ກອງປະຊຸມຄົບຄະນະກຳມາທິການການຕ່າງປະເທດ

02/01/2019 00:00 -

(ສພຊ)​ ​ໃນ​ລະຫວ່າງ​ວັນ​ທີ 24-25 ທັນວາ 2018 ທີ່​ສູນປະຊຸມສາກົນ ແລະ ການເຝິກອົບຮົມ (ICTC) ນະຄອນຫລວງ​ວຽງຈັນ, ກໍາມາທິການການການຕ່າງປະເທດ (ກຕທ) ສະພາແຫ່ງຊາດ (ສພຊ) ​ໄດ້​ເປີດ​ກອງ​ປະຊຸມ​ຄົບ​ຄະນະ​ຂອງ​ຕົນ ​ໂດຍ​ການ​ເປັນ​ປະທານ​ຮ່ວມ​ຂອງ​ທ່ານ ​ແສງ​ນວນ ​ໄຊ​ຍະ​ລາດ ຮອງ​ປະທານ​ສະພາ​ແຫ່ງ​ຊາດ ທັງ​ເປັານຜູ້​ຊີ້ນຳ​ວຽກງານ​ການ​ຕ່າງປະ​ເທດ ​ແລະ ທ່ານ ​ເອກສະຫວ່າງ ວົງວິຈິດ ປະທານ​ກຳມາ​ທິການ​ການ​ຕ່າງປະ​ເທດ; ​ເຂົ້າ​ຮ່ວມ​ມີ​ລັດຖະມົນຕີກະຊວງ​ການ​ຕ່າງປະ​ເທດ, ລັດຖະມົນຕີ​ກະຊວງ​ແຜນການ ​ແລະ ການ​ລົງທຶນ, ​​ເລຂາທິການສະພາ​ແຫ່ງ​ຊາດ, ປະທານ-ຮອງ​ປະທານ​ກຳມາ​ທິການພາຍ​ໃນ​ສະພາ​ແຫ່ງ​ຊາດ, ສະມາຊິກ​ສະພາ​ແຫ່ງ​ຊາດ​ປະຈຳ​ເຂດ​ເລືອກ​ຕັ້ງ​​ 18 ​ເຂດ ທີ່​ເປັນ​ກຳມະການ​ຂອງ​ກຳມາ​ທິການ​ການ​ຕ່າງປະ​ເທດ, ຄະນະ​ກຳ​ມະ​ການ​ຮ່ວມ​ມື​ລາວ-ຈີນ ​ແລະ ພະນັກງານ​-ວິຊາ​ການ​ທີ່​ກ່ຽວຂ້ອງ​.

ກອງ​ປະຊຸມ​​ໃນ​ຄັ້ງ​ນີ້, ​ໄດ້​ຮັບ​ຟັງ​ການສະ​ເໜີບົດ​ສະຫລຸບ​ການ​ເຄື່ອນ​ໄຫວ​ວຽກງານ​ການ​ຕ່າງປະ​ເທດ ຂອງ​ກຳມາ​ທິການ​ການ​ຕ່າງປະ​ເທດ ປະຈຳ​ປີ 2018 ​ແລະ ແຜນການວຽກງານ ປະ​ຈຳປີ 2019 ​ແລະ ​ໄດ້​ຮັບ​ຟັງ​ການ​ລາຍງານກ່ຽວກັບ​ການ​ຕິດຕາມ​ກວດກາ​ຂອງ​ກຳມາ​ທິການ​ຕ່າງປະ​ເທດ ​ໃນ​ໄລຍະ 1 ປີຜ່ານມາ, ການ​ເຄື່ອນ​ໄຫວ​ທີ່​ພົ້ນ​ເດັ່ນ​ໃນ​ວຽກງານ​ການ​ຕ່າງປະ​ເທດ​ຂອງ​ລັດຖະບານ ປະຈຳ​ປີ 2018 ​ແລະ ທິດ​ທາງ​ແຜນການ ປະຈຳ​ປີ 2019, ການຈັດ​ຕັ້ງ​ປະຕິບັດ​ສົນທິ​ສັນຍາ​ສາກົນ ຂອງ ສປປລາວ ​ໂດຍ​ສະ​ເພາະ​ບັນຫາສິດທິ​ມະນຸດ ​ແລະ ການ​ຄ້າຂາຍ​ສັດປ່າ​ທີ່​ຫວງ​ຫ້າມ, ສະພາບ​ການ​ຮ່ວມ​ມື​ລາວ-ຫວຽດນາມ ​ແລະ ລາວ-ຈີນ, ວຽກງານ​ຮ່ວມ​ມື​ສາກົນ ​ແລະ ການ​ຄຸ້ມ​ຄອງ​ການ​ຊ່ວຍ​ເຫລືອ ​ເພື່ອ​ການ​ພັດທະນາ (ODA); ພ້ອມ​ດຽວກັນ​ນັ້ນ, ບັນດາ​ທ່ານ​ຜູ້​ເຂົ້າ​ຮ່ວມ​ກອງ​ປະຊຸມ​ກໍ​ໄດ້​ປະກອບ​ຄຳ​ຄິດ​ຄຳ​ເຫັນ​ໃສ່​ບັນດາບົດ​ສະ​ເໜີ ​ແລະ ບົດ​ລາຍ​ງານ​ດັ່ງກ່າວ​ຢ່າງ​ມີ​ເຫດ​ມີ​ຜົນກົງ​ໄປ​ກົງ​ມາ ​ແລະ ມີ​ຈຸດ​ສຸມ; ກອງ​ປະຊຸມຍັງໄດ້​ຜ່ານ​ຮ່າງ​ມະຕິ​ຂອງກອງ​ປະຊຸມ​ຄົບ​ຄະນະ​ຂອງ​ກຳມາ​ທິການ​ການ​ຕ່າງປະ​ເທດ ​ແລະ ​ໃນ​ເວລາ​ຕໍ່ມາ​ກໍ​ໄດ້ພິຈາລະນາ​ຮັບຮອງ​ເອົາ​ຮ່າງມະຕິ​ກອງ​ປະຊຸມ​ຄົບ​ຄະນະ​ຂອງ​ກຳມາ​ທິກ​ານການ​ຕ່າງປະ​ເທດ ປະຈຳ​ປີ 2018.

ທ່ານ​ ​ແສງ​ນວນ ​ໄຊ​ຍະ​ລາດ ​ໄດ້​ມີ​ຄຳ​ເຫັນ​ວ່າ: ຜ່ານ​ການສະຫລຸບຕີລາຄາຄືນຜົນສຳເລັດ ອັນຈົບງາມທີ່ຍາດມາໄດ້ໃນໄລຍະປີໜື່ງທີ່ຜ່ານມາ ແລະ ໄດ້ສັງເກດຕີລາຄາຄືນບັນດາຂໍ້ຄົງຄ້າງໃນການປະຕິບັດໜ້າທີ່ວຽກງານການຕ່າງປະເທດຂອງກຳມາທິການການຕ່າງປະເທດ ກໍຄືຂອງສະພາແຫ່ງຊາດ ໃນໄລຍະປີ 2018 ຜ່ານມາ ແລະ ໄດ້ວາງທິດທາງແຜນການປະຈຳປີ 2019 ​ເຊິ່ງໄດ້ຕິດຕາມ ແລະ ຊີ້ນຳຢ່າງໃກ້ຊິດຕໍ່ການເຄື່ອນໄຫວວຽກງານຂອງກຳມາທິການການຕ່າງ ປະເທດ ​ແລະ ໄດ້ສ່ອງແສງໃຫ້ເຫັນເຖິງບັນດາຜົນສໍາເລັດທີ່ພົ້ນເດັ່ນ ໃນການຈັດຕັ້ງປະຕິບັດ 3 ພາລະບົດບາດຂອງອົງການນິຕິບັນຍັດ ແລະ ການເຄື່ອນໄຫວວຽກງານການ ຕ່າງປະເທດຂອງສະພາແຫ່ງຊາດ ​ເຊິ່ງກວມເອົາການເຄື່ອນໄຫວວຽກງານພົວພັນລັດຖະສະພາໃນຂອບສອງຝ່າຍ ແລະ ຫລາຍຝ່າຍ.

(ນາງ ສຸພາ​ວັນ ຫອມ​ສະ​ນິດ)