ຮອງປະທານ ກຜງສ ເຜີຍແຜ່ຜົນສຳເລັດ ກອງປະຊຸມສະໄໝສາມັນເທື່ອທີ 7 ຢູ່ແຂວງ ຫົວພັນ

04/09/2019 00:00 -

(ສພຊ) ລະຫວ່າງວັນທີ 18​-21 ສິງຫາຜ່ານມາ, ທ່ານ ທັນຕາ ກອງຜາລີ ຮອງປະທານກໍາມາທິການແຜນ  ການ, ການເງິນ ແລະ ກວດສອບ (ກຜງສ) ສະພາແຫ່ງຊາດ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 8 ແຂວງຫົວພັນ ໄດ້ລົງເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ຢູ່ບ້ານກ້າງເມືອງ, ບ້ານຫີນດໍາ, ຈຸດເທສະບານເມືອງວຽງໄຊ ແລະ ບ້ານກາງນໍ້າ ເມືອງຊໍາເໜືອ ລວມທັງໝົດ 4 ຈຸດ, ມີຜູ້ເຂົ້າຮ່ວມຮັບຟັງທັງໝົດ 450 ກວ່າຄົນ ຍິງ 200 ກວ່າຄົນ.

ໂອກາດລົງເຜີຍແຜ່ຄັ້ງນີ້ ທ່ານໄດ້ນໍາເອົາບັນດາເນື້ອໃນກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ມາເຜີຍແຜ່ໃຫ້ພະນັກງານ-ລັດຖະກອນ ຕະຫລອດຮອດປະຊາຊົນບັນດາເຜົ່າໄດ້ຮັບຮູ້ເຂົ້າໃຈຕໍ່ເນື້ອໃນຂອງກອງປະຊຸມດັ່ງກ່າວ ເປັນຕົ້ນ: ການຮັບຮອງເອົາບົດລາຍງານຂອງລັດຖະບານ, ບົດລາຍງານຂອງອົງການໄອ ຍະການປະຊາຊົນສູງສຸດ, ການສ້າງ-ປັບປຸງກົດໝາຍ ແລະ ບັນຫາສໍາຄັນອື່ນໆ ພ້ອມທັງໃຫ້ໂອກາດຜູ້ມີສິດເລືອກຕັ້ງ ໄດ້ສະເໜີຄວາມຂັດຂ້ອງໝອງໃຈຂອງຕົນທີ່ມີຕໍ່ອົງການປົກຄອງແຂວງ, ເມືອງ ໃນການບໍລິຫານລັດ ຈາກນັ້ນ, ບັນດາທ່ານສະມາຊິກສະພາແຫ່ງຊາດ ແລະ ການນໍາເມືອງໄດ້ຜັດປ່ຽນກັນອະທິບາຍຊີ້ແຈງບາງບັນຫາ ແລະ ນໍາເອົາບັນດາຄໍາສະເໜີດັ່ງກ່າວມາສະເໜີຕໍ່ພາກສ່ວນກ່ຽວຂ້ອງແກ້ໄຂ.

ພ້ອມກັນນັ້ນ, ຍັງໄດ້ລົງຕິດຕາມຜົນກະທົບໄພພິບັດຈາກທໍາມະຊາດ ເປັນຕົ້ນນໍ້າປ່າໄຫລສຸ, ດິນເຈື່ອນທັບຖົມເຮືອນ, ໄຮ່ນາປະຊາຊົນ ຢູ່ບ້ານຫີນດໍາ, ບ້ານຄໍານາງ ເມືອງວຽງໄຊ ແຂວງຫົວພັນ ແລະ ໄດ້ມອບເງິນສົດ 20 ລ້ານກີບ ໃຫ້ເມືອງ ເພື່ອນໍາໄປມອບຕໍ່ໃຫ້ຜູ້ທີ່ໄດ້ຮັບຜົນກະທົບຈາກໄພພິບັດ ພ້ອມທັງມອບເຄື່ອງຊ່ວຍເຫລືອໃຫ້ຄອບຄົວຜູ້ປະສົບເຄາະຮ້າຍ ແລະ ທຸກຍາກ ເປັນຜ້າຫົ່ມ, ຄັນຮົ່ມ ແລະ ເງິນສົດຈໍານວນໜຶ່ງ ລວມມູນຄ່າທັງໝົດ 24 ລ້ານກວ່າກີບ.

 ທ່ານ ທັນຕາ ກອງຜາລີ ຍັງໄດ້ສະແດງຄວາມໂສກເສົ້າເສຍໃຈນໍາຄອບຄົວທີ່ໄດ້ຮັບຜົນກະທົບ ແລະ ຮຽກຮ້ອງໃຫ້ອໍານາດການປົກຄອງເມືອງ, ບ້ານ ຈົ່ງເອົາໃຈໃສ່ໃຫ້ການຊ່ວຍເຫລືອເບິ່ງແຍງເຊິ່ງກັນ ແລະ ກັນ ໃນການຟື້ນຟູຜົນກະທົບຈາກໄພທໍາມະຊາດຄັ້ງນີ້ ໃຫ້ກັບຄືນສູ່ສະພາບປົກກະຕິ ແລະ ດີຂຶ້ນກ່ວາເກົ່າ.