ກອງປະຊຸມປະຈຳປີ 2018 ຂອງຄະນະຮັບຜິດຊອບວຽກງານເຂດເລືອກຕັ້ງສະພາແຫ່ງຊາດ

14/01/2019 00:00 -

(ສພຊ) ລະຫວ່າງ​ວັນ​ທີ 10-11 ມັງກ​ອນ 2019 ຢູ່​ທີ່​ຫ້ອງປະຊຸມຄະນະ​ເລຂາທິການ​ສະພາ​ແຫ່ງ​ຊາດ (ຫລັກ6) ນະຄອນຫລວງວຽງຈັນ, ຄະນະ​ຮັບຜິດຊອບ​ວຽກງານ​ເຂດ​ເລືອກ​ຕັ້ງ ສະພາແຫ່ງຊາດ ​ໄດ້​ດໍາເນີນ​ກອງ​ປະຊຸມ​ປະຈຳ​ປີ 2018 ຂອງຕົນ; ​​ໂດ​ຍການ​ເປັນ​ປະທານ​ຮ່ວມ​ຂອງ​ທ່ານ ສົມ​ພັນ​ ​ແພງ​ຄຳ​ມີ ຮອງ​ປະທານ​ສະພາ​ແຫ່ງ​ຊາດ ຜູ້​ຊີ້ນຳ​​ວຽກງານ​ເຂດ​ເລືອກ​ຕັ້ງ​ສະພາ​ແຫ່ງ​ຊາດ, ທ່ານ ພົງ​ສະ​ເໜ່ ຍຸດຕິ​ທຳ  ຫົວໜ້າຄະນະ​ຮັບຜິດຊອບ​ວຽກງານ​ເຂດ​ເລືອກ​ຕັ້ງສະພາ​ແຫ່ງ​ຊາດ; ​ມີ​ບັນດາ​ທ່ານປະທານ-ຮອງ​ປະທານຄະນະ​ສະມາຊິກ​ສະພາ​ແຫ່ງ​ຊາດ​ປະຈຳ​ແຕ່ລະເຂດ​ເລືອກ​ຕັ້ງໃນທົ່ວປະ ເທດ, ປະທານ-ຮອງ​ປະທານ​ກຳມາ​ທິການ​ພາຍໃນສະພາ​ແຫ່ງ​ຊາດ, ຄະນະ​ເລຂາທິການ ຕະຫລອດຮອດພະນັກງານ​ວິຊາ​ການ​ທີ່​ກ່ຽວຂ້ອງ​ເຂົ້າ​ຮ່ວມ.

ກອງປະຊຸມດັ່ງກ່າວແມ່ນ​ເພື່ອ​ສະຫລຸບ​ຕີ​ລາ​ຄືນ​ການ​ປະຕິບັດພາ​ລະ​ບົດບາດ ສິດ ​ແລະ ໜ້າທີ່​ຂອງ​ຕົນ ປະຈຳ​ປີ 2018 ກໍ​ຄື​ການ​ວາງ​ທິດ​ທາງວຽກງານ​ປະຈຳ​ປີ 2019, ພ້ອມ​ທັງ​ປຶກສາ​ຫາລື​ວຽກງານ​ທີ່​ສຳຄັນ​ຈຳນວນໜຶ່ງຂອງ​ຄະນະ​ຮັບຜິດຊອບ​ວຽກງານ​ເຂດ​ເລືອກ​ຕັ້ງ ກັບ ຄະນະ​ສະມາຊິກ​ສະພາ​ແຫ່ງ​ຊາດ​ປະຈຳ​ເຂດ​ເລືອ​ກຕັ້ງໃນ​ທົ່ວ​ປະ​ເທດ; ກອງ​ປະຊຸມ​​ໄດ້​ຮັບ​ຟັງ​ບົດ​ສະຫລຸບ​ຕີ​ລາຄາ​ການຈັດ​ຕັ້ງ​ປະຕິບັດ​ແຜນການ​ເຄື່ອນ​ໄຫວ​ວຽກງານ ປະຈຳ​ປີ 2018 ​ແລະ ທິດ​ທາງ​ແຜນການ​ວຽກງານ ປະຈຳ​ປີ 2019 ຂອງ​ຄະນະ​ຮັບຜິດຊອບ​ວຽກງານ​ເຂດ​ເລືອກ​ຕັ້ງ; ບົດ​ສະ​ເໜີກ່ຽວກັບ​ການ​ຕີ​ລາຄາ​ໂຄງ​ປະກອບ​ການ​ຈັດ​ຕັ້ງ ​ແລະ ບຸກຄະລາ​ກ​​ອນຂ​ແງ​ສະພາ​ປະຊາຊົນ​ຂັ້ນ​ແຂວງ ຊຸດ​ທີ I ​ແລະ ທິດ​ທາງ​ການ​ປັບປຸງ ສພຂ ຊຸ​ດທີ II.

ໃນພິທີໄຂກອງປະຊຸມ, ທ່ານ ພົງ​ສະ​ເໜ່ ຍຸດຕິ​ທຳ ​ໄດ້​ຮຽກຮ້ອງ​ມາ​ຍັງ​ບັນດາທ່ານ​ຜູ້​ແທນ​​ກອງ​ປະຊຸມທັງໝົດຈົ່ງ​ຊ່ວຍ​ປະກອບ​ຄຳ​ຄິດ​ຄຳ​ເຫັນ ຢ່າງ​ເປັນ​ເຈົ້າ​ການ ​ແລະ ມີ​ຈຸດ​ສຸມ, ຕັ້ງ​ຂໍ້​ສົນ​ໃຈ ​ເພື່ອ​ແລກປ່ຽນສົນທະນາ ທັງ​ນີ້ກໍ​ເພື່ອ​ເຮັດ​ໃຫ້ຄະນຮັບຜິດຊອບ​ວຽກງານ​ເຂດ​ເລືອກ​ຕັ້ງ ພ້ອມ​ທັງ​ຄະນະ ສສຊ ປະຈຳ​ເຂດ​ເລືອກ​ຕັ້ງ​ສາມາດ​ເຫັນ​ໄດ້​ທິດ​ທາງ, ວິທີ​ການ​ແກ້​ໄຂ​ບັນຫາ​ຈຸດ​ອ່ອນ, ຂໍ້​ຄົງ​ຄ້າງ ​ແລະ ປັບປຸງ​ໄດ້​ດ້ານ​ການຈັດ​ຕັ້ງ ​ແລະ ​ແບບ​ແຜນ​ວິທີ​ການ​ເຄື່ອນ​ໄຫວ​ໃນຕໍ່ໜ້າ ​ໃຫ້​ມີ​ປະສິດທິພາບ​ສູງ​ກວ່າ​ເກົ່າ.