ປະທານ ກຕທ ຕ້ອນຮັບແຂກຕ່າງປະເທດ

06/05/2019 00:00 -

(ສພຂ) ວັນທີ 9 ເມສາ 2019ທີ່ສະພາແຫ່ງຊາດ,ທ່ານ ເອກສະຫວ່າງ ວົງວິຈິດ ປະທານກຳມາທິການການຕ່າງປະເທດ(ກຕທ) ສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານນາງເຣນາບິດເຕີ(Rena Bitter) ເອກອັກຄະລັດຖະທູດອາເມລິກາ ປະຈຳ ສປປ ລາວ ເນື່ອງໃນໂອກາດມາແຈ້ງສະພາບການ ແລະ ປຶກສາຫາລືຕໍ່ບັນຫາມາດຕະການດ້ານວິຊາການ ຂອງສະຫະລັດອາເມລິກາຕໍ່ສປປລາວ.

ໃນໂອກາດດັ່ງກ່າວ, ທ່ານປະທານ ກຕທ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນແລະຕີລາຄາສູງ ໃນການພົບປະຄັ້ງນີ້ ເຊິ່ງເປັນການປະກອບສ່ວນອັນສຳຄັນ ເຂົ້າໃນການເພີ່ມພູນຄູນສ້າງສາຍພົວພັນມິດຕະພາບ ແລະ ທັງເປັນການສືບຕໍ່ການຮ່ວມມື ທີ່ມີມາແຕ່ດົນນານລະຫວ່າງສອງປະເທດລາວ-ສະຫະລັດອາເມລິກາ ໃຫ້ນັບມື້ນັບດີຂຶ້ນເລື່ອຍໆເປັນຕົ້ນ: ວຽກງານເກັບກູ້ລະເບີດທີ່ຍັງບໍ່ທັນແຕກ.

ໃນໂອກາດດັ່ງກ່າວ, ທ່ານນາງ ເຣນາບິດເຕີ ຍັງໄດ້ແຈ້ງໃຫ້ຊາວ່າ: ໃນອະນາຄົດຝ່າຍລັດຖະບານສະຫະລັດອາເມລິກາ ຈະມີໂຄງການໃໝ່ເພື່ອຊ່ວຍເຫລືອຊຸກຍູ້ ສ້າງຄວາມເຂັ້ມແຂງດ້ານວຽກງານທາງດ້ານພາສີຂອງກະຊວງການເງິນ, ວຽກງານປ້ອງກັນຄວາມສະຫງົບ ໂດຍສະເພາະວຽກງານສະກັດກັ້ນແລະຕ້ານຢາເສບຕິດ ແລະ ຂົງເຂດປົກປ້ອງຊາຍແດນເພື່ອສ້າງຄວາມໝັ້ນໃຈ, ຄວາມສະຫງົບສຸກແລະສະຖຽນລະພາບໃນການປົກປ້ອງຊາຍແດນເພື່ອຄວາມໝັ້ນໃຈວ່າບໍ່ມີອາດສະຍາກຳຂ້າມຊາດແລະການຄ້າຂາຍຢາເສບຕິດຕາມເຂດຊາຍແດນ; ທັງໄດ້ສະແດງຄວາມຂອບໃຈມາຍັງທ່ານປະທານ ກຕທທີ່ສະຫລະເວລາອັນມີຄ່າໃຫ້ການຕ້ອນຮັບຢ່າງອົບອຸ່ນໃນຄັ້ງນີ້; ພ້ອມດຽວກັນນີ້, ກໍຕາງໜ້າໃຫ້ລັດຖະບານສະຫະລັດອາເມລິກາເນື່ອງໃນໄລຍະປີໃໝ່ລາວຂໍອວຍພອນໃຫ້ຄະນະນຳຂອງລາວກໍຄືປວງຊົນລາວທຸກຊັ້ນຄົນຈົ່ງມີແຕ່ຄວາມຈະເລີນຜາສຸກ, ປະສົບຜົນສຳເລັດໃນຊີວິດສ່ວນໂຕແລະທາງດ້ານວຽກງານ.