ຜົນສຳເລັດສຳມະນາການເປັນເສນາທິການຮັບໃຊ້ການນຳສະພາແຫ່ງຊາດ

07/11/2018 00:00 -

(ສພຊ) ພາຍຫລັງດໍາເນີນມາເປັນເວລາ 3 ວັນ, ໃນວັັນທີ 29 ຕຸລາ 2018 ກອງປະຊຸມສໍາມະນາກ່ຽວກັບການເປັນເສນາທິການຮັບໃຊ້ການນຳພາຍໃນສະພາແຫ່ງຊາດ (ສພຊ) ໃຫ້ແກ່ບັນດາເລຂາການນຳຂອງ ສພຊ ໄດ້ອັດລົງດ້ວຍຜົນສຳເລັດອັນຈົບງາມ ທີ່ເມືອງແກ້ວອຸດົມ ແຂວງວຽງຈັນ ໂດຍການເປັນປະທານຂອງທ່ານ  ສຸບັນ ສະວະບຸດ ຮອງເລຂາທິການ ສພຊ, ເຂົ້າຮ່ວມມີທ່ານ ນາງ ສີໃສ ລືເດດມູນສອນ ຮອງປະທານ ສພຊ ທັງເປັນຜູ້ຊີ້ນຳຄະນະເລຂາທິການ ສພຊ, ບັນດາທ່ານນັກວິທະຍາກອນຈາກກະຊວງການຕ່າງປະເທດ ແລະ ວິທະຍາໄລເຕັກນິກປາກປ່າສັກ, ບັນດາເລຂາການນຳໃນ ສພຊ ພ້ອມດ້ວຍພະນັກງານ-ວິຊາການທີ່ກ່ຽວຂ້ອງເຂົ້າຮ່ວມ 50 ກວ່າທ່ານ.

ກອງປະຊຸມໃນຄັ້ງນີ້, ບັນດາຜູ້ເຂົ້າຮ່ວມ ໄດ້ຮຽນຮູ້ຄວາມຮູ້ທົ່ວໄປ ແລະ ປະສົບການການເປັນເລຂາການນຳ, ກົນໄກການປະສານງານດ້ານຕ່າງໆ ກັບພາກສ່ວນກ່ຽວຂ້ອງ ລວມທັງທັດສະນະຄຸນສົມບັດຂອງການເປັນເລຂາການນຳ, ຮັບຟັງ, ແລກປ່ຽນຄຳຄິດຄຳເຫັນ ແລະ ສະເໜີວິທີການແກ້ໄຂບັນຫາຕ່າງໆ ໃນການປະຕິບັດວຽກງານການເປັນເລຂາການນຳຂອງສະພາແຫ່ງຊາດໃນໄລຍະຜ່ານມາ ເພື່ອເຮັດໃຫ້ການເປັນເສນາທິການໃນວຽກງານການກະກຽມ ແລະ ຮັບໃຊ້ ໂດຍສະເພາະການເກັບກຳ ແລະ ສະໜອງຂໍ້ມູນ, ການຈໍລະຈອນເອກະສານ ໃຫ້ແກ່ການນຳສະພາແຫ່ງຊາດ ມີປະສິດທິຜົນດີ ແລະ ສ້າງຄວາມເປັນເອກະພາບກັນໃນການປະຕິບັດວຽກງານ, ຮັບຟັງການເຜີຍແຜ່ເອກະສານທາງການ ແລະ ນິຕິກຳຈຳນວນໜື່ງທີ່ກ່ຽວຂ້ອງ.

ທ່ານ ນາງ ສີໃສ ລືເດດມູນສອນ ໄດ້ມີຄຳເຫັນໂອ້ລົມວ່າ: ສພຊ ເປັນອົງການຈັດຕັ້ງທີ່ສໍາຄັນຂອງລັດ ເຊິ່ງປະກອບມີການນໍາຫລາຍທ່ານ ຈຶ່ງຕ້ອງມີເລຂາເພື່ອຊ່ວຍໃຫ້ແກ່ການເຄື່ອນໄຫວວຽກງານ ໃນໄລຍະຜ່ານມາບັນດາເລຂາການນໍາໄດ້ເອົາໃຈໃສ່ຮັບໃຊ້ວຽກງານຢ່າງໃກ້ຊິດຕິດແທດກັບການນໍາ, ເປັນໃຈກາງປະສານສົມທົບກັບບັນດາກໍາມາທິການ, ຄະນະເລຂາທິການ ສພຊ ແລະ ອົງການຈັດຕັ້ງພາຍນອກ ເພື່ອເຮັດໃຫ້ການປະຕິບັດວຽກງານຂອງ  ສພຊ ໄດ້ຮັບຜົນສໍາເລັດທັນເວລາ ແລະ ມີປະສິດທິພາບ ແລະ ເຊື່ອໝັ້ນວ່າບັນດາເລຂານຸການ ຈະພ້ອມກັນຮັກສາມູນເຊື້ອ, ບຸກບືນຫ້າວຫັນໃນການປະຕິບັດໜ້າທີ່ວຽກງານ ໃຫ້ປະສົບຜົນສຳເລັດນັບມື້ສູງຂຶ້ນ.

ໃນຕອນທ້າຍກອງປະຊຸມ, ທ່ານ ສຸບັນ ສະວະບຸດ ໄດ້ກ່າວວ່າ: ຕະຫລອດໄລຍະການດຳເນີນກອງປະຊຸມ ຜູ້ເຂົ້າຮ່ວມໄດ້ພ້ອມກັນສຸມໃສ່ປະກອບຄຳຄິດຄຳເຫັນ ແລະ ແລກປ່ຽນບົດຮຽນເຊິ່ງກັນ ແລະ ກັນຢ່າງຫລາກຫລາຍ ແລະ ມີບັນຍາກາດຟົດຟື້ນ; ທັງໝົດເຫລົ່ານັ້ນ, ລ້ວນແຕ່ມີຈຸດປະສົງເພື່ອຢາກປັບປຸງວຽກງານຄົ້ນຄວ້າ, ການຮັບໃຊ້ ແລະ ສະໜອງຂໍ້ມູນ-ຂ່າວສານ ເຊິ່ງເຮັດໃຫ້ຜູ້ເຂົ້້າຮ່ວມກອງປະຊຸມໄດ້ເຊື່ອມຊຶມ, ມີຄວາມເຂົ້າໃຈຕໍ່ບັນຫາຕ່າງໆຫລາຍຂຶ້ນ ໂດຍສະເພາະບົດຮຽນການເປັນເລຂານຸການ; ທັງນີ້, ກໍເພື່ອເຮັດໃຫ້ການປະຕິບັດໜ້າທີ່ວຽກງານໃຫ້ດີຂຶ້ນກວ່າເກົ່າ, ທ່ານຍັງຮຽກຮ້ອງມາຍັງບັນດາທ່ານເລຂານຸການ ແລະ ບັນດາຜູ້ເຂົ້າຮ່ວມ ຈົ່ງສືບຕໍ່ເອົາໃຈໃສ່ສຶກສາຄົ້ນຄວ້າໃຫ້ການຮ່ວມມື  ແລະ  ນຳເອົາບົດຮຽນກອງປະຊຸມຄັ້ງນີ້ນຳໄປປະກອບສ່ວນເຂົ້າໃນການປະຕິບັດໜ້າທີ່ວຽກງານການປະສານງານດ້ານຕ່າງໆ ເພື່ອເຮັດແນວໃດໃຫ້ວຽກງານມີຄວາມຄ່ອງຕົວ ແລະ ທັນເວລາ ເຮັດໃຫ້ການຈັດຕັ້ງປະຕິບັດວຽກງານນັບມື້ມີຄຸນນະພາບສູງຂຶ້ນ.

(ນາງ ອານິຕາ ມ່ວນສະຫວັດ)