ສພຊ ໄດ້ຮັບເຄື່ອງຊ່ວຍເຫຼືອ ເພື່ອນຳໄປມອບໃຫ້ກອງກຳລັງປ້ອງກັນຊາດ ແຂວງ ໄຊຍະບູລີ

28/01/2019 00:00 -

 (ສພຊ) ຕອນບ່າຍວັນທີ 16 ມັງກອນຜ່ານມາ, ທີ່ສະພາແຫ່ງຊາດ ໄດ້ມີພິທີມອບ-ຮັບເຄື່ອງຊ່ວຍເຫລືອຈາກສະຫະພັນກິລາພື້ນເມືອງ-ກິລາສັດແຫ່ງຊາດ ມອບໃຫ້ສະພາແຫ່ງຊາດ (ສພຊ) ເພື່ອນຳໄປມອບຕໍ່ໃຫ້ແກ່ກອງຮ້ອຍທະຫານຊາຍແດນ 411 ແລະ 156 ຢູ່ເມືອງທົ່ງມີໄຊ ແລະ ກອງພັນ 201 ຢູ່ເມືອງປາກລາຍ ແຂວງໄຊຍະບູລີ ເນື່ອງໃນໂອກາດວັນສ້າງຕັ້ງກອງທັບປະຊາຊົນລາວ ຄົບຮອບ 70 ປີ (20/1/1949-20/1/2019) ເຊິ່ງຕາງໜ້າມອບໂດຍທ່ານ ສຸລິຍາ ວົງສະໝໍລະພູມ, ທ່ານ ວັດທະນາໄຊ ລາດສະວົງສິງ ແລະ ທ່ານ ວົງພອນ ວົງມະນີຢາຈົງຕົວ ຄະນະສະຫະພັນກິລາດັ່ງກ່າວ ແລະ ຮັບໂດຍທ່ານ ນາງ ບົວພັນ ລີໄກຢາ ປະທານກຳມາທິການບັນດາເຜົ່າ ສະພາແຫ່ງຊາດ ທັງເປັນສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 7 ແຂວງໄຊຍະບູລີ; ເຄື່ອງທີ່ນຳມາມອບໃນຄັ້ງນີ້ ປະກອບມີປ໋ອງປາ, ໝີ່ສຳເລັດຮູບ ແລະ ອື່ນໆ ລວມມູນຄ່າທັງໝົດ 7 ລ້ານກວ່າກີບ ເຊິ່ງທ່ານ ນາງ ບົວພັນ ລີໄກຢາ ໄດ້ນຳພາຄະນະນຳເອົາເຄື່ອງຈຳນວນດັ່ງກ່າວ ໄປມອບໃຫ້ກອງຮ້ອຍທະຫານຊາຍແດນ 411 ແລະ 156 ຢູ່ເມືອງທົ່ງມີໄຊ ແລະ ກອງພັນ 201 ຢູ່ເມືອງປາກລາຍ ແຂວງໄຊຍະບູລີ ໃນວັນຕໍ່ມາ.

(ນາງ ປາກາລັກ ພົມມີໄຊ)