ສຳເລັດການເຂົ້າຮ່ວມກອງປະຊຸມຄະນະກຳມະການສະເພາະກິດAIPA

13/05/2019 00:00 -

(ສພຊ) ໃນລະຫວ່າງວັນທີ 26-28 ເມສາຜ່ານມາ, ທ່ານ ວຽງທະວີສອນ ເທບພະຈັນ, ຮອງປະທານກຳມາທິການການຕ່າງປະເທດ ສະພາແຫ່ງຊາດ ພ້ອມດ້ວຍຄະນະ ໄດ້ສຳເລັດການເຂົ້າຮ່ວມກອງປະຊຸມຄະນະກຳມະການສະເພາະກິດຂອງສະມັດຊາລັດຖະສະພາລະຫວ່າງຊາດອາຊຽນ (AIPA)ເພື່ອຄົ້ນຄວ້າຮ່າງຂໍ້ແນະນຳຂອງAIPA ກ່ຽວກັບການຮ່ວມມືກັບພາຍນອກ(Ad-hoc Working Group on Guideline of AIPA Engagement) ທີ່ບາລີ ປະເທດອິນໂດເນເຊຍ ເຊິ່ງເປັນກອງປະຊຸມລັກສະນະວິຊາການ ໂດຍມີຜູ້ເຂົ້າຮ່ວມທີ່ເປັນສະມາຊິກລັດຖະສະພາລະຫວ່າງຊາດອາຊຽນ ແລະເຈົ້າຫນ້າອາວຸໂສຈາກລັດຖະສະພາຕ່າງໆພາຍໃນອາຊຽນປະກອບດ້ວຍລັດຖະສະພາບຣູໄນ, ກຳປູເຈຍ, ສປປລາວ ມຽນມາ, ມາເລເຊຍ, ​ຟິລິບປິນ, ສິງກະໂປ, ໄທ ແລະ ຫວຽດນາມ ສ່ວນອິນໂດເນເຊຍ ບໍ່ສາມາດເຂົ້າຮ່ວມໄດ້ເນື່ອງຈາກຢູ່ໃນຊ່ວງການເລືອກຕັ້ງທົ່ວໄປ.

ໃນກອງປະຊຸມຄັ້ງນີ້ໄດ້ມີການຄົ້ນຄວ້າ, ປຶກສາຫາລື ແລະພິຈາລະນາຮັບຮອງເອົາຮ່າງເອກະສານທີ່ສຳຄັນ 3 ສະບັບຄື: ຮ່າງຄຳແນະນໍາຂອງໄອປາກ່ຽວກັບກົນໄກການຮ່ວມມືກັບພາຍນອກເຊິ່ງໄດ້ກຳນົດເງື່ອນໄຂ ແລະກົນໄກຂອງຂອບການຮ່ວມມືລະຫວ່າງໄອປາກັບຄູ່ຮ່ວມພາຍນອກ ເຊັ່ນ: ເງື່ອນໄຂການຮັບເອົາແຂກເຈົ້າພາບຈັດກອງປະຊຸມ, ລັດຖະສະພາສັງເກດການ ແລະຄູ່ຮ່ວມປຶກສາຫາລືໄອປາ ລວມທັງພັນທະຂອງລັດຖະສະພາເຫລົ່ານັ້ນໃຫ້ມີຄວາມຊັດເຈນຂຶ້ນ;ຮ່າງມະຕິຂອງໄອປາເພື່ອຮັບຮອງເອົາຄຳແນະນຳຂອງໄອປາກ່ຽວກັບການຮ່ວມມືກັບແຂກເຈົ້າພາບ, ລັດຖະສະພາສັງເກດການ ແລະຄູ່ຮ່ວມປຶກສາຫາລືໄອປາ ແລະ ບົດລາຍງານຜົນຂອງກອງປະຊຸມ ເຊິ່ງທັງ 3 ເອກະສານດັ່ງກ່າວ ຈະໄດ້ມີການນຳສະເໜີໃຫ້ກອງປະຊຸມສະມັດຊາໃຫຍ່ໄອປາຄັ້ງ 40 ເຊິ່ງຈະມີຂຶ້ນທີ່ບາງກອກ ປະເທດໄທ ໃນເດືອນສິງຫາທີ່ຈະມາເຖິງນີ້.