ຜູ້ແທນ ສພຊ ເຂົ້າຮ່ວມກອງປະຊຸມ CLV ຄັ້ງທີ 7 ທີ່ ສສ.ຫວຽດນາມ

02/09/2019 00:00 -

(ສພຊ) ໃນລະຫວ່າງວັນທີ 17-18 ສິງຫາ 2019 ທ່ານ ເອກສະຫວ່າງ ວົງວິຈິດ, ກຳມະການສູນກາງພັກ, ກໍາມະການຄະນະປະຈໍາ, ປະທານກຳມາທິການການຕ່າງປະເທດ ສະພາແຫ່ງຊາດ (ສພຊ) ໄດ້ນຳພາຄະນະຜູ້ແທນຈາກສະພາແຫ່ງຊາດລາວ  ເຂົ້າຮ່ວມກອງປະຊຸມຮ່ວມລະຫວ່າງສາມກຳມາທິການການຕ່າງປະເທດ ສະພາແຫ່ງຊາດ ກຳປູເຈຍ-ລາວ-ຫວຽດນາມ (CLV) ຄັ້ງທີ 7 ໃນຫົວຂໍ້: “ບົດບາດຂອງສະພາແຫ່ງຊາດ ໃນການຈັດຕັ້ງປະຕິບັດບັນດາຂໍ້ຕົກລົງການຮ່ວມມືລະຫວ່າງສາມປະເທດ ກຳປູເຈຍ-ລາວ-ຫວຽດນາມ ໃນເຂດສາມຫຼ່ຽມພັດທະນາ”, ທີ່ ແຂວງກວາງນິງ, ສສ.ຫວຽດນາມ. ກອງປະຊຸມດັ່ງກ່າວ, ຈັດຂຶ້ນພາຍໃຕ້ການເປັນປະທານຮ່ວມຂອງ ທ່ານ ຫວງຽນ ວັນ ເຢົາ, ກໍາມະການສູນກາງພັກກອມມູນິດຫວຽດນາມ, ກໍາມະການຄະນະປະຈໍາ, ປະທານກຳມາທິການການຕ່າງປະເທດ ສະພາແຫ່ງຊາດຫວຽດນາມ, ທ່ານ ຊຽງ ວຸນ, ປະທານກຳມາທິການການຕ່າງປະເທດ, ການຮ່ວມມືສາກົນ, ໂຄສະນາ ແລະ ຂ່າວສານ ສະພາແຫ່ງຊາດກຳປູເຈຍ ແລະ ທ່ານ ເອກສະຫວ່າງ ວົງວິຈິດ, ກຳມະການສູນກາງພັກ, ກໍາມະການຄະນະປະຈໍາ, ປະທານກຳມາທິການການຕ່າງປະເທດ ສະພາແຫ່ງຊາດລາວ. ກອງປະຊຸມໄດ້ຮັບກຽດເຂົ້າຮ່ວມ ແລະ ກ່າວຄຳເຫັນໃນພິທີເປີດກອງປະຊຸມຂອງ ທ່ານ ນາງ ຕ່ອງ ທິ ຟ່ອງ, ກຳມະການກົມການເມືອງສູນກາງພັກກອມມູນິດຫວຽດນາມ, ຮອງປະທານຜູ້ປະຈໍາການສະພາແຫ່ງຊາດ ສສ. ຫວຽດນາມ.
ເຂົ້າຮ່ວມກອງປະຊຸມຄັ້ງນີ້, ນອກຈາກຄະນະຜູ້ແທນຈາກສາມກຳມາທິການການຕ່າງປະເທດ ສະພາແຫ່ງຊາດກຳປູເຈຍ-ລາວ-ຫວຽດນາມ ແລ້ວ, ຍັງມີຜູ້ຕາງໜ້າຈາກສະພາຊົນເຜົ່າ, ບັນດາກຳມາທິການຂອງສະພາແຫ່ງຊາດຫວຽດນາມ, ກະຊວງແຜນການ ແລະ ການລົງທືນ, ກະຊວງການຕ່າງປະເທດ, ກະຊວງທີ່ກ່ຽວຂ້ອງຂອງ ສສ.ຫວຽດນາມ, ອໍານາດການປົກຄອງນະຄອນຫຼວງຮ່າໂນ້ຍ, ນະຄອນໂຮ່ຈີມິນ, ນະຄອນດານັ້ງ ແລະ ອຳນາດການປົກຄອງແຂວງອື່ນໆ ໃນເຂດສາມຫຼ່ຽມພັດທະນາຂອງ ສສ.ຫວຽດນາມ ລວມທັງໝົດ ຈຳນວນ 140 ທ່ານ.
ຈຸດປະສົງຂອງກອງປະຊຸມຄັ້ງນີ້ ເພື່ອປຶກສາຫາລື, ພົບປະສົນທະນາ ແລະ ແລກປ່ຽນຄຳຄິດຄຳເຫັນຕໍ່ຜົນການຕິດຕາມກວດກາການຈັດຕັ້ງປະຕິບັດ ບັນດາຂໍ້ຕົກລົງການຮ່ວມມືລະຫວ່າງສາມປະເທດກຳປູເຈຍ-ລາວ-ຫວຽດນາມ ໃນເຂດສາມຫຼ່ຽມພັດທະນາ ແລະ ຕີລາຄາຄືນຕໍ່ໝາກຜົນທີບັນລຸໄດ້ໃນການພັດທະນາເສດຖະກິດ-ສັງຄົມ ນັບຕັ້ງແຕ່ກອງປະຊຸມ ຄັ້ງທີ 6 ຂອງສາມກຳມາທິການການຕ່າງປະເທດ ສະພາແຫ່ງຊາດກຳປູເຈຍ-ລາວ-ຫວຽດນາມ ທີ່ ສປປ ລາວ ເປັນເຈົ້າພາບໃນປີ 2017 ແລະ ວິທີການທີ່ຈະຊຸກຍູ້ການຮ່ວມມືໃນເຂດສາມຫຼ່ຽມພັດທະນາໃນຕໍ່ໜ້າ.
ຫົວຂໍ້ທີ່ຄະນະຜູ້ແທນນຳມາສົນທະນາປະກອບມີ: ການຄຸ້ມຄອງຊັບພະຍາກອນທຳມະ ຊາດ ແລະ ປ່າໄມ້, ການພັດທະນາດ້ານຊັບພະຍາກອນມະນຸດ, ບັນຫາຄວາມສະຫງົບ ແລະ ຄວາມເປັນລະບຽບຮຽບຮ້ອຍ ໃນເຂດສາມຫຼ່ຽມພັດທະນາ (CLV), ກວມເອົາບັນດາການຄ້າຂາຍຜິດກົດໝາຍຂ້າມຊາຍແດນ ກ່ຽວກັບພະລິດຕະພັນໄມ້ ແລະ ຢາເສບຕິດ, ອາດສະຍາກຳຂ້າມແດນ, ການເຄື່ອນຍ້າຍ ແລະ ຕັ້ງຖິ່ນຖານຕາມລຳພັງໃຈ ແລະ ການແຕ່ງງານຜິດກົດໝາຍຂອງປະຊາຊົນລຽບຕາມຊາຍແດນຂອງສາມປະເທດ. ໃນຕອນທ້າຍຂອງກອງປະຊຸມ ປະທານກຳມາທິການການຕ່າງປະເທດກຳປູເຈຍ-ລາວ-ຫວຽດນາມ ຍັງໄດ້ເຫັນດີເປັນເອກະພາບ ແລະ ລົງລາຍເຊັນຮັບຮອງເອົາຖະແຫຼງການຮ່ວມຂອງກອງປະຊຸມ ຄັ້ງທີ 7 ເພື່ອກຳນົດແນວທາງການຈັດຕັ້ງປະຕິບັດ ເນື້ອໃນທີ່ສຳຄັນຂອງກອງປະຊຸມໃນຕໍ່ໜ້າ ແລະ ຍັງປຶກສາຫາລືກ່ຽວກັບແຜນການຈັດກອງປະຊຸມຮ່ວມລະຫວ່າງສາມກຳມາທິການການຕ່າງປະເທດ ສະພາແຫ່ງຊາດກຳປູເຈຍ-ລາວ-ຫວຽດ ນາມ (CLV) ໃນຄັ້ງຕໍ່ໄປ ທີ່ກຳປູເຈຍຈະເປັນເຈົ້າພາບໃນປີ 2021.