ກຳມາທິການບັນດາເຜົ່າ ພົບປະເຮັດວຽກກັບຄະນະຊົນເຜົ່າ ກວາງຊີ ຊວາງ

01/08/2019 00:00 -

(ສພຊ) ວັນທີ 9 ກໍລະກົດຜ່ານມາ ທີ່ສະພາແຫ່ງຊາດ ນະຄອນຫລວງວຽງຈັນ, ກໍາມາທິການບັນດາ ເຜົ່າ ສະພາແຫ່ງຊາດ ໄດ້ພົບປະສອງຝ່າຍກັບຄະນະກໍາມະການຊົນເຜົ່າເຂດປົກຄອງຕົນເອງ ກວາງຊີ ຊວາງ ສປຈີນ; ເຊິ່ງຝ່າຍລາວນໍາໂດຍສະຫາຍ ຄໍາຈັນ ໂສຕາປະເສີດ ຮອງປະທານກໍາມາທິການບັນດາ ເຜົ່າ, ຝ່າຍຈີນນໍາໂດຍສະຫາຍ ເຫີຈ້າວຈ້ຽນ ຫົວໜ້າຄະນະກໍາມະການຊົນເຜົ່າ ແລະ ສາສະໜາ. ການພົບປະ ແລະ ເຮັດວຽກຮ່ວມກັນຄັ້ງນີ້ ແມ່ນເພື່ອປະກອບສ່ວນເສີມສ້າງຂະຫຍາຍສາຍພົວ ພັນມິດຕະພາບ ແລະ ການຮ່ວມ ລະຫວ່າງສອງພັກ,​ ສອງລັດ ແລະ ປະຊາຊົນສອງຊາດ ລາວ-ຈີນ ໃຫ້ແໜ້ນແຟ້ນຍິ່ງໆຂຶ້ນ; ເພື່ອແລກປ່ຽນບົດຮຽນ, ປະສົບການ ແລະ ວຽກງານກ່ຽວກັບຊົນເຜົ່າ, ທັງເປັນການເຜີຍແຜ່ໂຄສະນາບັນດານະໂຍບາຍຕ່າງໆ ຂອງ ສປປລາວ ຕໍ່ກັບວຽກງານຊົນເຜົ່າ ພ້ອມທັງໄດ້ຖອດຖອນບົດຮຽນຈາກຝ່າຍ ສປຈີນ. ທັງສອງຝ່າຍໄດ້ແຈ້ງສະພາບການເຄື່ອນໄຫວວຽກງານຂອງຕົນໃຫ້ກັນ ແລະ ກັນຊາບໂດຍສັງເຂບ, ພ້ອມນັ້ນ ຝ່າຍລາວກໍໄດ້ແຈ້ງສະພາບໂດຍຫຍໍ້ກ່ຽວກັບວຽກງານຊົນເຜົ່າ, ການພັດທະນາຊົນນະບົດແກ້ໄຂຄວາມທຸກຍາກຂອງປະຊາຊົນ ທີ່ຢູ່ເຂດຫ່າງໄກຊອກຫລີກ ແລະ ສະພາບການຄຸ້ມຄອງສາສະໜາຢູ່ ສປປລາວ.

ໃນການພົບປະສອງຝ່າຍ, ຝ່າຍ ສປຈີນ ໄດ້ສະເໜີແລກປ່ຽນບົດຮຽນໃນການປະຕິບັດ ນະໂຍບາຍໃນການເຕົ້າໂຮມບັນດາເຜົ່າໃນ ສປປລາວ, ແລກປ່ຽນປະສົບການ ໃນການປະຕິບັດນະ ໂຍບາຍການພັດທະນາຊົນເຜົ່າສ່ວນນ້ອຍຢູ່ໃນເຂດຫ່າງໄກສອກຫລີກ ເພື່ອເພີ່ມທະວີ ແລະ ພັດທະນາຊົນເຜົ່າກຸ່ມນ້ອຍໃນການພັດທະນາເສດຖະກິດ-ສັງຄົມ ແລະ ດ້ານອື່ນໆ; ເພີ່ມທະວີ ແລະ ຮຽນຮູ້ ໃຫ້ເຂົ້າໃຈເຖິງຈຸດພິເສດຂອງຄວາມແຕກຕ່າງທີ່ເປັນເອກະລັກ ລະຫວ່າງປະເທດຕິດທະເລ ແລະ ບໍ່ຕິດທະເລຂອງປະເທດອາຊຽນ ແລະ ກວາງຊີ; ທັງເປັນການເພີ່ມທະວີຄວາມສາມັກຄີລະຫວ່າງ ປະເທດເພື່ອນບ້ານ ແລະ ປະຊາຊົນບັນດາເຜົ່າ ໂດຍການຮ່ວມມືທາງດ້ານວັດທະນະທໍາ, ການຄ້າ ແລະ ການຮ່ວມມືດ້ານອື່ນໆ; ແລກປ່ຽນປະສົບການດ້ານການປະຕິບັດນະໂຍບາຍສິດເສລີພາບ ໃນການເຊື່ອຖືສາສະໜາ, ການພັດທະນາ ແລະ ການສ້າງຄວາມເຂັ້ມແຂງດ້ານສາສະໜາຂອງສອງປະເທດ ແລະ ເພື່ອຊຸກຍູ້ໃຫ້ການຮ່ວມມືດ້ານວຽກງານສາສະໜາ ໄປໃນຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ.

ພ້ອມກັນນັ້ນ, ຝ່າຍລາວກໍໄດ້ມີບາງບັນຫາທີ່ສະເໜີແລກປ່ຽນກັບ ສປຈີນ ເປັນຕົ້ນການຈັດຕັ້ງປະຕິບັດແຜນພັດທະນາ ເພື່ອລຶບລ້າງຄວາມທຸກຍາກ ໃຫ້ແກ່ປະຊາຊົນບັນດາເຜົ່າຢູ່ເຂດຊົນນະບົດຫ່າງໄກສອກຫລີກຂອງເຂດປົກຄອງຕົນເອງ ກວາງຊີ ຊວາງ; ບົດຮຽນການຄຸ້ມຄອງການຈັດຕັ້ງ ແລະ ການເຄື່ອນໄຫວສາສະໜາຢູ່ເຂດປົກຄອງຕົນເອງ ກວາງຊີ ຊວາງ.

           ໃນໂອກາດມາຢ້ຽມຢາມ ແລະ ເຮັດວຽກຂອງຄະນະກໍາມະການຊົນເຜົ່າເຂດປົກຄອງຕົນເອງ ກວາງຊີ ຊວາງ ໃນຄັ້ງນີ້ ຍັງໄດ້ຢ້ຽມຂໍ່ານັບສະຫາຍ ນາງ ບົວພັນ ລີໄກຢາ  ປະທານກໍາມາທິການບັນດາເຜົ່າ ສະພາແຫ່ງຊາດ.

(ສົມນຶກ ແກ້ວໄຊຍະຈັກ)