ປະທານ ກຜງສ ເຜີຍແຜ່ຜົນສຳເລັດ ກອງປະຊຸມສະໄໝສາມັນເທື່ອທີ 7

04/09/2019 00:00 -

ຕົ້ນເດືອນສິງຫາຜ່ານມາ, ສະພາປະຊາຊົນແຂວງ (ສພຂ) ເຊກອງ ໄດ້ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ແລະ ກອງປະຊຸມສະໄໝສາມັນເທື່ອທີ 7 ຂອງສະພາປະຊາຊົນແຂວງ ຊຸດທີ I ທີ່ສະໂມສອນເມືອງທ່າແຕງ  ນໍາໂດຍທ່ານ ພອນເພັດ ຄິວລາວົງ ປະທານ ສພຂ ເຊກອງ ແລະ ທ່ານ ວິໄລວົງ ບຸດດາຄໍາ ປະທານກໍາມາທິການແຜນການ ການເງິນ ແລະ ການກວດສອບ (ກຜງສ) ສະພາແຫ່ງຊາດ, ທັງເປັນສະມາຊິກສະພາແຫ່ງຊາດປະຈຳເຂດເລືອກຕັ້ງທີ 16 ແຂວງເຊກອງ ພ້ອມ​ດ້ວຍຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 16 ແລະ ສະມາຊິກສະພາປະຊາຊົນແຂວງ.
        ການລົງເຄື່ອນໄຫວໃນຄັ້ງນີ້ ແນໃສ່ເຮັດໃຫ້ບັນດາອົງການຈັດຕັ້ງພັກ-ລັດ, ແນວລາວສ້າງຊາດ, ອົງການຈັດຕັ້ງມະຫາຊົນທຸກຂັ້ນ, ພະນັກງານ-ລັດຖະກອນ, ນາຍ ແລະ ພົນທະຫານ, ນາຍ ແລະ ພົນຕຳຫລວດ ຕະຫລອດຮອດພໍ່ແມ່ປະຊາຊົນບັນດາເຜົ່າທົ່ວເມືອງທ່າແຕງ ໄດ້ຮັບຮູ້ ແລະ ເຂົ້າໃຈຕໍ່ລະບົບກົງຈັກການຈັດຕັ້ງ, ພາລະບົດບາດ, ສິດ ແລະໜ້າທີ່ຂອງສະພາແຫ່ງຊາດ ກໍຄືສະພາປະຊາຊົນຂັ້ນແຂວງ ແລະ ເນື້ອໃນວຽກງານສຳຄັນທີ່ພິຈາລະນາຮັບຮອງເອົາໃນສອງກອງປະຊຸມດັ່ງກ່າວ ພ້ອມທັງຮັບຟັງຄຳສະເໜີຂອງພະນັກງານຫລັກແຫລ່ງ ຕໍ່ກັບບັນຫາຕ່າງໆທີ່ເກີດຂຶ້ນຕົວຈິງຜ່ານບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ເພື່ອສະເໜີຕໍ່ພາກສ່ວນທີ່ກ່ຽວຂ້ອງແກ້ໄຂ.

ພ້ອມນີ້, ທ່ານປະທານ ສພຂ ເຊກອງ ກໍໄດ້ໂອ້ລົມໂດຍເນັ້ນໃຫ້ຄະນະພັກ, ອໍານາດການປົກຄອງເມືອງທ່າແຕງ ສືບຕໍ່ຮັກສາສະຖຽນລະພາບທາງດ້ານການເມືອງຢ່າງໜັກແໜ້ນ ໂດຍເພີ່ມທະວີຄວາມສາມັກຄີປອງດອງຂອງປະຊາຊົນບັນດາເຜົ່າເປັນປຶກແຜ່ນ, ມີປະຊາທິປະໄຕ ແລະ ມີຄວາມສະເໝີພາບຕໍ່ກົດໝາຍ, ເພີ່ມທະວີການຫັນລົງກໍ່ສ້າງຮາກຖານການເມືອງ ແລະ ພັດທະນາຊົນນະບົດຕາມທິດນໍາ 3 ສ້າງ, ທັງນີ້ ກໍເພື່ອສ້າງເງື່ອນໄຂ ແລະ ສິ່ງອໍານວຍຄວາມສະດວກດ້ານຕ່າງໆໃຫ້ແກ່ປະຊາຊົນບັນດາເຜົ່າພັດທະນາເສດຖະກິດຄອບຄົວໃຫ້ນັບມື້ດີຂຶ້ນ ແລະ ກ້າວໄປສູ່ການຫລຸດພົ້ນອອກຈາກຄວາມທຸກຍາກ.