ຄສພຍ ສ້າງຄວາມເຂັ້ມແຂງໃຫ້ແກ່ ສພຊ ແລະ ສພຂ ເພດຍິງ

04/01/2019 00:00 -

(ສພຊ) ​ໃນ​ລະຫວ່າງ 28-29 ທັນວາ 2018 ຢູ່​ທີ​ຫ້ອງ​ປະຊຸມ ​ໄອ​ຊີ​ທີ (ICT) ນະຄອນ​ປາກ​ເຊ ​ແຂວງ​ຈຳປາ​ສັກ, ຄະນະ​ສະມາຊິກ​ສະ​ແຫ່​ງຊາດ​ເພດ​ຍິງ (ຄສພຍ) ​ໄດ້​ເປີດ​ກອງ​ປະຊຸມ​ເຝິກອົບຮົມ​ສ້າງ​ຄວາມ​ເຂັ້ງ​ແຂງ​ໃຫ້​ແກ່ສະມາ​ຊິກ​ສະພາ​ແຫ່ງ​ຊາດ (ສສຊ) ​ເພດ​ຍິງ ​ແລະ ສະມາຊິກ​ສະພາ​ປະຊາຊົນ​ແຂວງ (ສພຂ) ​ເພດ​ຍິງ; ພາຍ​ໃຕ້​ການ​ເປັນ​ປະທານ​ຂອງ​ທ່ານ ນາງ ທັດ​ສະ​ດາ​ພອນ ​ແສງ​ສຸລິຍາ ປະທານ​ຄະນະ​ສະມາຊິກ​ສະພາ​ແຫ່ງ​ຊາດ​ເພດຍິງ; ​​ເຂົ້າ​ຮ່ວມ​ມີ​ຮອງ​ປະທານ​ກຳມາ​ທິການ​ກົດໝາຍ, ຮອງ​ຫົວໜ້າຄະນະ​ຮັບຜິດຊອບ​ວຽກງານ​ເຂດ​ເລືອກ​ຕັ້ງ​ສະພາ​ແຫ່ງຊາດ, ​ເລຂາທິກ​ານສະພາ​ປະຊາຊົນ​ແຂວງຈຳປາ​ສັກ; ມີ​ບັນດາຮອງ​ປະທານ ຄສພຍ, ສສຊ-ສພຂ ​ເພດ​ຍິງ ຈາກ 8 ​ແຂວງ​ ຄື: ນະ​ຄອນ​ຫລວງ​ວຽງຈັນ, ບໍລິ​ຄຳ​ໄຊ, ຄຳ​ມ່ວນ, ສະຫວັນ​ນະ​ເຂດ, ສາລະ​ວັນ ຈໍາປາ​ສັກ, ​ເຊ​ກອງ, ອັດ​ຕະປື, ​ໄຊ​ສົມບູນ ​ແລະ ພະນັງານ-ວິຊາ​ການ​ທີ່​ກ່ຽວຂ້ອງ​ເຂົ້າຮ່ວມ.

ຈຸດປະສົງ​ຂອງ​ກອງ​ປະຊຸມ​ຄັ້ງ​ນີ້ ​ແມ່ນ​​ເພື່ອ​ໃຫ້ ສສຊ-ສພຂ ​ເພດ​ຍິງ ​ໄດ້​ຮັບ​ຮູ້ ​ແລະ ​ເຂົ້າ​ໃນ ​ເຖິງ​ສົນທິສັນຍາ​ສາກົນ ທີ່​ພົວພັນ​ເຖິງ​ສິດ ​ແລະ ຜົນ​ປະ​ໂຫຍ​ດອັນ​ຊອບ​ທຳ​ຂອງ​ແມ່ຍິງ​ ​ແລະ ​ເດັກນ້ອຍ, ສ້າງ​ທັກ​ສະ​ໃຫ້​ແກ່ ສສຊ-ສພຂ ​ເພດ​ຍິງ ​ໃຫ້​ກາຍ​ເປັນ​ຜູ້ນຳ​ໃນ​ການ​ປະກອບ​ຄຳ​ຄິດ​ຄຳ​ເຫັນ​ໃນ​ເວທີ​ການ​ເມືອງທັງ​ພາຍ​ໃນ ​ແລະ ຕ່າງປະ​ເທດ ພ້ອມ​ທັງ​ຮຽນຮູ້ ​ແລະ ​ເຂົ້າ​ໃຈ​ບາງ​ມາດຕາ​ຂອງ​ກົດໝາຍ​ໃນ​ຂົງ​ເຂດ ​ແມ່ຍິງ ​ແລະ​ ເດັກນ້ອຍ ​ໃນ​ວຽກງານ​ຕິດຕາມ​ກວດກາ, ພ້ອມທັງປຶກສາ​ຫາລື ​ແລະ ​ແລກປ່ຽນບົດຮຽນ ​ເຊິ່ງກັນ ​ແລະ ກັນ​ໃນ​ຂົງ​ເຂດ​ວຽກງານ​ແມ່ຍິງ ​ແລະ ​ເດັກນ້ອຍ.

         ທ່ານ ນາງ ທັດ​ສະ​ດາພອນ ​ແສງ​ສຸລິຍາ ​ໄດ້​ຮຽກຮ້ອງ​ມາ​ຍັງ​ບັນດາ​ຜູ້​ເຂົ້າ​ຮ່ວມ​ກອງ​ປະຊຸມ​ ຈົ່ງ​ພ້ອມ​ກັນ​ເຊີດ​ຊູ​ຄວາມ​ຮັບຜິດຊອບ ​ແລະ ພະຍາ​ຍາມ​ຄົ້ນຄວ້າ​ເຊື່ອມ​ຊຶມຢ່າງເລິກເຊິ່ງຕໍ່ບັນດາເອກະສານແລະ ກ້າສະເໜີທັດສະນະຄວາມຄິດເຫັນ, ຍົກສະພາບດ້ານດີ, ດ້ານອ່ອນ, ທັງແລກປ່ຽນຊຶ່ງກັນ ແລະກັນລະຫວ່າງບົດຮຽນຂອງສະມາຊິກສະພາແຫ່ງຊາດເພດຍິງ ກັບສະມາຊິກສະພາປະຊາຊົນເພດຍິງຂັ້ນແຂວງໃນເຂດເລືອກຕັ້ງຂອງຕົນ ທຽບໃສ່ບົດຮຽນເຫັນວ່າພວກເຮົາຈະໄດ້ ຜ່ານການຝຶກອົບຮົມໃນຄັ້ງນີ້ ວ່າບັນຫາໃດທີ່ປະຕິບັດໄດ້ ແລະ ບັນດາບັນຫາໃດທີ່ຈະຕ້ອງໄດ້ສືບຕໍ່ພິຈາລະນາແກ້ໄຂ; ທັງນີ້ກໍເພື່ອແນ່ໃສ່ສ້າງຂີດຄວາມສາມາດ, ທັກສະໃຫ້ແກ່ສະມາຊິກສະພາແຫ່ງຊາດດເພດຍິງຂອງພວກເຮົາໃຫ້ສືບຕໍ່ແກ້ໄຂໃນຕໍ່ໜ້າ ທັງໝົດເຮັດໃຫ້ການເຄື່ອນໄຫວວຽກງານມີຄວາມຄ່ອງຕົວ ແລະ ຍົກຖານະບົດບາດຂອງສະມາຊິກສະພາແຫ່ງຊາດເພດຍິງ ໃຫ້ມີຄວາມເຂັ້ມແຂງນັບມື້ສູງຂຶ້ນ.

         ກອງ​ປະຊຸມ​ຄັ້ງ​ນີ້​ໄດ້​ຮັບ​ຟັງ​ຄວາມ​ຮູ້ພື້ນຖານ​ກ່ຽວກັບ​ເສດຖະກິດ​ມະຫາ​ພາກ ​ແລະ ຈຸ​ລະ​ພາກ ຈາກ​ຕາງໜ້າສະ​ຖາ​ບັນ​ຄົ້ນຄວ້າ​ເສດຖະກິດ​ແຫ່ງ​ຊາດ; ການ​ສົ່ງ​ເສີມ​ພາວະ​ການ​ເປັນ​ຜູ້ນຳ​ຂອງ​ແມ່ຍິງ​ໃນ​ເວທີ​ການ​ເມືອງ​ຢູ່​ພາຍ​ໃນ ​ແລະ ຕ່າງປະ​ເທດ ຈາກ ທ່ານ ນາງ ບຸນ​ຂໍາ ​ເຫງົ້າ​ພະ​ສິຣິ ຮອງ​ຫົວໜ້າຄະນະ​ຮັບຜິດຊອບ​ວຽກງານ​ເຂດ​ເລືອກ​ຕັ້ງ​ສະພາ​ແຫ່ງ​ຊາດ; ບາງ​ມາດ​ຕາ​ຂອງ​ກົດໝາຍ​ໃນ​ຂົງ​ເຂດວຽກງານ​ແມ່ຍິງ ​ແລະ ​ເດັກ, ບົດຮຽນທີ່​ດີ​ໃນ​ການ​ເຮັດໜ້າທີ່​ປະຕິບັດ​ພາ​ລະ​ບົດບາດ​ການ​ຕິດຕາມ​ກວດກາ​ຂອງ ສພຊ ​ແລະ ສພຂ ຈາກ​ທ່ານ ອຳ​ໄພ ຈິດ​ມາ​ນົນ ຮອງ​ປະທານ​ກຳ​ທິການ​ກົດໝາຍສະພາ​ແຫ່ງ​ຊາດ.

 

(ໄຊໂສພາພອນ ມິ່ງມຸງຄຸນ)