ການຕິດຕາມກວດກາວຽກງານຊົນເຜົ່າ ແລະ ສາສະໜາ

18/04/2019 00:00 -

(ສພຊ) ລະຫວ່າງວັນທີ 17-25 ມີນາຜ່ານມາ, ກຳມາທິການບັນດາເຜົ່າ (ກບຜ) ສະພາແຫ່ງຊາດ ນຳພາໂດຍ ທ່ານ ນາງ ວັນເພັງ ແກ້ວນະຄອນ ຮອງປະທານ ກບຜ ພ້ອມຄະນະ ໄດ້ເຄື່ອນໄຫວຕິດຕາມກວດກາ, ເກັບກຳຂໍ້ມູນກ່ຽວກັບວຽກງານຊົນເຜົ່າ ແລະ ສາສະໜາ ຂອງແຂວງອັດຕະປື ແລະ ແຂວງສະຫວັນນະເຂດ ໂດຍລົງພົບປະໂອ້ລົມກັບປະຊາຊົນເຜົ່າແຢະ ຢູ່ບ້ານໜອງໄກ່ໂອກ, ເມືອງຊານໄຊ; ເຜົ່າໂອຍ ຢູ່ບ້ານດອນບົກ ເມືອງສະໜາມໄຊ ແຂວງອັດຕະປື, ເຜົ່າຕຣີ ຢູ່ບ້ານຫົວນາ (ກຸ່ມບ້ານຊຽງຮົ່ມ) ເມືອງເຊໂປນ, ເຜົ່າມະກອງ ຢູ່ບ້ານແກ້ງລະແທັງ ແລະ ເຜົ່າກະຕາງ ຢູ່ບ້ານສະແລໃຕ້ ເມືອງພິນ ແຂວງສະຫວັນນະເຂດ.

          ໃນການເຄື່ອນໄຫວຄັ້ງນີ້, ຄະນະໄດ້ພົບເຫັນສະພາບຕົວຈິງສົມທົບກັບການເກັບກຳຂໍ້ມູນຈາກການລາຍງານຂອງອົງການຈັດຕັ້ງບ້ານ, ເມືອງ, ແຂວງ ແລະ ພໍ່ແມ່ປະຊາຊົນຢູ່ແຕ່ລະບ່ອນ ເຊິ່ງໂດຍລວມແລ້ວເຫັນວ່າສະພາບການດຳລົງຊີວິດຂອງປະຊາຊົນບັນດາເຜົ່າ ຢູ່ເຂດຫ່າງໄກສອກຫລີກຍັງພົບຄວາມຫຍຸ້ງຍາກຫລາຍ ເປັນຕົ້ນ: ເສັ້ນທາງເຂົ້າເຖິງບ້ານຍັງທຸລະກັນດານ, ຊີວິດການເປັນຢູ່ຍັງທຸກຍາກ, ການຂາດແຄນຄູສອນໃນໂຮງຮຽນ, ການເຊື່ອຖືຮີດຄອງປະເພນີອັນດັ້ງເດີມຍັງມີຫລາຍ, ປະຊາຊົນບໍ່ສາມາດເຂົ້າເຖິງການບໍລິການທາງດ້ານສາທາລະນະສຸກໃນເວລາເຈັບເປັນເກີດລູກ, ຂາດນ້ຳສະອາດ, ວິດຖ່າຍ ແລະ ອື່ນໆ... ການລົງທຶນຂອງລັດເຂົ້າໃນການພັດທະນາຂົງເຂດດັ່ງກ່າວຍັງຈໍາກັດ ເຊິ່ງເປັນໜຶ່ງໃນສາເຫດສຳຄັນທີ່ເຮັດໃຫ້ພວກຄົນບໍ່ດີສວຍໃຊ້ຊ່ອງຫວ່າງຂອງສາສະໜາເຂົ້າມາປຸກລະດົມຊວນເຊື່ອປະຊາ ຊົນດ້ວຍຮູບການຕ່າງໆ ເຊິ່ງເຮັດໃຫ້ຈຳນວນການເຊື່ອຖືບັນພະບຸລຸດ (ຜີ) ໃນເມື່ອກ່ອນ ໄດ້ໄປເຊື່ອຖືສາສະໜາອື່ນມີຈຳນວນເພີ່ມຂຶ້ນຫລາຍ ແລະ ໄວວາ, ສ້າງຄວາມຫຍຸ້ງຍາກແກ່ການຄຸ້ມຄອງນຳພາຂອງອົງການຈັດຕັ້ງແຕ່ລະຂັ້ນຢ່າງໜັກໜ່ວງສົມຄວນ.

          ໃນໂອກາດພົບປະກັບປະຊາຊົນບັນດາເຜົ່າໃນແຕ່ລະຈຸດ, ທ່ານ ນາງ ວັນເພັງ ແກ້ວນະຄອນ ໄດ້ໃຫ້ການໂອ້ລົມຊີ້ແຈງເຖິງແນວທາງນະໂຍບາຍຂອງພັກຕໍ່ວຽກງານຊົນເຜົ່າໃນໄລຍະໃໝ່, ເຜີຍແຜ່ບາງເນື້ອໃນຈິດໃຈຂອງນິຕິກຳ ທີ່ພົວພັນກັບວຽກງານສາສະໜາ ເປັນຕົ້ນ: ດຳລັດ 315/ລບ, ກ່ຽວກັບການປົກປ້ອງ ແລະ ຄຸ້ມຄອງການເຄື່ອນໄຫວດ້ານສາສະໜາ ໃຫ້ແກ່ບັນດາຜູ້ເຂົ້າຮ່ວມມີຄວາມເຂົ້າໃຈຕື່ມ; ພ້ອມກັນນັ້ນ, ກໍໄດ້ຍົກໃຫ້ເຫັນຄວາມເປັນຫ່ວງເປັນໃຍຂອງການນຳພັກ-ລັດ ແຕ່ລະຂັ້ນໃນການຍົກສູງຄຸນນະພາບຊີວິດການເປັນຢູ່ຂອງປະຊາຊົນ ຈາກແນວຄິດທີ່ດັ້ງເດີມໄປສູ່ຊີວິດໃໝ່ທີ່ດີຂຶ້ນເທື່ອລະກ້າວຢ່າງໜັກແໜ້ນຕາມແນວທາງນະໂຍບາຍທີ່ພັກ-ລັດວາງອອກ, ພ້ອມທັງໄດ້ຮຽກຮ້ອງໃຫ້ທຸກຊົນເຜົ່າມີຄວາມອົດທົນຜ່ານຜ່າອຸປະສັກ, ເພີ່ມທະວີຄວາມສາມັກຄີຮັກແພງຊ່ວຍເຫລືອເຊິ່ງກັນ ແລະ ກັນໃນການພັດທະນາຊີວິດການເປັນຢູ່ໃຫ້ນັບມື້ນັບດີຂຶ້ນໄປເລື້ອຍໆ.

          ພາຍຫລັງທີ່ສຳເລັດການໄປພົບຢ້ຽມຢາມແຕ່ລະຈຸດແລ້ວ, ຄະນະໄດ້ເຮັດວຽກຮ່ວມກັບຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ ບັນດາພາກສ່ວນທີ່ກ່ຽວຂ້ອງຂອງແຂວງ ເຊິ່ງປະກອບມີແນວລາວສ້າງຊາດ, ພະແນກພາຍໃນ, ບັນດາອົງການຈັດຕັ້ງມະຫາຊົນ ແລະ ບາງຂະແໜງການທີ່ກ່ຽວຂ້ອງຂອງເມືອງ ແລະ ແຂວງ ເພື່ອແຈ້ງຜົນການລົງຕິດຕາມກວດກາຂອງຄະນະໃນຄັ້ງນີ້ ພ້ອມທັງປຶກສາຫາລືຕໍ່ບັນດາບັນຫາທີ່ປະຊາຊົນສະເໜີ ເພື່ອພ້ອມກັນຊອກຫາວິທີແກ້ໄຂໃນຕໍ່ໜ້າ ເຮັດໃຫ້ວຽກງານການພັດທະນາຊົນນະບົດ ມີບາດກ້າວໃໝ່ແກ້ໄຂບັນຫາຫຍໍ້ທໍ້ໃຫ້ນັບມື້ນັບຫລຸດລົງ.

(ບຸນໄທ)