ຮອງປະທານ ກຕທ ມອບເຄື່ອງຊ່ວຍເຫລືອໃຫ້ກອງພັນຊາຍແດນ 415 ແລະກອງຮ້ອຍ 121 ຢູ່ແຂວງບໍ່ແກ້ວ

07/05/2019 00:00 -

(ສພຊ) ​ໂດຍ​ປະຕິບັດ​ຕາມ​ຄໍາ​ສັ່ງ​ແນະ​ນໍາຂອງ​ຄະນະ​ປະ​ຈໍາ​ສະພາ​ແຫ່ງ​ຊາດ ສະບັບ​ເລກທີ 01/ຄປຈ, ລົງ​ວັນ​ທີ 8 ມັງກອນ 2019 ກ່ຽວກັບ​ການຈັດ​ຕັ້ງ​ຜັນ​ຂະຫຍາຍ ​ແລະ ​ໂຄສະ​ນາ​ເຜີຍ​ແຜ່​ຜົນ​ສໍາ​ເລັດ​ຂອງ​ກອງ​ປະຊຸມ​ສະ​ໄໝສາມັນ​ເທື່ອ​ທີ 6 ຂອງ​ສະພາ​ແຫ່ງ​ຊາດຊຸດ​ທີ VIII, ທ່ານ ​ເຄນ​ທອງ ນວນ​ທະ​ສິງ ຮອງ​ປະທານ​ກຳມາ​ທິການ​ການ​ຕ່າງປະ​ເທດ (ກຕທ) ທັງເປັນສະມາຊິກ​ສະພາ​ແຫ່ງ​ຊາດ ປະ​ຈໍາ​ເຂດ​ເລືອກ​ຕັ້ງ​ທີ 5 ​ແຂວງບໍ່​ແກ້ວ ພ້ອມ​ດ້ວຍ​ຄະນະ​ ໄດ້​ເຄື່ອນໄຫວ​ພົບປະປະຊາຊົນແລະ​ເຜີຍ​ແຜ່​ຜົນ​ສໍາ​ເລັດຂອງ​ກອງ​ປະຊຸມ​ສະ​ໄໝສາມັນເທື່ອ​ທີ 6 ຂອງ​ສະພາ​ແຫ່ງ​ຊາດ ຊຸດ​ທີ VIII ຢູ່​​ເມືອງ​ເມິງ ​ແລະ ທະຫານ​ຮັກສາ​ຊາຍ​ແດນ​ຢູ່​ແຂວງບໍ່​ແກ້ວ ​ໃນລະຫວ່າງ​ວັນ​ທີ 29 ມີນາ ເຖິງວັນ​ທີ 4 ເມສາ 2019.

ໃນ​ການ​ເຄື່ອນໄຫວເຜີຍ​ແຜ່​ຜົນ​ສໍາ​ເລັດ​ຄັ້ງ​ນີ້, ທ່ານ ​ເຄນ​ທອງ ນວນ​ທະ​ສິງ ​ໄດ້​ພົບ​ປະ ​ແລະເຜີຍ​ແຜ່​ເອກະສານ​ທີ່​ກອງປະຊຸມ​ສະ​ໄໝສາມັນເທື່ອ​ທີ 6 ຂອງສະພາແຫ່ງຊາດຊຸດທີ ​VIIIໄດ້​ຮັບຮອງ​ເອົາ​ຈໍານວນ 13 ສະບັບ ຢູ່ 8 ຈຸດ​ເປົ້າໝາຍ​ຄື: ຢູ່​ບ້ານ​ນໍ້າຮອກ, ບ້ານ​ໄຊ​ພັດທະນາ,  ບ້ານ​ນາ​ງາມ, ບ້ານ​ຜາ​ຂາວ, ບ້ານ​ຜາ​ດໍາ ຂອງ​ເມືອງ​ເມິງ ​ແຂວງ​ບໍ່​ແກ້ວ ​ແລະ ຫ້ອງ​ວ່າການ​ປົກຄອງ​ເມືອງ​ເມິງ; ພ້ອມດຽວກັນນັ້ນ, ກໍ​ໄດ້​​ຢ້ຽມຢາມ​ກອງພັນ​ນ້ອຍ 415 ປ້ອງ​ກັນຊາ​ຍ​ແດນ​ຢູ່​ຄ້າຍ​ພູຜາໝົນ (ລາວ-​ໄທ) ​ເມືອງ​ປາກ​ທາ​ແຂວງ​ບໍ່​ແກ້ວ ​ແລະ ກອງຮ້ອຍ 121 ປ້ອງ​ກັນຊາ​ຍ​ແດນ​ຢູ່​ຄ້າຍ​ດອນ​ມູນ (ລາວ-ມຽນມາ) ຢູ່​ເມືອງ​ເມິງ​ແຂວງ​ບໍ່​ແກ້ວ.

          ​ໃນ​ໂອກາດ​ດັ່ງກ່າວ, ທ່ານ ​ເຄນ​ທອງ ນວນທະ​ສິງ ພ້ອມ​ດ້ວຍ​ຄະນະ ​ໄດ້​ນໍາ​ເອົາ​ເຄື່ອງ​ຊ່ວຍ​ເຫລືອຈໍານວນໜຶ່ງທີ່​ໄດ້​ຮັບ​ການອຸບປະຖໍາຊ່ວຍ​ເຫລືອຈາກທ່ານ ວັນນະ​ດາ ພົມມະ​ສະ​ທິດ ປະທານ​ກຸ່ມ​ບໍລິສັດ​ສະຫວັນ​ທີ​ວີ​ແອສເປັນ​​ຄອມ​ພິວ​ເຕີ 4 ຊຸດ, ເຄື່ອງພິມ 1 ໜ່ວຍ, ປື້​ມຂຽນ 150 ຫົວ, ບິ​ກຂຽນ 250 ກ້ານ, ສໍ​ດໍາ 140 ກ້ານ, ຢາງລຶບ 3 ກັບ​ໃຫ່ຍ, ບານເຕະ 2 ໜ່ວຍ, ໝາກບານ​ຕີ 2 ໜ່ວຍ, ໝາກກະຕໍ້ 4 ໜ່ວຍ, ປ໋ອງປາ 2 ​ແກັດ, ໝີ່​ 4 ແກັດ  ​ແລະ ​ເຄື່ອງ​ກິລາ​ຈໍານວນ 20​0 ຜືນ ​ແລະ ​ໄດ້​ຮັບ​ການ​ຊ່ວຍ​ເຫລືອຈາກ​ທ່ານ ​ໂຮມ ຊົງ​ປະດິດ ປະທານບໍລິສັດ​ລາວ​ສາກົນ ຂາ​ເຂົ້າ-ຂາ​ອອກ ​ເປັນໂສ້ງ​ເສື້ອ, ​ເຄື່ອງ​ກິລາ ​ແລະ ​ເຄື່ອງນຸ່ງ​ເດັກນ້ອຍ ຈໍານວນ 350 ຊຸດ, ປ໋ອງປາ 3 ​ແກັດ ແລະ ໝີ່​6 ແກັດມອບໃຫ້ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 5 ແຂວງບໍ່ແກ້ວ​; ເຊິ່ງສະມາຊິກ​ສະພາ​ແຫ່ງ​ຊາດ ປະ​ຈໍາ​ເຂດ​ເລືອກ​ຕັ້ງ​​ໄດ້​ນໍາ​ໄປ​​ແຈກຢາຍ​ໃຫ້​ປະຊາຊົນ ​ແລະ ກອງ​ທະຫານ​ຢູ່​ເຂດ​ຫ່າງ​​ໄກ​ສອກຫລີກຄື: ກອງພັນ​ນ້ອຍ 415 ຮັກສາ​ຊາຍ​ແດນ (ລາວ-​ໄທ) ຢູ່​ພູຜາໜົນ ​ເມືອງ​ປາກ​ທາ​ແຂວງ​ບໍ່​ແກ້ວ, ກອງຮ້ອຍ 121 ຮັກສາ​ຊາຍ​ແດນ (ລາວ-ມຽນມາ) ຢູ່​ຄ້າຍ​ດອນ​ມູນ ​ເມືອງ​ເມິງ​ແຂວງ​ບໍ່​ແກ້ວ, ສະພາ​ປະຊາຊົນ​ແຂວງ​ບໍ່​ແກ້ວ, ບ້ານ​ຫ້ວຍ​ຊາຍ​ເໜືອ, ບ້ານ​ພິມົນ​ສິນ​ເມືອງ​ຫ້ວຍ​ຊາຍ, ​ໂຮງຮຽນປະຖົມ​ບ້ານຜາ​ດໍາ, ບ້ານ​ຜາ​ຂາວ, ບ້ານ​ນໍ້າ​ຮອກ, ບ້ານ​ໄຊ​ພັດທະນາ ​ແລະ ບ້ານ​ນາ​ງາມ ​ເມືອງ​ເມິງ​ແຂວງ​ບໍ່​ແກ້ວ ເຊິ່ງ​ເປັນ​ເຂດ​ຫ່າງ​ໄກ​ສອກຫລີກ ​ແລະ ມີ​ຄວາມ​ຕ້ອງການຫລາຍ.