ປະທານກໍາມາທິການບັນດາເຜົ່າຕ້ອນຮັບຄະນະກໍາມະການຊົນເຜົ່າສສ.ຫວຽດນາມ

06/05/2019 00:00 -

 

(ສພຊ) ວັນສຸກທີ 25 ເມສາ ຜ່ານມາ, ທີ່ສະພາແຫ່ງຊາດ ສະຫາຍ ນາງ ບົວພັນ ລີໄກຢາ ປະທານກໍາມາທິການບັນດາເຜົ່າ ສະພາແຫ່ງຊາດ ໄດ້ຕ້ອນຮັບການຢ້ຽມຂໍ່ານັບ ຂອງສະຫາຍຮວ່າງທິແຮງຮອງລັດຖະມົນຕີ, ຮອງຫົວໜ້າກໍາມະການຊົນເຜົ່າ ສະພາແຫ່ງຊາດ ສສ.ຫວຽດນາມ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ສປປລາວໃນລະຫວ່າງວັນທີ 24-28 ເມສາ 2019.

ສະຫາຍ ນາງ ບົວພັນ ລີໄກຢາ ໄດ້ສະແດງຄວາມດີໃຈ ແລະ ຕ້ອນຮັບຢ່າງອົບອຸ່ນ ພ້ອມ ທັງສະແດງຄວາມຊົມເຊີຍ ຕໍ່ຜົນສໍາເລັດ ໃນການເຮັດວຽກຮ່ວມກັບສູນກາງແນວລາວສ້າງຊາດ ເປັນຕົ້ນກ່ຽວກັບການສ້າງພະນັກງານຊົນເຜົ່າ, ການຈັດເຝິກອົບຮົມໃຫ້ພະນັກງານ; ພ້ອມທັງລາຍງານໂດຍຫຍໍ້ ກ່ຽວກັບການເຄື່ອນໄຫວ ຂອງກໍາມາທິການບັນດາເຜົ່າ ແລະ ສະພາບບັນດາເຜົ່າຢູ່ສປປລາວ ແລະ ຍັງໃຫ້ຮູ້ອີກວ່າພະນັກງານຊົນເຜົ່າ ຂອງສສ.ຫວຽດນາມ ກໍຄືພະນັກງານຊົນເຜົ່າຂອງລາວ ໃນທ້ອງຖິ່ນແມ່ນມີໜ້ອຍຫລາຍຊົນເຜົ່າ ດັ່ງກ່າວຖ້າບໍ່ມີພະນັກງານເປັນການນໍາແລ້ວ ກໍມີຄວາມເຂົ້າໃຈຍາກ ຕໍ່ແນວທາງນະໂຍບາຍຂອງພັກ-ລັດ, ຕໍ່ການດໍາລົງຊີວິດການເປັນຢູ່ຂອງຄອບຄົວ ແລະ ຂອງຊົນເຜົ່າຕົນເອງເຊິ່ງເປັນຫາທີ່ສອງຝ່າຍລາວ-ຫວຽດນາມຄ້າຍຄືກັນ; ພ້ອມທັງສະເໜີແຜນການຮ່ວມມື ໃນຕໍ່ໜ້າລະຫວ່າງກໍາມາທິການບັນດາເຜົ່າສະພາແຫ່ງຊາດ ກັບຄະນະກໍາມະການຊົນເຜົ່າສສ.ຫວຽດນາມ.

ສະຫາຍ ຮວ່າງທິແຮງ ໄດ້ສະແດງຄວາມຂອບໃຈຕໍ່ການຕ້ອນຮັບຢ່າງອົບອຸ່ນໃນຄັ້ງນີ້ ເຊິ່ງໄດ້ແຈ້ງໃຫ້ຮູ້ໂດຍສັງເຂບກ່ຽວກັບຜົນສໍາເລັດ ຂອງການພົບປະສອງຝ່າຍກັບສູນກາງແນວລາວສ້າງຊາດ ພ້ອມທັງຕີລາຄາຜົນຂອງການພົວພັນຮ່ວມມືລະຫວ່າງສອງພາກສ່ວນຕະຫລອດໄລຍະ 10 ຜ່ານມາ ແລະ ໄດ້ປຶກສາຫາລືເນື້ອໃນຫລາຍບັນຫາ ແລະ ຫລາຍກິດຈະຈໍາທີ່ຈະຕ້ອງໄດ້ປະຕິບັດຮ່ວມກັນເປັນຕົ້ນແລກປ່ຽນການຢ້ຽມຢາມຂອງຄະນະຜູ້ແທນ, ການເຝິກອົບຮົມ, ການໂຄສະນາຂົນຂວາຍປະຊາຊົນຊົນບັນດາເຜົ່າລຽບຕາມຊາຍແດນຂອງສອງປະເທດ,  ຮ່ວມມືໃນການຄົ້ນຄວ້າວິທະຍາສາດເພື່ອປະກອບສ່ວນເຂົ້າໃນການສ້າງແລະຈັດຕັ້ງນະໂຍບາຍກ່ຽວກັບຊົນເຜົ່າກໍຄືການຄຸ້ມຄອງລັດກ່ຽວກັບວຽກງານຊົນເຜົ່າແລະບັນດາຊົນເຜົ່າ, ສາສະໜາຕ່າງໆລ້ວນແລ້ວແຕ່ໄດ້ຍົກມາແລກປ່ຽນແລະປຶກສາຫາລືກັນເພື່ອສືບຕໍ່ໃຫ້ສໍາເລັດວຽກງານດັ່ງກ່າວແລະ ໃນປີ 2019 ຈະຮ່ວມມືນຳກັນເຄື່ອນໄຫວກິດຈະກໍາຕ່າງໆໃນນັ້ນໄດ້ຈັດກອງປະຊຸມພົບປະຂອງປະຊາຊົນບັນດາເຜົ່າລຽບຕາມຊາຍແດນທ້ອງຖິ່ນທີ່ມີຊາຍແດນຕິດຈອດກັນເຊິ່ງແມ່ນການເຄື່ອນໄຫວທາງການທູດຂອງປະຊາຊົນສອງປະເທດ, ໃນຕະຫລອດໄລຍະ 15 ປີຜ່ານມາແຫ່ງການພົວພັນຮ່ວມມື ເຊິ່ງເຫັນໄດ້ມາຄຸນນະພາບຂອງການພົວພັນມີຄຸນນະພາບນັບມື້ນັບສູງຂຶ້ນ; ພ້ອມດຽວກັນນັ້ນ, ສະຫາຍຮອງຫົວໜ້າກໍາມະການຊົນເຜົ່າ ສະພາແຫ່ງຊາດສສ.ຫວຽດນາມຍັງໄດ້ໃຫ້ຮູ້ເຖິງການເຄື່ອນໄຫວວຽກງານຊົນເຜົ່າຂອງຄະນະກໍາມະການຊົນເຜົ່າແລະສະພາບຊົນເຜົ່າຢູ່ສສ.ຫວຽດນາມໂດຍສັງເຂບ ແລະ ໃນຕອນທ້າຍຍັງໄດ້ເຊື້ອເຊີນສະຫາຍປະທານກໍາມາທິການບັນດາເຜົ່າສະພາແຫ່ງຊາດເຂົ້າຮ່ວມກອງປະຊຸມພົບປະໃນລະຫວ່າງຕົ້ນເດືອນທັນວາທີ່ຈະມາເຖິງນີ້ ຢູ່ທີ່ສສ.ຫວຽດນາມ.

(ສົມນຶກແກ້ວໄຊຍະຈັກ)