ກບຜ ເຄື່ອນໄຫວວຽກງານຕິດຕາມກວກາຢູ່ແຂວງຫລວງນໍ້າທາ

25/04/2019 00:00 -

 (ສພຊ) ໃນລະຫວ່າງ​ວັນ​ທີ 31 ມີນາ ຫາ 6 ​ເມສາຜ່ານ​ມາ, ​ກໍາມາ​ທິການ​ບັນດາ​ເຜົ່າ (ກບຜ) ສະພາ​ແຫ່ງ​ຊາດ ນໍາ​ໂດຍ​ທ່ານ ນາງ ບົວ​ພັນ ລີ​ໄກ​ຢາ ປະທານ ກບຜ ພ້ອມດ້ວຍ​ຄະນະ ​ໄດ້​​ເຄື່ອນ​ໄຫວ​ຕິດຕາມ​ກວດກາ, ​ເກັບ​ກໍາ​ຂໍ້​ມູນ​ສະພາບ​ການ​ພັດທະນາ​​ເສດຖະກິດ-ສັງຄົມ, ການ​ແກ້​ໄຂ​ຄວາມທຸກ​ຍາກ​, ຄວາມເຊື່ອ​ຖື, ວັດທະນະ​ທໍາ-​ຮີດຄອງ​ປະ​ເພນີ, ການດໍາລົງ​ຊີ​ວິດ​ຂອງ​ປະຊາຊົນ​ເຜົ່າ​ອາຄາ​ ຢູ່​ບ້ານສາລາ,​ ເຜົ່າມູ​ເຊີ​ດໍາ ຢູ່​ບ້ານ​ຈາ​ຍີ່, ເຜົ່າກຸຍ-ເຜົ່າ​ລາຫູ ຢູ່​ບ້ານ​ໂພນສໍາພັນ ​ເມືອງ​ລອງ ​ແລະ ວຽກ​ງານ​ດ້ານສາສະໜາຄຣິດ ​ເຢຊູ ຢູ່​ບ້ານ​ນໍ້າ​ລື ​ເມືອງ ແລະ ​ແຂວງຫລວງ​ນໍ້າ​ທາ.

ໃນການເຄື່ອນໄຫວຄັ້ງນີ້, ຄະນະ​ໄດ້​ພົບ​ເຫັນ​ສະພາບການ​ດໍາລົງຊີວິດຕົວ​ຈິງຂອງປະຊາຊົນ​ແຕ່​ລະ​ບ້ານ ​​​ແລະ ​​​ໄດ້ສົນທະນາກັບພໍ່​ແມ່​ປະຊາຊົນ ​ເພື່ອ​ເກັບ​ກໍາ​ເອົາ​ຂໍ້​ມູນ​ຕົວ​ຈິງ ​ສົມທົບ​ກັບ​ການ​ລາຍ​ງາຍ​ຂອງ​ການຈັດ​ຕັ້ງ​ບ້ານ, ​ເມືອງ ແລະ ​ແຂວງ ເຊິ່ງ​ໂດຍ​ລວມ​ແລ້ວ​ເຫັນ​ວ່າສະພາບ​ການ​ດໍາລົງ​ຊີວິດ​ຂອງ​ປະຊາຊົນ​​ບັນດາ​ເຜົ່າ​ແມ່ນຕິດ​ພັນ​ກັບ​ການ​ກະສິກໍາປູກ​ຝັງ-​ລ້ຽງສັດ ​ແຕ່​ຍັງ​ມີ​ຄວາມຫຍຸ້ງຍາກ​ຢູ່ຫລາຍ​ດ້ານ​ ​ເປັນ​ຕົ້ນ​: ​ບັນຫາ​ທີ່​ດິນທໍາ​ການ​ຜະ​ລິດ​ບໍ່​ພຽງພໍ ​ເຮັດ​ໃຫ້​ບາງ​ຄອບ​ຄົວ​ບໍ່​ມີ​ເຂົ້າ​ກຸ້ມກິນ, ການ​ເຂົ້າ​ໃຈພາສາ​ກາງຍັງ​ຈໍາກັດ ຈຶ່ງ​ຕ້ອງ​ໃຊ້​ພາສາ​​ແປ​​ໃນ​ເວລາ​ປະຊຸມ, ການ​ສຶກສາ, ການ​ບໍລິການ​ດ້ານ​ສາ​ທາ​ສະ​ນະ​ສຸກ​ ​ຍັງ​ພົບ​ຄວາມ​ຫຍຸ້ງຍາກ ແລະ ​ເມືອງ​ລອງ ​ເປັນ​ເມືອງ​ໜຶ່ງທີ່​ຕິດ​ກັບ​ຂົວ​ຂ້າມ​ແມ່ນ​ນໍ້າຂອງ​ລະຫວ່າງ​ລາວ​ກັບ​ບາງ​ປະ​ເທດ​ໃກ້​ຄຽງ ຈຶ່ງມີ​ບັນຫາ​ຢາ​ເສບ​ຕິດ ເຊິ່ງ​ເຮັດ​ໃຫ້​ສະພາ​ບພາຍ​ໃນ​ເມືອງ​ບໍ່​ມີ​ຄວາມ​ສະຫງົບ​ດີ​ໃນ​ແຕ່ລະ​ປີ, ການ​ລົງ​ທືນຂອງ​ລັດ​ເຂົ້າ​ໃນ​ການ​ພັດທະນາ​ຂົງ​ເຂດ​ດັ່ງກ່າວ ​ແມ່ນ​ຍັງ​ມີ​ຫລາຍ​ອັນ​ທີ່​ຈໍາ​ກັດ ​ເປັນສາ​​ເຫດໜຶ່ງ​ທີ່​ເຮັດ​ໃຫ້​ກຸ່ມ​ຄົນ​ບໍ່​ດີ​ສວຍ​ໃຊ້​ຊ່ອງ​ວ່າງ​ທາງ​ສາສະໜາ ​ເພື່ອ​ປຸກລະດົມ​ພໍ​ແມ່​ປະຊາຊົນ​ຜູ້​ຮູ້​ເທົ່າ​ບໍ່​ເຖິງ​ການ​ໃຫ້​ເຂົ້າ​ສາສະໜາ ​ແລະ ​ໄດ້ມີ​ການ​ເຄື່​ອນ​ໄຫວທີ່​ບໍ່​ຖືກຕ້ອງ​ຕໍ່​ລະບຽບກົດໝາຍ​ບ້ານ​ເມືອງ ເຊິ່ງ​ໄດ້​ສ້າງ​ຄວາມ​ຫຍຸ້ງຍາກ​ໃນ​ການ​ຄຸ້ມ​ຄອງ​ນໍາພາ​ຂອງ​ການຈັດ​ຕັ້ງ​ພັກ​-ລັດ ​ແຕ່ລະ​ຂັ້ນ​ຢ່າງ​ໜັກໜ່ວງ​ສົມຄວນ.

ສຳລັບການ​ເຊື່ອ​ຖື, ຮີດຄອງ​ປະ​ເພນີອັນ​ເກົ່າ, ຫລັາ​ຫລັງ ຂອງ​ປະຊາຊົນ​ບັນດາ​ເຜົ່າ​ໃນ​ເຂດ​ນີ້​ຍັງ​ໜັກໜ່ວງ, ຄວາມ​ສະ​ເໜີ​ພາບ​ຍິງ​-ຊາຍ ​ໃນ​ຄອບ​ຄົວ ​ແລະ ສັງຄົມ ຍັງມີ​ໜ້ອຍ​ເພາະ​ເຂົາ​ຍັງ​ບໍ່​ເຂົ້າ​ໃຈ; ທຸກໆ​ບ່ອນ​ທີ່​ໄດ້​ໄປ​ຮອດ​ໄປ​ເຖິງທ່ານປະທານ ກບຜ ​ໄດ້​ຖາມ​ເຖິງ​ຄວາມສຸກ​ທຸກຂອງພໍ່​ແມ່​ປະຊາຊົນ ທັງໄດ້​ໃຫ້ການ​ໂອ້​ລົມ​​ຊີ້​ແຈງຕໍ່ປະຊາຊົນໃຫ້​ເຂົ້າ​ໃຈ​ຕໍ່​ແນວທາ​ງນະ​ໂຍບາຍ​ຂອງ​ພັກ-​ລັດ ​ຕໍ່​ກັບ​ວຽກ​ງານຊົນ​ເຜົ່າ ​ແລະ ສາສະໜາ ​ໃນໄລຍະ​ໃໝ່, ​ເຜີຍ​ແຜ່ບາງ​​ເນື້ອ​ໃນ​ຈິດ​​ໃຈ​ທີ່​ສໍາຄັນ​ຂອງ​ນິຕິ​ກໍາທີ່​ພົວພັນ​ເຖິງວັດທະນະ​ທໍາ​-ຮີດ​ຄອງ​ປະ​ເພນີ ​ເປັນ​ຕົ້ນ​ແມ່ນບາງ​ມາດຕາ​ຂອງລັດຖະທໍາ​ມະນູນ, ​ກົດໝາຍ​ຄອບຄົວ, ​ເຜີຍ​ແຜ່​ດໍາລັດ 315/ລບ ວ່າ​ດ້ວຍ​ການ​ປົກ​ປ້​ອງ ​ແລະ ຄຸ້ມ​ຄອງການ​ເຄື່ອນ​ໄຫວ​ສາສະໜາໃຫ້​ປະຊາຊົນ​ເຂົ້າ​ໃຈ​ຕື່ມ; ພ້ອມນັ້ນ, ທ່ານຍັງ​ໄດ້​ຮຽກຮ້ອງ​ໃຫ້​ປະຊາຊົນ​ທຸກ​ຊົນ​ເຜົ່າ​ຈົງ​​ເຊີດ​ຊູ​ນໍ້າ​ໃຈ​ສາມັກຄີ​ຮັກ​ແພງ​ຊ່ວຍ​ເຫລືອ​ເຊິ່ງກັນ ​ແລະ ກັນ ພ້ອມ​ກັນ​ສູ້​ຊົນ​​ເພື່ອພັດທະນາ​ຊີວິດ​ການ​ເປັນ​ຢູ່​ໃຫ້​ດີ​ຂຶ້ນ​​ເປັນ​ກ້າວໆ​ໄປຕາມ​ແນວທາງ​ນະ​ໂຍບາຍ​ທີ່​ພັກ-​ລັດ​ວາງ​ອອກ ​ແລະ ດ້ວຍຈິດ​ໃຈ​ທີ່​ເປັນ​ຫ່ວງ​ເປັນ​ໃຍ​ຕໍ່ຊິວິດ​ສຸຂະພາບ​ຂອງ​ພໍ່​ແມ່​ປະຊາຊົນລາວ​ບັນດາ​ເຜົ່າ; ໃນການເຄື່ອນໄຫວຄັ້ງນີ້ຍັງ​ໄດ້ມີ​​ທີ​ມ​ແພດ​ໝໍລົງ​ໄປ​ໃຫ້​ບໍລິການກວດ​ສຸຂະພາບໂດຍ​ບໍ່​​ເສຍ​ຄ່າ ​ແລະ ​​ແຈກ​ຢາຍ​ຢາ​ປົວພະຍາດຈໍານວນ​ໜຶ່ງ​ໃຫ້​ປະຊາຊົນ ​ໃນແຕ່ລະ​ຈຸດ​ທີ່​ໄດ້​ລົງ​ຢ້ຽມຢາມອີກ​ດ້ວຍ.

ພາຍຫລັງສໍາ​ເລັດ​ການ​ລົງ​ຢ້ຽມຢາ​ມປະຊາຊົນ​ແລ້ວ, ຄະນະ​​ໄດ້​ເຮັດ​ວຽກຮ່ວມ​ກັບ​ຄະນະສະມາຊິກ​ສະພາ​ແຫ່ງ​ຊາດປະ​ຈໍາ​ເຂດ​ເລືອກ​ຕັ້ງ, ສະມາຊິກ​ສະພາ​ປະຊາຊົນ​ແຂວງ ​ແລະ ບັນດາ​ພາກສ່ວນ​ທີ່​ກ່ຽວຂ້ອງ​ຂອງ​ເມືອງ ​ແລະ ​ແຂວງ ​ເພື່ອ​ແຈ້ງ​ຜົນ​ຂອງ​ການ​ລົງ​ຕິດຕາມ​ກວດກາ​; ​ໃນ​ໂອກາດ​ດັ່ງກ່າວ, ທ່ານປະທານ ກບຜ ​ໄດ້​ປຶກສາ​ຫາລື​ຕໍ່ບັນຫາ​ຕ່າງໆ​ທີ່​ປະຊາຊົນ​ໄດ້​ສະ​ເໜີ​ພ້ອມ​ກັນ​ຊອກ​ຫາ​ວິທີ​ແກ້​ໄຂ​ໃນ​ຕໍ່ໜ້າ ​ເພື່ອ​ເຮັດ​ໃຫ້​ວຽກ​ງານ​ພັດທະນາ​ຊົນ​ເຜົ່າ​ໃນ​ເຂດ​ຊົນນະບົດ ​ແລະ ກາ​ນ​ແກ້​ໄຂ​ບັນຫາ​ສາສະໜາມີ​ຜົນ​ສໍາ​ເລັດ​ເປັນ​ກ້າວໆ​ໃນ​ຕໍ່​ໄປ.