປະຊາຊົນແຂວງ, ຄະນະປະຈຳສະພາປະຊາຊົນແຂວງ, ປະທານ ສພຂ, ຮອງປະທານ ສພຂ, ຄະນະກຳມະການ ສພຂ, ປະທານຄະນະກຳມະການ ສພຂ, ຮອງປະທານຄະນະກຳມະການ ສພຂ, ເລຂາທິການ ສພຂ, ຮອງເລຂາທິການ ສພຂ, ໜ່ວຍສະມາຊິກສະພາປະຊາຊົນແຂວງ ປະຈຳເຂດເລືອກຕັ້ງຂັ້ນເມືອງ ແລະ ໜ່ວຍສະມາຊິກສະພາປະຊາຊົນແຂວງເພດຍິງຂັ້ນແຂວງ ແລະ ທາບທາມຄຸນລັກສະນະຂອງສະມາຊິກສະພາປະຊາຊົນແຂວງຫລວງນໍ້າທາ ຊຸດທີ II ປະກອບມີ: ອັດຕາສ່ວນສະມາຊິກສະພາປະຊາຊົນແຂວງ ເພດຍິງ-ເພດຊາຍ, ອັດຕາສ່ວນອາຍຸກະສຽນ, ອັດຕາສ່ວນຊົນເຜົ່າ ແລະ ອັດຕາສ່ວນສະມາຊິກສະພາປະຊາຊົນແຂວງ ມາຈາກແຕ່ລະຂົງເຂດວຽກງານ ; ພ້ອມດຽວກັນນັ້ນ, ຍັງໄດ້ສະເໜີຮ່າງນິຕິກຳລຸ່ມກົດໝາຍ 5 ສະບັບ ຂອງ ສພຂ ເປັນຕົ້ນຮ່າງມະຕິຄະນະປະຈຳສະພາປະຊາຊົນແຂວງ ວ່າດ້ວຍການລົງພົບປະປະຊາຊົນຂອງສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ປະກອບມີ 6 ໝວດ 17 ມາດຕາ; ຮ່າງມະຕິວ່າດ້ວຍການພິຈາລະນາ ແລະ ແກ້ໄຂຄຳຮ້ອງຂໍຄວາມເປັນທຳຂອງພົນລະເມືອງ ປະກອບມີ 10 ມາດຕາ; ຮ່າງມະຕິວ່າດ້ວຍລະບຽບການດຳເນີນກອງປະຊຸມຂອງ ສພຂ ປະກອບມີ 6 ໝວດ, 25 ມາດຕາ; ຮ່າງມະຕິວ່າດ້ວຍກົນໄກການພົວພັນ ແລະ ປະສານງານລະຫວ່າງຄະນະໜ່ວຍສະມາຊິກສະພາປະຊາຊົນເພດຍິງກັບບັນດາພາກສ່ວນທີ່ກ່ຽວຂ້ອງຢູ່ຂັ້ນແຂວງ ແລະ ເມືອງ ປະກອບມີ 9 ມາດຕາ ແລະ ຮ່າງມະຕິວ່າດ້ວຍການຈັດຕັ້ງ ແລະ ເຄື່ອນໄຫວຂອງຂະແໜງ ຊ່ວຍວຽກຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ປະກອບມີ 6 ໝວດ, 25 ມາດຕາ.

ຈາກນັ້ນ, ບັນດາທ່ານທີ່ເຂົ້າຮ່ວມກອງປະຊຸມ ໄດ້ຄົ້ນຄວ້າ, ປະກອບຄຳເຫັນໃສ່ຮ່າງນິຕິກຳລຸ່ມກົດໝາຍທັງ 5 ສະບັບ ເພື່ອໃຫ້ມີເນື້ອໃນຄົບຖ້ວນ ແລະ ແທດເໝາະກັບສະພາບຄວາມເປັນຈິງ ເພື່ອຄວາມເປັນເອກະພາບໃນການນຳໄປຈັດຕັ້ງປະຕິບັດໃຫ້ໄດ້ຮັບຜົນ.

(ນາງ ອຳພອນ ສີປະເສີດ)