ປະທານ ກຕທ ຕ້ອນຮັບຄະນະຜູ້ແທນ ພັກກອມມູນິດ ກຸຍບາ

08/07/2019 00:00 -

(ສພຊ) ຕອນເຊົ້າວັນທີ 7 ມິຖຸນາ ຜ່ານມາ, ທີ່ຫ້ອງຮັບແຂກສະພາແຫ່ງຊາດ (ສພຊ) ນະຄອນຫລວງວຽງຈັນ, ສະຫາຍ ເອກສະຫວ່າງ ວົງວິຈິດ ກໍາມະການສູນກາງພັກ, ປະທານກໍາມາທິການການຕ່າງປະເທດ (ກຕທ) ໄດ້ຕ້ອນຮັບການເຂົ້າຢ້ຽມຂໍ່ານັບຂອງສະຫາຍ ໂຮເມໂຣ ອາກົດສຕາ ອາລວາເຣຊ (Homero Acosta Alvarez) ກໍາມະການສູນກາງພັກກອມມູນິດກູຍບາ, ເລຂາທິການສະພາແຫ່ງລັດ ແຫ່ງ ສ.ກູຍບາ, ສະມາຊິກສະພາແຫ່ງຊາດອໍານາດປະຊາຊົນ ພ້ອມດ້ວຍຄະນະ ເນື່ອງໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປລາວ ລະຫວ່າງວັນທີ 6-7 ມິຖຸນາ 2019.ສະຫາຍ ເອກສະຫວ່າງ ວົງວິຈິດ ໄດ້ກ່າວສະແດງຄວາມຍິນດີຕ້ອນຮັບອັນອົບອຸ່ນຕໍໍ່ສະຫາຍ ໂຮເມໂຣ ອາກົດສຕາ ອາລວາເຣຊ (Homero Acosta Alvarez) ທັງຕີລາຄາສູງຕໍ່ການຢ້ຽມຢາມ ແລະ ເຮັດວຽກ ຢູ່ ສປປລາວ ໃນຄັ້ງນີ້ ເຊິ່ງເປັນການສືບຕໍ່ສາຍພົວພັນລະຫວ່າງສອງປະເທດໃຫ້ມີບາດກ້າວໃໝ່ໃນຫລາຍໆດ້ານ ເປັນຕົ້ນແມ່ນການແລກປ່ຽນບົດຮຽນໃນການຈັດຕັ້ງປະຕິບັດສິດ, ພາລະບົດບາດຂອງສອງສະພາແຫ່ງຊາດ, ໂດຍລົງເລິກການປະຕິບັດພາລະບົດບາດການຕິດຕາມກວດກາຂອງສະພາແຫ່ງຊາດ ແລະ ການປັບປຸງກົດໝາຍ, ການສ້າງນິຕິກໍາ. ສະຫາຍ ໂຮເມໂຣ ອາກົດສຕາ ອາລວາເຣຊ (Homero Acosta Alvarez) ກໍໄດ້ກ່າວສະແດງຄວາມຂອບໃຈຕໍ່ສະຫາຍ ເອກສະຫວ່າງ ວົງວິຈິດ ທີ່ໄດ້ໃຫ້ການຕ້ອນຮັບອັນອົບອຸ່ນ ພ້ອມທັງແຈ້ງໃຫ້ຊາບການມາຢ້ຽມຢາມ ແລະ ເຮັດວຽກຢູ່ ສປປລາວໃນຄັ້ງນີ້ ກໍເພື່ອໂຄສະນາເຜີຍແຜ່ລັດຖະທໍາມະນູນ ແຫ່ງ ສ.ກູຍບາ ທີ່ໄດ້ຮັບການປັບປຸງໃໝ່ ແລະ ປະກາດໃຊ້ໃນວັນທີ 10 ເມສາ 2019 ທີ່ຜ່ານມາ ແລະ ພົບປະແລກປ່ຽນຄວາມຄິດເຫັນກ່ຽວກັບການປັບປຸງລັດຖະທໍາມະນູນສະບັບໃໝ່ດັ່ງກ່າວ.

(ສອນສັກ ວັນວິໄຊ)