ຄະນະຜູ້ແທ່ນປ້ອງກັນການປະຕິວັດກູບາຢ້ຽມຂ່ຳນັບປະທານ ກຕທ

04/09/2019 00:00 -

(ສພຊ) ວັນ​ທີ 24 ສິງ​ຫາຜ່ານມາ, ທີ່​ຫ້ອງ​ຮັບ​ແຂກສະພາ​ແຫ່ງ​ຊາດ, ສະຫາຍ ​ເອກ​ສະຫວ່າງ​ ວົງ​ວິຈິດ ປະທານ​ກຳ​ມາ​ທິການ​ການ​ຕ່າງປະ​ເທດ ​ໄດ້​ຕ້ອນຮັບ​ການ​ເຂົ້າ​ຢ້ຽມຂ່ຳນັບ​ຂອງ​ຄະນະ​ຜູ້​ແທນ​ຄະນະ​ກຳມະການ​ປ້ອງ​ກັນ​ການ​ປະຕິວັດ​ກູ​ບາ ນຳ​ໂດຍ​ສະຫາຍ ​ແຄຣລອສ ມີຣານດາ ມາຕິ​ແນ​ວ (carlos Rafael Miranda Martinez) ກຳມະການ​ສູນ​ກາງ​ພັກ​ກອມ​ມູນິດ​ກູ​ບາ ຫົວໜ້າ​ຄະນະ​ກຳມະ​ການ​ປ້ອງ​ກັນ​ການ​ປະຕິວັດ​ກູ​ບາ ​ໃນ​ໂອກາດ​ທີ່​ເດີນທາງ​ມາ​ຢ້ຽມຢາມ ​ແລະ ​ເຮັດ​ວຽກຢູ່ ສປປລາວ ​ໃນ​ລະຫວ່າງ​ວັນ​ທີ 23-25 ສິງຫາ​ນີ້.

          ສະຫາຍ ແຄຣລອສ ມີຣານດາ ມາຕິ​ແນ​ວ ​ໄດ້​ລາຍ​ງານ​ກ່ຽວກັບ​ການຈັດ​ຕັ້ງ​ປະຕິບັດ​ວຽກງານ​ຂອງ​ຕົນ​ໃຫ້​ຊາບ ​ແລະ ຈຸດປະສົງ​ໃນ​ການ​ມາ​ຢ້ຽມຢາມ ​ແລະ ​ເຮັດ​ວຽກ​ໃນ​ຄັ້ງ​ນີ້; ທັງ​ນີ້​, ​ເພື່ອ​ເປັນ​ການສືບ​ຕໍ່​ເສີມ​ຂະ​ຫຍາ​ຍສາຍ​ພົ​ວພັນ​ມິດຕະພາບ ​ແລະ ການ​ຮ່ວມ​ມື​ທີ່​ມີ​ມູນ​ເຊື້ອ​ອັນ​ດີງາມ ​ລະຫວ່າງ​ສອງ​ພັກ ສອງ​ລັດ ກໍ​ຄື​ສອງ​ອົງການ​ນິຕິບັນຍັດ​ລະຫວ່າງ​ສອງ​ປະ​ເທດ ​ໃຫ້​ນັບ​ມື້​ນັບ​ໄດ້​ຮັບ​ການ​ເສີມ​ຂະຫຍາຍ​ຍິ່ງໆຂຶ້ນ​​.

          ສະຫາຍ ​ເອກ​ສະຫວ່າງ ວົງ​ວິຈິດ ​ໄດ້ສະ​ແດງ​ຄວາມ​ຍິນ​ດີ​ຕ້ອນຮັບ ​​ແລະ ຕີ​ລາຄາ​ສູງ​ຕໍ່ສາຍ​ພົວພັນ​ມິດຕະພາບ ​ແລະ ການ​ຮ່ວມ​ມື​ອັນ​ດີງາມຂອງ​ສອງ​ພັກ, ​ສອງ​ລັດ ກໍ​ຄື​ສອງ​ອົງການ​ນິຕິບັນ​ຍັດ ລາວ-ກູ​ບາ ທີ່​ໄດ້​ຮັບ​ການ​ເສີມ​ຂະຫຍາຍ​ໃຫ້​ນັບ​ມື້​ນັບ​ໄດ້​ຮັບ​ການ​ເສີມຂະຫຍາຍ​ຂຶ້ນ​ເລື້ອຍໆ; ພ້ອມ​ທັງ​ສະ​ແດງ​ຄວາມ​ປິ​ຕິ​ຍິນ​ດີ​ຕໍ່​ການ​ມາ​ຢ້ຽມຢາມ ​ແລະ ​ເຮັດ​ວຽກຂອງ​ຄະນະ​ຜູ້​​ແທນ​ໃນ​ຄັ້ງ​ນີ້​.