ກວທສ ເປີດກອງປະຊຸມຕິດຕາມກວດກາ ຢູ່ແຂວງ ຊຽງຂວາງ

08/11/2018 00:00 -

(ສພຊ) ໃນວັນທີ 24 ຕຸລາ 2018 ທີ່ຫ້ອງປະຊຸມຂອງສະພາປະຊາຊົນແຂວງ (ສພຂ) ຊຽງຂວາງ, ກຳມາທິການວັດທະນະທຳ-ສັງຄົມ (ກວທສ) ສະພາແຫ່ງຊາດ (ສພຊ) ໄດ້ເປີດກອງປະຊຸມຕິດຕາມກວດກາ ໂດຍການເປັນປະທານຂອງທ່ານ  ສົມພູ ດວງສະຫວັນ ປະທານ ກວທສ; ​ ​ເຂົ້າ​ຮ່ວມ​​ມີ​ທ່ານ ນາງ ແສງຄຳ ຊົ່ງຊະນະ ປະທານ ສພຂ ແລະ ທ່ານ ບົວສອນ ສີນວນທອງ ຮອງເຈົ້າແຂວງໆຊຽງ​ຂວາງ, ມີບັນດາທ່ານເລຂາທິການ ສພຂ, ຫົວໜ້າ-​ຮອງ​ຫົວໜ້າ​ພະ​ແນ​ກການອ້ອມຂ້າງແຂວງ ​ແລະ ພະນັກງານ​-ວິຊາການທີ່ກ່ຽວຂ້ອງເຂົ້າ​ຮ່ວມ.

       ທັງນີ້, ກໍເພື່ອຕິດຕາມກວດກາວຽກງານຕ່າງໆທີ່​ສໍາຄັນ ແລະ ຈຳເປັນ ໂດຍສະເພາະແມ່ນຂອງກໍາມະການວັດທະນະທຳ-ສັງຄົມ ​ແລະ ບັນດາ​ເຜົ່າ ສພຂ ຊຽງຂວາງ; ກອງ​ປະຊຸມໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໂດຍສະເພາະໃນຂົງເຂດວັດທະນະທໍາ-ສັງຄົມ; ຈາກນັ້ນ, ຕາງໜ້າແຕ່ລະພະແນກການ​ໄດ້ມີຄໍາຄິດຄໍາເຫັນ ແລະ ສົນທະນາແລກປ່ຽນບົດຮຽນເຊິ່ງກັນ ແລະ ກັນ.

ໃນຕອນທ້າຍ ກອງປະຊຸມໄດ້ຮັບຟັງການໂອ້ລົມ ແລະ ເນັ້ນໜັກບາງວຽກງານຈາກທ່ານປະທານກອງປະຊຸມ ໂດຍທ່ານໄດ້ເນັ້ນໃຫ້ແຕ່ລະພະແນກການໃນຂົງເຂດວັດທະນະທຳ-ສັງຄົມ ຈົ່ງຍົກສູງລະບົບແບບແຜນການເຮັດວຽກໃຫ້ມີຄຸນນະພາບສຸງ ແລະ ທ່ວງທັນກັບເວລາ; ນອກຈາກນັ້ນ, ທ່ານຍັງຍົກໃຫ້ເຫັນພາລະບົດບາດ ແລະ ຄວາມໝາຍຄວາມສຳຄັນຂອງວຽກງານຕິດຕາມກວດກາໃນວຽກງານດ້ານຕ່າງໆ.

(ນາງ ສຸກ​ສະຫວັນ ອິນທະ​ແສງ)