ກບຜ ເຄື່ອນໄຫວຕິດຕາມກວດກາວຽກງານຊົນເຜົ່າຢູ່ແຂວງຊຽງຂວາງ

06/05/2019 00:00 -

(ສພຊ) ເພື່ອເປັນການປະຕິບັດຕາມພາລະບົດບາດ, ສິດ ແລະ ໜ້າທີ່ ຂອງສະມາຊິກສະພາແຫ່ງຊາດ ທີ່ໄດ້ກໍານົດໄວ້ໃນກົດໝາຍວ່າດ້ວຍສະພາແຫ່ງຊາດ; ໃນລະຫວ່າງວັນທີ 25-29 ມີນາຜ່ານມາ,  ທ່ານ ຄໍາຈັນ ໂສຕາປະເສີດ ຮອງປະທານກໍາມາທິການບັນດາເຜົ່າ(ກບຜ) ພ້ອມດ້ວຍຄະນະໂດຍສົມທົບກັບສະມາຊິກສະພາປະຊາຊົນແຂວງ ເຄື່ອນໄຫວຕິດຕາມກວດກາວຽກງານຊົນເຜົ່າ ຢູ່ເມືອງໜອງແຮດ ແຂວງຊຽງຂວາງ

          ຈຸດປະສົງໃນການລົງຕິດຕາມກວດກາຄັ້ງນີ້ ເພື່ອເກັບກໍາຂໍ້ມູນ, ສະພາບການດໍາລົງຊີວິດ, ຮີດຄອງປະເພນີ ແລະ ວັດທະນະທໍາ ກໍຄືການພັດທະນາທາງດ້ານເສດຖະກິດ ເພື່ອຍົກສູງຄຸນນະພາບຊີວິດການເປັນຂອງປະຊາຊົນບັນດາເຜົ່າ ທີ່ຢູ່ເຂດຫ່າງໄກສອກຫລີກ, ທຸລະກັນດານ ມາເປັນຂໍ້ມູນໃນການຄົ້ນຄ້ວາ, ສັງລວມ ລາຍງານຕໍ່ຄະນະປະຈໍາສະພາແຫ່ງຊາດ ແລະ ພາກສ່ວນທີ່ກ່ຽວຂ້ອງ ເພື່ອແກ້ໄຂໃນຂັ້ນຕໍ່ໄປ.

          ໃນການເຄື່ອນໄຫວລົງຕິດຕາມກວດກາ ຄະນະໄດ້ພົບປະກັບປະຊາຊົນເຜົ່າຜ້ອງ ຢູ່ເຂດບໍກໍ ແລະ ບໍເຍຍ ເຊິ່ງ ໄດ້ເຮັດວຽກ ຢູ່ 5 ບ້ານຄື: ບ້ານວຽງ, ບ້ານນໍ້າກູດ, ບ້ານຫ້ວຍດ່ານ, ບ້ານສວນອ້ອຍ ແລະ ບ້ານໜອງ ເພື່ອເກັບກໍາດ້ານສະຖິຕິ, ຄວາມຂະຫຍາຍຕົວໃນການພັດທະນາຊີວິດການເປັນຢູ່ຂອງປະຊາຊົນ ໃນແຕ່ລະບ້ານ-ຄອບຄົວ, ການເຂົ້າເຖິງການສຶກສາ-ກິລາ, ສາທາລະນະສຸກ ແລະ ເກັບກໍາສະພາບປາກົດການຫຍໍ້ທໍ້ທີ່ເກີດຂື້ນໃນເຂດ ແລະ ບ້ານດັ່ງກ່າວ.

          ຈາກການລົງຕິດຕິດຕາມກວດກາ ແລະ ພົບປະກັບປະຊາຊົນເຜົ່າຜ້ອງ ໃນແຕ່ລະເຂດ ແລະ ບ້ານດັ່ງກ່າວ ທ່ານຮອງປະທານ ກບຜ ໄດ້ໃຫ້ການໂອລົມ ຊີ້ແຈງຕໍ່ກັບແນວທາງນະໂຍບາຍຂອງພັກ-ລັດ ໃນໄລຍະໃໝ່ ໃນການພັດທະນາເສດຖະກິດ-ວັດທະນະທໍາ ແລະ ສັງຄົມແຕ່ລະຂັ້ນຈົນຮອດຂັ້ນບ້ານ ແລະ ຄອບຄົວ ເພື່ອຫັນປ່ຽນການດໍາລົງຊີວິດແບບດັ່ງເດີມຂອງປະຊາຊົນ ໄປສູ່ການດໍາລົງຊີວິດໃໝ່ທີ່ດີຂື້ນເທື່ອລະກ້າວ; ພ້ອມນີ້, ທ່ານຍັງໄດ້ຮຽກຮ້ອງໃຫ້ປະຊາຊົນ ຈົ່ງເຊີດຊູຄວາມສາມັກຄີປອງດອງ, ຊ່ວຍເຫລືອເຊິ່ງກັນ ແລະ ກັນ ໃນການພັດທະນາຊີວິດການເປັນຢູ່ໃຫ້ນັບມື້ນັບດີຂື້ນໄປເລື້ອຍໆ.

          ພ້ອມກັນນີ້, ຄະນະຍັງໄດ້ຢ້ຽມຢາມບ້ານເຮືອນຂອງປະຊາຊົນຢ່າງໃກ້ຊິດຕິດແທດ ແລະ ໄດ້ມອບເຄື່ອງນຸ່ງຫົ່ມຈໍານວນໜຶ່ງ ໃຫ້ແກ່ຄອບຄົວທີ່ທຸກຍາກໃນແຕ່ລະບ້ານເພື່ອເປັນການຊຸກຍູ້ ແລະ ໃຫ້ກໍາລັງໃຈແກ່ປະຊາຊົນ ສືບຕໍ່ພັດທະນາຄອບຄົວໃຫ້ຫລຸດພົ້ນອອກຈາກຄວາມທຸກຍາກ; ຈາກນັ້ນ, ຄະນະ ຍັງໄດ້ເຮັດວຽກຮ່ວມກັບປະທານສະພາປະຊາຊົນແຂວງຊຽງຂວາງ ພ້ອມດ້ວຍຄະນະຈໍານວນໜຶ່ງ  ເພື່ອແຈ້ງຜົນຂອງການລົງຕິດຕາມກວດກາຂອງຄະນະໃນຄັ້ງນີ້ ທັງໄດ້ປຶກສາຫາລືຕໍ່ກັບບັນຫາທີ່ປະຊາຊົນໄດ້ສະເໜີ ເພື່ອພ້ອມກັນຊອກຫາວິທີທາງແກ້ໄຂ ໂດຍຈະໄດ້ນໍາເອົາບັນຫາດັ່ງກ່າວນໍາສະເໜີຕໍ່່ພາກສ່ວນທີ່ກ່ຽວຂ້ອງຂອງແຂວງ ແລະ ເມືອງ ເຮັດໃຫ້ວຽກງານການພັດທະນາຊົນນະບົດ, ການແກ້ໄຂປາກົດການຫຍໍ້ທໍ້ນັບມື້ນັບດີຂື້ນ ແລະ ມີບາດກ້າວອັນໃໝ່ທີ່ດີຂື້ນກວ່າເກົ່າ.

(ນາງ ສີສະໝຸດ ຈັນທະວົງ)